Kyala jo ndagɨli ʉnkʉlʉmba
Ʉlwɨmbo ʉlwa Asafu.
82
Kyala atʉʉgeele kʉmwanya, alɨ pa lʉkomaano,ikʉgɨlonga gyabaakyala.a
2 Ikʉtɨ, “Mpaka ndɨli, mukʉlongaga ɨnongwa kʉ bʉniongafu?
Mpaka ndɨli, mukʉbatʉʉlaga ababiibi? Sela
3 Mubalwɨlege abalondo na bapɨɨna,
mubabombelege ɨsya bʉgolofu abafweje, na aba bikʉboneligwa.
4 Mubapokege aboonywa na balondo,
mubaabʉlege mmaboko gaa bandʉ ababiibi.
5 Looli ʉmwe mukasimanya nasimo, kangɨ mukasyagania,
mukwenda nkatɨ mu ngiisi,
fyobeene ɨnyaalo syosa ɨsya nkiisʉ sikʉjʉngaanika.
6 Naajobile naatile, ‘Po ʉmwe, mwe gyabaakyala,
mwesa mulɨ baana baa Kyala ʉNkʉlʉmba!’b
7 Looli aamukʉfwaga bo ʉlwa bandʉ boosa,
mukʉgwaga bo ʉlwa balongosi boosa.”
8 Gwe Kyala, gwɨme, ʉkɨlonge ɨkiisʉ,
namanga ɨfikolo fyosa fyako jʉjʉʉgwe.