Ʉkʉsʉʉma ʉkʉtɨ abalʉgʉ baa Isilaɨli, batoligwege
Ʉlwɨmbo ʉlwa Asafu.
83
Gwe Kyala, ʉlɨngajaga kɨmyemye,ʉlɨngabatamaga.
Ʉlɨngajaga jonjolo, gwe Kyala.
2 Namanga abalʉgʉ baako bikoobela,
aba bakʉbengile bikwitendekesya ʉkʉkʉsambʉkɨla.
3 Bikʉbaatɨka kʉ bʉkomu,
ɨsya kʉboonanga abandʉ baako.
Bikʉbaatɨka ʉkʉbabombela ɨmbiibi,
abandʉ aba kʉbalɨndɨlɨla.
4 Abo bikʉtɨ, “Isaga, tʉkɨpyute loosa ɨkɨkolo kyabo,
ʉkʉtɨ ɨngamu jaa Isilaɨli, jɨlɨngakʉmbʉkigwangamo sikʉ.”
5 Namanga bikwitɨkana, balɨ ndumbula jɨmojeene,
bikʉfinga ʉkʉlwa na nungwe,
6 abandʉ baa mu Etomu na Baisimaɨli,
aBamoabu na Bahagali,
7 abandʉ baa mu Gebali, Amoni na Amaleki,
na Bafilisiti na baa nkaaja kaa Tili.
8 Boope abaa mu Asilija biijongeenie nabo,
bikʉbatʉʉla abaa ndʉjungu lwa Looti.a Sela
9 Ʉbombe bo ʉlʉ gwababombiile aBamityani,b
Sisela na Jabini pa lwɨsi Kisyoni,c
10 aba gwabapyutile mu Endoli,
ɨmifimba gyabo gɨlɨnkʉja ndope pakiisʉ.
11 Ʉbabombele abalongosi baabo,
bo ʉlʉ gwababombiile baa Olebu na Seebu,d
na balongosi baabo boosa, bo ʉlwa Seba na Salimuna,e
12 aba baatile, “Isaga, twege ɨkiisʉ kya Kyala,
ʉkʉtɨ kɨjege kyɨtʉ.”
13 Gwe Kyala, ʉbabululusye bo ʉlwa lʉfumbɨ,
bo ʉlwa mikʉkʉʉjɨlo nkyeni mu mbelo.
14 Bo ʉlwa mooto ʉgʉ gukʉkosya iitengele,
bo ʉlwa ndapɨ sya mooto ɨsi sikwasya ʉmooto mfyamba,
15 ʉbakage na kafulafumbɨ,
ʉbatiilɨsye nʉ mbelo gwako ʉnkalɨ.
16 Ʉbasʉʉsye ʉkʉtɨ,
bagɨɨmɨkege amaka gaako, gwe NTWA.
17 Bafujuligwege nʉ kʉsulumania bwila na bwila,
bafwege ʉbʉbwa,
18 bamanye ʉkʉtɨ, ʉgwe gwe ɨngamu jaako gwe NTWA,
gwimwene gwe Kyala ʉNkʉlʉmba pakiisʉ.