Kyala ndɨndɨlɨli gwɨtʉ
91
Ʉjʉ ikʉja mbʉlɨndɨlɨli bwa Kyala ʉNkʉlʉmba,ikʉtʉʉgala nkɨpepo ɨkya Mwene maka goosa.
2 Aikʉjoba kʉ NTWA ʉkʉtɨ,
“Ʉgwe ʉlɨ bʉbopelo bwangʉ, gwe ilinga lyangʉ,
kangɨ gwe Kyala gwangʉ, gwe ngʉkʉsʉʉbɨla.”
3 Nalooli ʉmwene aikʉkʉpoka kʉ ntego gwa mfwɨmi,
na kʉ mbʉngo ɨjaa kɨlalilali ɨngogi.
4 Aikʉkʉkupɨkɨla na majoja gaake,
kʉʉsi kʉ mapɨko gaake aakʉbwaga ʉbʉbopelo,
ʉbwanalooli bwake jo ngʉlʉ jaa kʉkʉlɨndɨlɨla.
5 Ʉlɨngatiilaga ɨfi fikʉtiilɨsya pakɨlo,
pamo ɨmitipʉlo pamuusi,
6 pamo ɨmbʉngo ɨjɨ jikwisa mu ngiisi,
pamo ʉlʉpyuto ʉlʉ lukʉbagoga abandʉ pamuusi.
7 Nalɨnga abandʉ 1,000 bikʉfwa kɨfuki na nungwe,
kangɨ na bangɨ 10,000 kʉ kɨboko kyako ɨkiilɨɨlo,
looli ʉgwe, ʉlʉpyuto lʉtikwisa kʉsegelela kʉmyako.
8 Aakʉkeetaga na maaso gaako,
ʉkʉbabona abatʉlanongwa bo bikʉfundigwa.
9 Nalooli ʉmpelile ɄNTWA ʉkʉja bʉbopelo bwako,
ʉmmbɨɨkile Kyala ʉNkʉlʉmba ʉkʉja bʉjo bwako.
10 Ɨmbiibi nasimo aasitikʉkwaga ʉgwe,
ʉlʉpyuto loloosa aalʉtikʉsegelelako kʉmyako.
11 Namanga ikʉbatʉma abandʉmi baake,
bakʉlɨndɨlɨle mu njɨla syako syosa.a
12 Bikʉkʉpɨmba mmaboko gaabo,
ʉkʉtɨ ʉngafulala ɨkɨlʉndɨ kyako pi ibwe.
13 Kwisa kʉsikanyania ɨngalamu nɨ njoka,
ɨmwana sya ngalamu nɨ nyiifwɨla, kwisa kʉsitikania.
14 ɄNTWA ikʉtɨ, “Angʉmpoka ʉjʉ aanganile,
ngʉnndɨndɨlɨlaga paapo aameenye!
15 Bo ikʉngoolela ʉne, angʉmmwamulaga,
bo alɨ mbʉtolwe, angʉjaga nagwe,
angʉmpokaga ʉkʉtɨ ɨɨmɨkigwege na bandʉ.
16 Angʉmpaga ʉbʉʉmi ʉbʉtali,
angʉnnangɨsyaga ʉbʉpoki bwangʉ.”