Ʉkʉnyonywa ɨnyumba jaa Kyala
Kʉ mpaali gwa lwɨmbo. Ʉkʉkongana nʉ lʉbaatɨko ʉlwa Gititi.a Ʉlwɨmbo ʉlwa Banya Koola.
84
Bo bʉnunu bʉki, pabʉjo bwako ʉbwikemo,gwe NTWA gwa filʉndɨlo!
2 Ngʉsyʉkwa fiijo ʉkʉjamo mu nyumba jaa NTWA.
Ɨndumbula nʉ mbɨlɨ gwangʉ goosa,
ngʉmpaalaga Kyala ʉmʉʉmi nʉ lʉsekelo.
3 Boope baatʉndʉlʉ babwagile ʉbʉjo,
nɨ mbelebeeswa sitengile ɨfifufumbwa.
Sikʉʉbatɨla abaanaabo, kɨfuki nɨ kɨgemo kyako,
gwe NTWA gwa filʉndɨlo, gwe Malafyale gwangʉ, gwe Kyala gwangʉ.
4 Basajiigwe aba bikwitʉʉgala mu nyumba jaako,
bwila bikʉkʉpaala ʉgwe. Sela
5 Basajiigwe aba bikʉkaba amaka kʉmyako,
aba bikʉnyonywa ʉkʉbʉʉka kʉkʉkwipuuta ʉgwe, kʉ kyamba Syoni.
6 Bo bikʉtumusania ndʉsooko lwa Baka,
Kyala ikʉbapelela ɨnyiibʉko sya mɨɨsi,
nɨ fula jaa mpɨngo jikʉlwisʉsya na mɨɨsi.
7 Bo bikwenda, bikongelapo ʉkʉkaba amaka,
mpaka bammbone Kyala pa kyamba Syoni.
8 Gwe NTWA, Kyala gwa filʉndɨlo, ʉpɨlɨke ʉlwipuuto lwangʉ.
Kyala gwa Jaakobo, ʉmbɨlɨkɨsye. Sela
9 Gwe Kyala, ʉnsaje ʉmalafyale gwɨtʉ, ngʉlʉ jɨɨtʉ,
ʉjege ni ipyana kʉ mpakigwa mafuta gwako.
10 Ʉkʉtʉʉgala mu nyumba jaako iisikʉ lɨmo,
kʉnunu fiijo ʉkʉkɨnda amasikʉ elʉfu jʉmo kʉbʉngɨ.
Kʉnunu kʉmyangʉ ʉkʉja ndɨndɨlɨli,
gwa pa kɨpata ɨkya mu nyumba jaa Kyala gwangʉ,
ʉkʉkɨnda ʉkʉtʉʉgala mu nyumba sya batʉlanongwa.
11 Namanga ɄNTWA Kyala ikʉtʉmulɨkɨla, jo ngʉlʉ ɨngafu fiijo,
ɄNTWA ikʉtʉpaasya nʉ kʉtwɨmɨka.
Atikʉbiimaga akanunu nakamo,
aba bakaja na kababye nakamo.
12 Gwe NTWA gwa filʉndɨlo,
basajiigwe aba bikʉkʉsʉʉbɨla ʉgwe!