Ʉlwɨmbo ʉlwa pa kyaka
Kʉ mpaali gwa lwɨmbo. Ʉkʉkongana nʉ lʉbaatɨko ʉlwa Gititi.a Ʉlwɨmbo ʉlwa Asafu.
81
Mummwɨmbɨle Kyala nʉ lʉsekelo, jo maka gɨɨtʉ,mumpaalege nʉ lʉsekelo Kyala gwa Jaakobo.
2 Mupaalege ʉlwɨmbo, mukʉbege ɨpelekete,
mukʉbege amapango kanunu, nɨ fisango.
3 Mukʉbege ɨngangabwite, bo ʉmwesi gʉsomwike,
kangɨ bo ʉmwesi gʉkomile, isikʉ lya kyaka kyɨtʉ.
4 Paapo ʉlʉ lo lʉkomeelesyo kʉ Banyaisilaɨli,
lʉlagɨlo lwa Kyala gwa Jaakobo.
5 Aabapeele abaa ndʉjungu lwa Joosefu,
bo akɨkomile ɨkiisʉ ɨkya Misili.
Iisyʉ lya Kyala ɨlya kʉsoka
Ndɨnkʉlɨpɨlɨka iisyʉ ɨlɨ ngalɨmanya likʉtɨ,
6 “Naasoosiisyepo ɨfitwalo pa fibeja fyɨnu,
naagaabwile amaboko gɨɨnu,
gatikʉpɨmbaga amapamba amasito.
7 Bo mulɨ mbʉtolwe, mwalɨngooliile,
naabapokile, naabaamwile,
bo ndɨ mmabɨngo agaa njasi.
Naabagelile pa mɨɨsi, mu Meliba.b Sela
8 Mwe bandʉ bangʉ, mumbɨlɨkɨsye bo ngʉbasoka,
mwe Banyaisilaɨli, ngʉlonda mumbɨlɨkɨsye.
9 Mulɨngajaga na lyakyala nkiisʉ kyɨnu,
mulɨngiipuutaga kwa lyakyala.
10 Ʉne ndɨ NTWA, ne Kyala gwɨnu,
ne naabasoosiisyemo nkiisʉ ɨkya Misili.
Namuusʉʉme ɨfi mukʉlonda, ngʉbiisʉkɨsyaga.
11 Looli abandʉ bangʉ balɨnkʉsita kʉmbɨlɨkɨsya,
aBanyaisilaɨli bakaanyɨɨmɨkaga ʉne.
12 Ndɨnkʉbaleka nɨ ndumbula syabo ɨngafu,
babombege ɨsi biiganile.
13 Lɨnga abandʉ bangʉ baalɨmbɨliike,
lɨnga aBanyaisilaɨli baakongile ɨnjɨla syangʉ,
14 ngalɨ mbatolile abalʉgʉ baabo nakalɨnga,
ngalɨ mbakomile abalʉgʉ baabo nɨ kɨboko kyangʉ.
15 Aba bammbengile ɄNTWA ngalɨ bikʉbunguluka nkyeni mmyake,
ʉlʉfundo lwabo lukʉjako bwila na bwila.
16 Looli ʉmwe ngalɨ ngʉbaswɨla ɨfindʉ ɨfinunu,
ngalɨ ngʉbiikʉtɨsya nʉ lʉʉki ʉlʉnunu.”