Kyala jo ndamuli gwa kiisʉ kyosa
Ʉlwɨmbo.
98
Mummwɨmbɨlege ɄNTWA ʉlwɨmbo ʉlʉpya,namanga abombile ɨsisya fiijo,
ɨkɨboko ɨkiilɨɨlo nʉ lʉkongi lwake ʉlwikemo fimpeele ʉbʉtoli.
2 ɄNTWA abʉboniisye pabwelu ʉbʉtoli bwake,
afisetʉliile ɨfikolo fyosa ʉbʉgolofu bwake.
3 Alɨkʉmbwike iipyana lyake,
nʉ bwanalooli bwake kwa Isilaɨli.
Ɨfibafu fyosa ɨfya pakiisʉ,
fibʉbwene ʉbʉtoli bwa Kyala gwɨtʉ.
4 Mwe fiisʉ fyosa, munnduluutɨlege ɄNTWA,
muntuufyege nʉ kʉsekela nɨ nyɨmbo.
5 Mummwɨmbɨlege ɄNTWA nɨ kɨsango,
ni ipango ni isyʉ inunu.
6 Kʉ ngangabwite nɨ mbembe,
mululuutɨlege nkyeni mMalafyale ɄNTWA.
7 Gwe nyanja, goobeelege, na fyosa ɨfi filimo,
ɨkiisʉ kyosa na aba bikʉtʉʉgala ʉmo.
8 Mwe nyɨɨsi, namukomege amanja.
Mwe fyamba, nammwɨmbege pamopeene nʉ lʉsekelo.
9 Fyosa fimpaalege ɄNTWA,
namanga ikwisa kʉbalamula abandʉ.
Ikwisa kʉfilamula ɨfikolo fyosa,
kʉ bʉgolofu na kʉ bwanalooli.