Ʉlwɨmbo lwa kʉntuufya Kyala
Ʉlwɨmbo lwa pi isikʉ ɨlya pa Sabati.
92
Gwe NTWA, kʉnunu ʉkʉgwa ʉlʉpi kʉmyako,nʉ kʉkwɨmbɨla ɨsya kʉjɨpaala ɨngamu jaako,
ʉgwe gwe Kyala ʉNkʉlʉmba.
2 Kʉnunu ʉkʉlɨfumusya iipyana lyako nʉlʉbʉnjʉ,
nʉ bʉsʉʉbɨligwa bwako pakɨlo,
3 nɨ kya mbote kalongo, nɨ kɨsango,
na koogo akanunu akaa ipango.
4 Gwe NTWA, ɨmbombo syako siihobwisye,
angwɨmbaga nʉ lʉsekelo kʉ mbombo ɨsi ʉbombile.
5 Gwe NTWA, ɨmbombo syako ngʉlʉmba fiijo,
ɨnyiinogono syako sya mbʉsolofu fiijo!
6 Ʉmundʉ ʉnkonyofu akabagɨla ʉkʉsimanya,
ʉnsita mahala akabagɨla ʉkʉsyagania ɨsi.
7 Abatʉlanongwa na apa bikʉtʉlʉla ngatɨ liisʉ,
na apa ababomba mbiibi bikʉnoga,
poope baa kʉpyutigwa bwila na bwila.
8 Looli ʉgwe gwe NTWA,
ʉlɨ nkʉlʉmba bwila na bwila.
9 Namanga abalʉgʉ baako, gwe NTWA,
nalooli abalʉgʉ baako abo bikwisa kʉpyutigwa,
boosa ababiibi bikwisa kʉbalanila.
10 Looli ʉmbeele amaka bo ʉlwa mbogo,
ʉmbakile amafuta amanunu.
11 Ngeetile na maaso gangʉ,
mbabwene abalʉgʉ bangʉ bikʉtoligwa.
Mbɨliike nɨ mbʉlʉkʉtʉ syangʉ,
mbɨliike ɨnguuto jaa balʉgʉ bangʉ.
12 Abagolofu bikʉnogaga bo ʉlwa tʉgɨndwa,
bikʉkʉlaga bo ʉlwa mipiki ɨmikafu ɨgya mu Lebanoni.
13 Bo ʉlwa mipiki ɨgɨ gɨbyaliigwe ndʉpaso ʉlwa NTWA,
bikwisa kʉbɨlaga mu nyumba jaa Kyala gwɨtʉ.
14 Bikwendelelaga ʉkʉpa ɨseke mpaka mbʉkangale,
bikwisa kʉja na maka, bo ʉlwa mipiki ɨmibɨsi.
15 Bikwisa kʉfumusya ʉkʉtɨ, “ɄNTWA ngolofu,
jo lwalabwe lwangʉ,
nkatɨ mmyake bʉkajamo ʉbʉbiibi nabʉmo.”