Ʉkʉsʉʉma Kyala abagomokesye amaka abandʉ baake
Kʉ mpaali gwa lwɨmbo. Ʉkʉkongana nʉ lwɨmbo ʉlʉ bikʉtɨ, Amajɨbɨjɨbɨ nʉ Lwitɨkano. Ʉlwɨmbo ʉlwa Asafu.
80
Gwe Ntiimi gwa Isilaɨli, tʉpɨlɨkɨsye ʉswe,ʉgwe gwe kʉnndongosya Joosefu bo ʉlwa ntiimo.
Ʉlangalege, ʉgwe gwe ʉtʉʉgeele pamwanya pa baakelubu.a
2 Nkyeni mwa Efulaimu, Benjamini na Manase,
ʉnangɨsye amaka gaako, gwise kʉkʉtʉpoka.
3 Gwe Kyala, ʉtʉgomokesye amaka,
ʉtʉkeete kʉ kɨsa kyako, ʉkʉtɨ tʉpokigwe.
4 Gwe NTWA, Kyala gwa filʉndɨlo,
kʉsikalalɨlaga ɨnyiipuuto sya bandʉ baako, mpaka ndɨli?
5 Ʉpelile amaasosi ʉkʉja findʉ fyɨtʉ,
ʉtʉnwesiisye amaasosi aga giiswile mu ngumbe.
6 Ʉbapelile abapalamani ʉkʉlwɨlanila ɨkiisʉ kyɨtʉ,
abalʉgʉ bɨɨtʉ bikʉtʉseka.
7 Gwe Kyala gwa filʉndɨlo, ʉtʉgomokesye amaka,
ʉtʉkeete kʉ kɨsa kyako ʉkʉtɨ tʉpokigwe.
8 Gwabapaapwile mu Misili abiisʉkʉlʉ bɨɨtʉ,
bo ʉlwa mpiki gwa maafiilʉ.
Gwafikagile ɨfikolo ɨfi fyalimo,
ʉlɨnkʉgʉbyala nkiisʉ ɨkɨ.
9 Gwatendekiisye ʉbʉjo bwa kʉmelamo,
ɨmisi gyamelile, ɨmipiki gyajeelile nkiisʉ.
10 Ɨfyamba fikupɨkɨliigwe nɨ kɨpepo kyake,
ɨsamba syake, ndali ʉkʉkɨnda ɨmipiki ɨmitali.
11 Ɨsamba syake sijile kʉfika kʉ nyanja Menditelenijani,
ʉtʉsamba ʉtʉ tukʉmela, tʉfikile kʉ lwɨsi Fulati.
12 Gwe NTWA, fiki ʉpangwile ʉlʉpaso?
Abenda njɨla babagiile ʉkʉtʉngʉla ɨseke sya maafiilʉ.
13 Ɨngʉlʉbe ɨsya ndiisʉ sikoonanga,
fyope ɨfinyamaana ɨfya ndiisʉ fikʉlya.
14 Gwe Kyala gwa filʉndɨlo, tukʉkʉsʉʉma gwise,
ʉkeete ʉkʉfuma kʉmwanya,
ʉgʉpoke ʉmpiki ʉgʉ, jo ʉswe twe bandʉ baako.
15 Gwise ʉbapoke abandʉ aba gwababɨɨkile apa,
ʉkɨpelile ɨkiisʉ kyabo ʉkʉja kya maka.
16 Abalʉgʉ bagʉtumwile ʉmpiki gwako ʉgwa maafiilʉ,
bagʉkosiisye mmooto,
ʉnangɨsye ɨngalalɨsi syako, ʉbapyute.
17 Ʉmpe amaka ʉmundʉ ʉjʉ gʉnnganile,
ʉmwana ʉjʉ gʉnsʉngwile.
18 Po tʉtikwisa kʉkʉlekamo sikʉ,
ʉtʉpe ʉbʉʉmi ʉbʉpya, tukʉkwipuutaga.
19 Gwe NTWA, Kyala gwa filʉndɨlo, ʉtʉgomokesye amaka,
ʉtʉkeete kʉ kɨsa kyako ʉkʉtɨ tʉpokigwe.