Ɨkɨjabo ɨkya bʉna
(Ɨsabʉli 90–106)
Kyala nʉ mundʉ
Ʉlwipuuto lwa Moose, ʉmundʉ gwa Kyala.
90
Gwe Ntwa, ʉgwe ʉlɨ bʉjo bwɨtʉ,ʉbwa kʉtʉʉgasyamo ɨsopelo syosa.
2 Bo ʉkaalɨ ʉkʉfipela ɨfyamba,
na bo ʉkaalɨ ʉkʉkɨpela ɨkiisʉ,
ʉgwe gwe Kyala bwila na bwila.
3 Kʉnngomokesyako ʉmundʉ kʉ lʉfumbɨ,
kʉtɨ, “Mwe bandʉ, namugomokeleko kʉ lʉfumbɨ!”
4 Namanga ɨfyɨnja 1,000 nkyeni mmyako,
filɨ bo iisikʉ ɨlya mmajolo ɨlɨ lɨkɨndile,
fikʉfwana kabalɨlo akapimba akaa pakɨlo.
5 Kʉbakʉkʉla abandʉ, bikʉjonga bo ʉlwa njosi,
bikʉfwana bo ɨliisʉ ɨlɨ likʉmela nʉlʉbʉnjʉ,
6 ɨlɨ likʉmela nʉ kʉbɨla,
namajolo likʉkofuka nʉ kʉʉma.
7 Tukʉpyutigwa nɨ ngalalɨsi syako,
ʉbʉkalale bwako bukʉtʉtetemesya.
8 Ɨmbiibi syɨtʉ ʉsibɨɨkile nkyeni mmyako,
ɨsi tukʉbomba kʉbʉtiitʉ, silɨ pabwelu kʉmyako.
9 Ʉbʉʉmi bwɨtʉ bukʉpimbʉligwa nɨ ngalalɨsi syako,
ʉbʉʉmi bwɨtʉ bukʉmalɨka bo ʉlwa mʉʉji.
10 Ɨfyɨnja fya bʉʉmi bwɨtʉ filɨ 70,
lɨnga tʉlɨ na maka, fikʉja 80.
Looli mbʉʉmi bwɨtʉ tukwenda mbʉtolwe nɨ ndaamyo,
amasikʉ gikʉkɨnda nakalɨnga, ʉswe tukʉjonga.
11 Jo jwani agameenye amaka gaa ngalalɨsi syako?
Jo jwani ikʉpaasya ɨsi bukʉtwala ʉbʉkalale bwako?
12 Ʉtʉmanyisye ʉkʉbʉmanya ʉbʉpimba ʉbwa bʉʉmi bwɨtʉ,
ʉkʉtɨ tʉjege nɨ ndumbula ɨsya mahala.
13 Gwe NTWA, gomoka. Aakʉkalala mpaka ndɨli?
Ʉtʉpaakɨsye twe babombeli baako.
14 Ʉtwikʉtɨsye kʉkʉtɨ lʉbʉnjʉ iipyana lyako,
ʉkʉtɨ tʉsekelege nʉ kʉsania mbʉʉmi bwɨtʉ boosa.
15 Ʉtʉpe ʉlʉsekelo ʉlwingi,
ʉkʉfwana nɨ fyɨnja fingi ɨfi tʉfundiigwe,
fingi ʉkʉfwana na ɨfi tʉtaamiigwe.
16 Ʉswe twe babombeli baako tʉsibone ɨmbombo syako,
na baanɨɨtʉ babʉbone ʉbʉsisya bwako.
17 Iipyana lya Ntwa Kyala gwɨtʉ lɨjege pamwanya pamyɨtʉ,
ʉsisajege ɨmbombo sya maboko gɨɨtʉ,
ɨmbombo sya maboko gɨɨtʉ ʉsipelege ʉkʉja nunu.