Ʉkʉsʉʉma ʉbʉtʉʉli
Ʉlwɨmbo ʉlwa mahala ʉlwa Etani Mwesila.
89
Gwe NTWA, ngwɨmbaga bwila ɨsya ipyana lyako,ngʉbʉfumusyaga ʉbʉsʉʉbɨligwa bwako, mu sopelo syosa.
2 Ngʉbabʉʉlaga, ngʉtɨgɨ,
“Iipyana lyako lɨliko bwila na bwila,
nʉ bʉsʉʉbɨligwa bwako bwitotiike bo ʉlwa kʉmwanya.”
3 Gwatile, “Mbɨɨkile ʉlwitɨkano nʉ nsʉngʉligwa gwangʉ,
ndapile kwa Ndaabɨti, ʉmbombeli gwangʉ,
4 ndile, ‘Angʉbapa ʉbʉnyafyale ʉbwa bwila na bwila,
abaa ndʉjungu lwako,
ʉbʉnyafyale bwako aabukʉjako mu sopelo syosa.’ ”a Sela
Ɨnduufyo kʉ maka nʉ bʉnunu bwa Kyala
5 Gwe NTWA, kʉmwanya kukʉfituufya ɨfiswigo fyako,
fyope ɨfipeligwa fya kʉmwanya fikʉbʉpaala ʉbʉsʉʉbɨligwa bwako.
6 Jwani ʉjʉ aliko kʉmwanya, abagiile ʉkʉfwanikɨsigwa nʉ NTWA?
Jwani afwene nʉ NTWA mfipeligwa fya kʉmwanya?
7 Kyala ikʉtiiligwa fiijo ndʉkomaano lwa fipeligwa fya kʉmwanya,
ʉmwene nsisya ʉkʉfikɨnda fyosa ɨfyo.
8 Gwe NTWA, Kyala gwa filʉndɨlo, jwani alɨ na maka bo ʉlwako?
Ʉbʉsʉʉbɨligwa bwako bukʉfika koosa.
9 Ʉgwe kʉlagɨla ʉkʉsambʉka kwa nyanja,
amajɨga lɨnga gikwinʉka, kʉgabotesya.
10 Jo ʉgwe, gwajɨtakeenie loosa ɨnyiifwɨla Lahabu,b
nʉ kʉjɨgoga nɨ kɨboko kyako ɨkya maka.
Gwababaleenie abalʉgʉ baako,
na maka gaako amakʉlʉmba.
11 Ʉmpaalanga gwako, kyope ɨkiisʉ kyako,
ɨkiisʉ na fyosa ɨfi filimo fyako,c
jo ʉgwe gwafipelile.
12 Kʉlʉʉlʉ na kwitongo, gwapelile ʉgwe,
ɨfyamba Taboli na Helimoni,
fikʉjɨpaala ɨngamu jaako nʉ lʉsekelo.
13 Ʉlʉkongi lwako lʉlɨ na maka,
ɨkɨboko kyako kikʉtola fiijo.
14 Ʉbʉlamuli ʉbwa bʉgolofu,
lo lwalo lwa bʉlagɨli bwako,
iipyana nʉ bwanalooli fikʉboneka ndɨ syosa ɨsi kʉbomba.
15 Basajiigwe aba bikʉkʉpaala nʉ lʉsekelo.
Gwe NTWA, bameenye ʉkʉtɨ kʉbakeeta kanunu.
16 Bikʉsekela mu ngamu jaako akabalɨlo koosa,
bikʉsekela ʉbʉgolofu bwako, paapo ʉlɨ nnunu kʉmyabo.
17 Jo ʉgwe bikʉkʉmogela kangɨ ʉlɨ maka gaabo,
kʉ booloolo bwako tukʉkaba ʉbʉtoli.
18 Nalooli, gwe NTWA, ʉnsalile ʉmalafyale gwɨtʉ,
gwe Mwikemo gwa Isilaɨli, ʉmpelile ʉkʉja ngʉlʉ jɨɨtʉ.
Kyala aalɨnndapiile Ndaabɨti ʉbʉnyafyale ʉbwa bwila na bwila
19 Ijolo gwababʉʉlile abandʉ baako abiikemo,
mu njosi gwatile, “Nʉmpeele ʉbʉtʉʉli ʉngaasi,
nʉnsʉngwile ʉkʉfuma mmbandʉ bangʉ,
ʉkʉja malafyale.
20 Nʉmmwagile Ndaabɨti, ʉmbombeli gwangʉ,
nʉmpakile amafuta gangʉ amiikemo.d
21 Ɨkɨboko kyangʉ kikʉjaga nagwe,
nalooli ʉlʉkongi lwangʉ lukʉmpaga amaka.
22 Abalʉgʉ batikʉntolaga,
abaniongafu batikʉntaamyaga.
23 Looli angʉbatakaniaga abalʉgʉ baake nkyeni mmyake,
angʉbapyuta boosa aba bikʉmpɨnga.
24 Iipyana lyangʉ nʉ bwanalooli bwangʉ fikʉjaga nagwe,
mu ngamu jangʉ ikʉtolaga fiijo.
