Kyala na bandʉ baake
Ʉlwɨmbo ʉlwa mahala ʉlwa Asafu.
78
Mwe bandʉ bangʉ,mupɨlɨkɨsye ɨmanyisyo syangʉ.
Mutege ɨmbʉlʉkʉtʉ syɨnu,
kʉ masyʉ aga ngʉjoba.
2 Angʉjobaga na nuumwe mfifwanikɨsyo,
angʉbabʉʉlaga ɨsi sifisiigwe ɨsya ijolo,a
3 ɨsi twapɨliike nʉ kʉsimanya,
ɨsi baataata baatʉmanyiisye.
4 Tʉtikʉbafisaga ɨnongwa ɨsi abaanɨɨtʉ,
boope abaa mu sopelo ɨjɨ jikwisaga tukʉbabʉʉlaga,
ɨmbombo ɨsya NTWA ɨsya kʉtuufigwa,
amaka gaake nɨ fiswigo fyake.
5 Aabaningile ɨngomeelesyo abaa ndʉjungu lwa Jaakobo,
aalɨmpeele ɨndagɨlo Isilaɨli.
Aabalagiile abiisʉkʉlʉ bɨɨtʉ,
ʉkʉbamanyisya abaanaabo,
6 ʉkʉtɨ abandʉ abaa mu sopelo ɨjɨ jikwisa basimanye,
boope abaanaabo aba bakaalɨ ʉkʉpaapigwa,
biise bafumusyege kʉ baanaabo.b
7 Po bansʉʉbɨlege Kyala,
balɨngiibwa ɨsi aabombile Kyala,
looli basikolege ɨndagɨlo syake,
8 balɨngiisa kʉja bo ʉlwa biisʉkʉlʉ baabo,
abaa mu sopelo ɨjaa matingo nʉ kʉsambʉka,
aba ɨndumbula syabo sikaaliitotiike napamo,
bakaalɨmmwitiike Kyala.c
9 Abalwabwite mu Efulaimu bakaalɨ bo ʉlo.
Na paapo baalɨ nɨ filwɨlo fingi,
baabopile kʉ balʉgʉ baabo, pi isikʉ lya bwite.
10 Bakaalʉkolile ʉlwitɨkano ʉlʉ baafingile na Kyala,
baakaanile ʉkʉkonga ɨndagɨlo syake.
11 Baaliibiibwe ɨsi aabombile,
baaliibiibwe ɨfiika ɨfi aabanangiisye.
Ɨmbombo sya Kyala ndʉngalangala
12 Kyala aabombile ɨsya fiswigo nkyeni mbiisʉkʉlʉ baabo,
mu ntebeela ʉgwa Soani, nkiisʉ ɨkya Misili.
13 Aajɨjabeenie ɨnyanja, alɨnkʉbalobosya,
aagɨɨmiike amɨɨsi bo ʉlwa mamato.d
14 Pamuusi aabalongosyaga ni ibɨngo,
pakɨlo aabalongosyaga nʉ lʉmuli lwa mooto.e
15 Alɨnkʉsibalʉla ɨnyaalabwe ndʉngalangala,
silɨnkʉsoosya amɨɨsi agaa kʉnwa,
gaalɨ mingi ngatɨ gaa mu nyanja.f
16 Alɨnkʉpela ɨnyiibʉko sya miisi ʉkʉfuma ndwalabwe,
amɨɨsi galɨnkʉsooka bo ʉlwa nyɨɨsi.
17 Poope balɨnkwendelela ʉkʉmmbombela Kyala ɨmbiibi,
balɨnkʉnsambʉkɨla ndʉngalangala ʉNkʉlʉmba.
18 Kʉ matingo gaabo balɨnkʉnngela Kyala,
ʉkʉtɨ abapege ɨfindʉ fyosa ɨfi baanyonywaga ʉkʉlya.g
19 Balɨnkʉmmwilaamwa Kyala, balɨnkʉtɨ,
“Bʉle, Kyala abagiile ʉkʉtʉpa ɨfindʉ ndʉngalangala?
20 Nalooli aakomile ʉlwalabwe,
amɨɨsi galɨnkwibʉka, ɨnyɨɨsi silɨnkʉteeka.
Bʉle, abagiile ʉkʉtʉpa fyope nɨ findʉ?
