Ʉlwipuuto lwa kʉsʉʉma ʉbʉtʉʉli
Ʉlwɨmbo lwa Banya Koola. Kʉ mpaali gwa lwɨmbo. Ʉkʉkongana nʉ lʉbaatɨko ʉlwa Mahalati Lyanoti. Ʉlwɨmbo ʉlwa mahala ʉlwa Hemani Mwesila.
88
Gwe NTWA, Kyala gwe kʉmboka,ngʉkʉkoolela pakɨlo na pamuusi.
2 Gwambɨlɨle ʉlwipuuto lwangʉ,
ʉpɨlɨkɨsye ɨnguuto jangʉ.
3 Ndɨ nʉ bʉtolwe fiijo,
ndɨ kɨfuki ʉkʉfwa.
4 Mfwene bo ʉlwa mundʉ ʉjʉ alɨ pakʉfwa,
bo ʉlwa mundʉ ʉjʉ gamaliike amaka.
5 Ndaagiigwe pamopeene na bandʉ abafwe,
bo ʉlwa mifimba ɨgɨ gɨlɨ mmapʉmba,
abandʉ aba ʉbiibiibwe,
aba balɨ kʉbʉtali nʉ bʉtʉʉli bwako.
6 Ʉndaagile ʉne nkiina ɨkɨsolofu fiijo,
mu ngiisi fiijo, mbwina.
7 Ɨngalalɨsi syako siinyiilɨkiile,
ʉndimbɨkiile na majɨga gaako goosa. Sela
8 Ʉmbaagwile kʉ bamanyaani bangʉ,
ʉmbelile ʉkʉbengigwa nabo,
mbinyiigwe, ngabagɨla ʉkʉjonga.
9 Amaaso gangʉ gapʉʉpeele, kʉnongwa jaa kʉlɨla.
Gwe NTWA, ngʉkʉkoolela kʉkʉtɨ isikʉ,
ngʉkwinʉlɨla amaboko gangʉ.
10 Bʉle, abafwe kʉbabombela ɨfiswigo?
Bʉle, abasyʉka bikʉsyʉka nʉ kʉkʉtuufya? Sela
11 Bʉle, iipyana lyako likʉfumusigwa mwi ipʉmba?
Pamo ʉbwanalooli bwako, pabʉjo ʉbwa loonangɨko?
12 Bʉle, ɨfiika fyako fikʉboneka mu ngiisi?
Pamo ʉbʉgolofu bwako bukʉboneka nkiisʉ kya aba batikʉkʉmbʉkigwa?
13 Looli ʉne ngʉkʉkoolela, gwe NTWA,
kʉkʉtɨ lʉbʉnjʉ ngwipuuta kʉmyako.
14 Gwe NTWA, fiki gʉndaagile?
Fiki ʉtikʉngeeta?
15 Ʉkʉfuma mbʉtubwa ngʉbiilwe fiijo,
ndɨ kɨfuki nʉ kʉfwa.
Mfundiigwe fiijo,
noonywike amaka.
16 Ʉbʉkalale bwako bʉʉnyiibiisye paasi, bo ʉlwa mweleesyo,
ɨsya kʉtiilɨsya ɨsi kʉʉmbombela, sikʉmbyuta.
17 Siisyʉngʉʉtiile bo ʉlwa mɨɨsi, pakɨlo na pamuusi,
siisyʉngʉʉtiile ɨfibafu fyosa.
18 Ʉbapelile abamanyaani na bakʉndwe bangʉ ʉkʉʉsambʉkɨla,
ʉmwinangʉ mwene, jo ngiisi.