Kyala jo Malafyale ʉNkʉlʉmba
97
ɄNTWA jo Malafyale, ɨkiisʉ kɨsekelege,ɨsʉngo sya mu nyanja syosa sisekelege.
2 Amabɨngo nɨ ngiisi fikʉnsyʉngʉʉtɨla,
ʉbʉgolofu nʉ bwanalooli,
lo lwalo lwa kɨkota kyake ɨkya bʉtwa.
3 Ʉmooto gukʉtalapo nkyeni mmyake,
gukʉbookya abalʉgʉ baake ɨfibafu fyosa.
4 Ɨnjasi syake sikʉkɨmulɨka ɨkiisʉ,
ɨkiisʉ kikʉsibona nʉ kʉtetema.
5 Ɨfyamba fikwengʉka bo ʉlwa mpulya nkyeni mu NTWA,
nkyeni mu Ntwa ʉgwa kiisʉ kyosa.
6 Ʉmpaalanga gukʉfumusya ʉbʉgolofu bwake,
abandʉ boosa bikʉbʉbona ʉbʉsisya bwake.
7 Boosa aba bikwipuuta kwa gyabaakyala bafujuligwe,
na aba bikwituukɨfya kʉ fifwani.
Mwe gyabaakyala mwesa, mummwipuutege.
8 Abandʉ abaa nkaaja akaa mu Syoni,
bikʉpɨlɨka nʉ kʉsekela.
Ʉtwaja ʉtwa mu Juuta tukʉsania,
kʉnongwa jaa bʉlamuli bwako, gwe NTWA.
9 Namanga gwe NTWA, ʉlɨ Nkʉlʉmba pakiisʉ kyosa,
ʉlɨ mfumuke ʉkʉgɨkɨnda gyabaakyala gyosa.
10 Ʉmwe mwe munnganile ɄNTWA, mubʉbengege ʉbʉbiibi,
ikʉbalɨndɨlɨla aba bikʉntiila,
ikʉbapoka kʉ baniongafu.
11 Ʉlʉmuli lukʉbamulɨkɨla abagolofu,
ʉlʉsekelo lwa beelu mu ndumbula.
12 Mwe bagolofu, namusekelege mu NTWA,
nʉ kʉjɨgwɨla ʉlʉpi ɨngamu jaake ɨnyiikemo.