Abagiile ʉkʉtʉpa joope ɨnyama twe bandʉ baake?”
21 ɄNTWA bo apɨliike, alɨnkʉkalala fiijo,
ʉmooto gʉlɨnkʉbaakɨla abaa ndʉjungu lwa Jaakobo.
Ɨngalalɨsi syake silɨnkʉbiinʉkɨla aBanyaisilaɨli.
22 Namanga bakaalɨmmwitiike Kyala,
kangɨ bakansʉʉbɨlaga Kyala ʉkʉtɨ abagiile ʉkʉbapoka.
23 Looli ɄNTWA aagalagiile amabingo gaa kʉmwanya,
gaaliigwike bo ʉlwa lwigi.
24 Alɨnkʉbasatʉkɨsya ɨmanah ʉkʉtɨ balyege,
alɨnkʉbapa ɨfindʉ ɨfya kʉfuma kʉmwanya.i
25 Abandʉ balɨnkʉlya ɨfindʉ ɨfi bikʉlya abandʉmi,
alɨnkʉbapa ɨfya kʉbafwana.
26 Alɨnkʉgʉpela ʉmbelo ʉgwa kʉ bʉsookelo ʉkʉkula,
kʉ maka gaa Kyala ʉmbelo gwa kwitongo gʉlɨnkʉkula.
27 Alɨnkʉbasatʉkɨsya ɨnyama ɨnyingi, bo ʉlwa lʉfumbɨ,
ɨsya njʉni ɨnyingi, bo ʉlwa nsanga ʉgwa mu nyanja.
28 Alɨnkʉsisatʉsya pakatɨ pabʉjo bwabo,
silɨnkʉsyʉngʉʉtɨla amasasa gaabo.
29 Balɨnkʉlya nʉ kwikʉta fiijo,
aabapeele ɨfi baafilondaga.
30 Looli bo bakaalɨ nʉ kʉmala ʉkʉlya ɨfi baalondaga,
ɨfindʉ bo fikaalɨ filɨ nkanwa mmyabo,
31 Kyala alɨnkʉbakalalɨla fiijo,
alɨnkʉbagoga bamo abaa maka,
alɨnkʉbagoga na balʉmyana abingi aBanyaisilaɨli.j
32 Poope balɨnkwendelela ʉkʉbomba ɨmbiibi,
na paapo baafibwene ɨfiika fya Kyala, bakaaliitiike.
33 Po alɨnkʉbʉpimbʉla ʉbʉʉmi bwabo,
ɨfyɨnja fya bʉʉmi bwabo filɨnkʉja fya bʉtolwe.
34 Kyala bo ikʉbagogapo bamo,
aba baasyalaga balɨnkʉnndonda,
balɨnkʉnngomokela Kyala nɨ ndumbula joosa.
35 Balɨnkʉkʉmbʉka ʉkʉtɨ Kyala jo lwalabwe lwabo,
kangɨ ʉkʉtɨ Kyala ʉNkʉlʉmba jo ʉjʉ aabaabwile.
36 Looli bansyobaga nɨ milomo gyabo,
syosa syalɨ sya bʉtʉngʉlʉ ɨsi bammbʉʉlaga.
37 Ɨndumbula syabo sikaaliitotiike napamo,
bakaalwɨmɨkaga ʉlwitɨkano lwake.
38 Looli ʉmwene, paapo alɨ nɨ kɨsa,
aabaswile ʉbʉtʉlanongwa bwabo, akaabapyutile.
Kaa kingi aasigomolaga ɨngalalɨsi syake,
akaakɨɨsyaga ʉkʉkalala.
39 Aameenye ʉkʉtɨ abeene bandʉ itolo, aba bikʉfwa,
balɨ bo ʉlwa mbelo ʉgʉ gukʉkɨnda, gʉtikʉgomoka.
40 Kaa kingi bansambʉkɨlaga Kyala,
nʉ kʉntwalɨla ʉbʉsulumanie,
bo balɨ ndʉngalangala.
41 Balɨnkʉnngela Kyala kabɨlɨ kabɨlɨ,
balɨnkʉnkalasya ʉMwikemo gwa Isilaɨli.
Ɨmbombo sya Kyala mu Misili
42 Bakaakʉmbʉkaga amaka gaake amakʉlʉmba,
ni isikʉ ɨlɨ aabapokile kʉ balʉgʉ baabo.