25 Angʉbʉpapo amaka ʉbʉnyafyale bwake,
ʉkwandɨla kʉ nyanja mpaka kʉ lwɨsi.e
26 Aikʉngoolelaga ikʉtɨgɨ,
‘Gwe Taata, gwe Kyala gwangʉ,
gwe lwalabwe, gwe mpoki gwangʉ.’
27 Angʉmpela ʉkʉja mwanangʉ gwa kɨpanda,
aikʉjaga nkʉlʉmba gwa banyafyale boosa pakiisʉ.
28 Iipyana lyangʉ aalikʉjaga nagwe bwila pakiisʉ,
ʉlwitɨkano lwangʉ ʉne nʉ mwene aalukʉjaga lwa bwila na bwila.
29 Ʉlʉjungu lwake aalukʉjangako bwila na bwila,
ʉbʉnyafyale bwake aabukʉjangako bwila bo ʉlwa kʉmwanya.”
30 “Lɨnga abaanaake bikʉsileka ɨndagɨlo syangʉ,
lɨnga batikʉsikonga ɨmanyisyo syangʉ,
31 lɨnga bikʉsifujula ɨndagɨlo syangʉ,
lɨnga batikʉsikola ɨngomeelesyo syangʉ,
32 po angʉbafundaga nɨ ngili, kʉnongwa jaa bʉtʉlanongwa bwabo,
angʉbakomaga kʉnongwa jaa mbiibi syabo,
33 looli andikʉleka ʉkʉmpa iipyana lyangʉ Ndaabɨti,
andikwandʉla ʉlʉfingo lwangʉ kʉmyake.
34 Ʉne andikoomola ʉlwitɨkano lwangʉ,
andikwandʉla iisyʉ nalɨmo ɨlɨ naajobile.
35 Ndapile kamokeene kʉ bwikemo bwangʉ,
po paapo, ngabagɨla ʉkʉjoba ɨsya bʉtʉngʉlʉ kwa Ndaabɨti,
36 ʉkʉtɨ abaa ndʉjungu lwake aabikʉjangako bwila na bwila,
ʉbʉnyafyale bwake aabukʉjangako akabalɨlo koosa, bo ʉlwa isʉba.
37 Aabukʉjangako bwila bo ʉlwa mwesi,
ʉnkeeti ʉngolofu mu mpaalanga.” Sela
Ʉkwilɨlɨɨsya ɨsya kʉtoligwa ʉmalafyale
38 Looli gwe NTWA, ʉntaagile nʉ kʉnkaana,
ʉnkalaliile ʉmalafyale gwako, ʉjʉ gwalɨnsʉngwile.
39 Ʉlʉlekile ʉlwitɨkano lwako nʉ mbombeli gwako,
ʉjɨtaagile ndʉfumbɨ ɨngɨga jaake ɨjaa bʉnyafyale.
40 Ʉgabulutwile amamato gaake goosa,
amalinga gaake ʉgapelile ʉkʉja fisaame.
41 Abenda njɨla boosa bikʉpʉpa ɨkyʉma kyake,
iipelile gwa kʉsekigwa na bapalamani baake.
42 Abalʉgʉ baake ʉbapeele ʉbʉtoli,
ʉbapelile ʉkʉsekela boosa aba bikʉmfwɨma.
43 Ʉlʉʉbo lwake ʉlʉpelile ʉkʉja lʉsʉʉfu,
kangɨ ʉkantʉʉlapo mbwite.
44 Goomwile ʉbʉsisya bwake,
ɨkɨkota kyake ɨkya bʉtwa ʉkɨgwɨsiisye paasi.
45 Ʉnkangeesye bo ntubwa,
ʉnkenyeesiisye. Sela
46 Bʉle, gwe NTWA, kwifisaga bwila na bwila, mpaka ndɨli?
Ɨngalalɨsi syako sikwakaga bo ʉlwa mooto, mpaka ndɨli?
47 Ʉkʉmbʉkege ʉkʉtɨ ʉbʉʉmi bwangʉ bʉpimba,
ʉtʉpelile twe bandʉ ʉkʉjako kʉ bʉʉmi akabalɨlo akapimba!
48 Ʉmundʉ alɨkʉ ikʉjako kʉ bʉʉmi bwila na bwila?
Jwani abagiile ikwipoka kʉ bʉfwe? Sela
49 Gwe Ntwa, lɨlɨ kʉʉgʉ iipyana lyako iitasi,
ɨlɨ gwalapile kʉ bwanalooli kwa Ndaabɨti?
50 Gwe Ntwa, ʉkʉmbʉke,
muno ngʉtʉkɨligwa ne mbombeli gwako,
muno ngwikakɨsya bo bikʉʉnyangalɨla abapanja.
51 Gwe NTWA, keeta muno bikʉndʉkɨla ne nsʉngʉligwa gwako,
bikʉʉnyangalɨla koosa kʉno ngʉbʉʉka.
52 Atuufigwege ɄNTWA, bwila na bwila!
Ameni na Ameni.