Kyala jo Malafyale, kangɨ ndongi
(1 Ɨsya Ntʉbalɨlo 16:22-33)
96
Mummwɨmbɨlege ɄNTWA ʉlwɨmbo ʉlʉpya,mummwɨmbɨlege ɄNTWA, mwe kiisʉ kyosa.
2 Mummwɨmbɨlege ɄNTWA, mujɨpaalege ɨngamu jaake,
mufumusyege ʉbʉpoki bwake kʉkʉtɨ isikʉ.
3 Mufifumukɨsyege ɨfikolo ʉbʉsisya bwake,
nɨ mbombo syake ɨsisya kʉ bandʉ boosa.
4 Namanga ɄNTWA jo nkʉlʉmba, gwa kʉtuufigwa fiijo,
gwa kʉtiiligwa ʉkʉkɨnda gyabaakyala gyosa.
5 Gyabaakyala ɨgya fikolo ɨfingi, gya itolo,
looli ɄNTWA aapelile ʉmpaalanga.
6 Ʉlwɨmɨko nʉ bʉsisya finsyʉngʉʉtiile,
amaka nʉ bʉkʉlʉmba filɨ pabʉjo bwake ʉbwikemo.
7 Mwe fikolo fya bandʉ, namumpege ɄNTWA ʉlwɨmɨko,
muntuufyege ɄNTWA kʉnongwa jaa bʉsisya na maka gaake.
8 Mujɨtuufyege ɨngamu jaake ɨsisya,
namutwalege amakemo nʉ kwisa mu tempeli jaake.
9 Mummwipuutege ɄNTWA pabʉjo bwake ʉbwikemo,
ɨkiisʉ kyosa kɨtetemege nkyeni mmyake.
10 Mufibʉʉlege ɨfikolo ʉkʉtɨ,
“ɄNTWA jo Malafyale!”
Akɨbɨɨkile kanunu ɨkiisʉ, kɨtikʉjʉngaanika,
ikwisa kʉbalonga abandʉ kʉ bʉgolofu.
11 Ʉmpaalanga gʉsekelege,
ɨkiisʉ kɨluluutɨlege,
ɨnyanja joobeelege, na fyosa ɨfi filimo.
12 Ɨmigʉnda na fyosa ɨfi filimo fisekelege!
Po nɨ mipiki gyosa gyɨmbege nʉ lʉsekelo,
13 nkyeni mu NTWA, namanga ikwisa,
ikwisa kʉja ndamuli gwa bandʉ boosa.
Ikwisa kʉlamula abandʉ boosa,
kʉ bʉgolofu na kʉ bwanalooli.