43 Bakaakʉmbʉkaga ɨfiika ɨfi aabombile mu Misili,
nɨ fiswigo ɨfya mu ntebeela ʉgwa Soani.k
44 Aalʉsanwisye ʉlwɨsi lwabo Naili, lʉlɨnkʉja ilopa,
aBamisili baatoliigwe ʉkʉnwa amɨɨsi gaabo.
45 Aabatʉmiile ɨfilʉndɨlo fya mbwele, silɨnkʉbataamya.
Aatʉmile ɨfyʉla, filɨnkoonanga ɨkiisʉ kyabo.
46 Aatʉmile amapalaalɨla, galɨnkʉlya ɨfi fimelile,
nʉ kʉlya ɨfindʉ fyabo mmigʉnda.
47 Aagyonangile ɨmipiki gyabo nɨ fula jaa mabwe,
ɨmikʉjʉ gyabo, nɨ fula ɨjaa ngaala.
48 Aasigogile ɨngʼombe syabo nɨ fula jaa mabwe,
ɨmitiimo gyabo nɨ njasi.
49 Ndyojo na mbʉkalale bwake ʉbwa kʉtiilɨsya,
aabatʉmiile ʉbʉtolwe nʉ kʉtaamigwa,
nɨ kɨlʉndɨlo kya bandʉmi aboonangi.
50 Akaasisigiile ɨngalalɨsi syake,
ʉkʉtɨ balɨngapona ʉbʉfwe,
looli aabagogile nɨ mbʉngo ɨngalɨ.
51 Aabagogile boosa abaana baa kɨpanda,
amaka agaa kwanda agaa bʉnyambala mu Misili.
52 Po alɨnkʉbasoosya mu Misili abandʉ baake bo ʉlwa ngʼoosi,
alɨnkʉbalongosya bo ʉlwa ngʼoosi ndʉngalangala.
53 Alɨnkʉbalongosya kanunu, bakaalɨ nʉ lʉtende,
looli ɨnyanja jɨlɨnkʉbakupɨkɨla abalʉgʉ baabo.
54 Aabatwele kʉ mpaka gwa kiisʉ kyake ɨkiikemo,
ɨkiisʉ ɨkya fyamba, ɨkɨ aakɨkabile jʉʉjo.
55 Alɨnkʉfikaga ɨfikolo ɨfi fyalɨ nkyeni mmyabo,
alɨnkʉbajabɨla ɨkiisʉ, ɨfikolo fyosa ɨfya Banyaisilaɨli,
ɨnyumba sya bandʉ bala alɨnkʉbapapo.
56 Looli balɨnkʉnngela Kyala,
nʉ kʉnsambʉkɨla ʉNkʉlʉmba,
bakaasikongaga ɨndagɨlo syake.
57 Baalekile ʉkʉntiila bo ʉlwa biisʉkʉlʉ baabo,
bakaasʉʉbɨligwaga, bo ʉlwa bʉpɨnde ʉbʉ bʉniongeele.
58 Balɨnkʉnkalasya Kyala ʉkwipuuta kwa gyabaakyala,
balɨnkʉmpela Kyala ʉkʉja nʉ bʉsulumanie fiijo.
59 Kyala bo apɨliike, alɨnkwisʉla ɨngalalɨsi,
alɨnkʉbakaana loosa aBanyaisilaɨli.
60 Alɨnkʉbʉleka ʉbʉjo bwake ʉbwa paa Silo,
ɨheema ɨjɨ aatʉʉgasyangamo pakatɨ pa bandʉ.
61 Alɨnkʉbiitɨkɨsya abalʉgʉ bɨɨtʉ ʉkwega ɨliibokosi ɨliikemo,
ɨlɨ lyalɨ kɨmanyilo kya bʉsisya bwake.
62 Alɨnkʉbaleka abandʉ baake ʉkʉtɨ babooligwe nʉ lʉʉbo,
aabakalaliile abasʉngʉligwa baake.
63 Abalʉmyana baagogiigwe mbwite,
abalɨndwana bakaalɨ nagwe najʉmo ʉgwa kʉbeega.
64 Abapuuti baabo baapyutiigwe nʉ lʉʉbo,
abakasi baabo baatoliigwe ʉkʉlɨla ɨfwa.
Kyala ikʉnsala Ndaabɨti ʉkʉja malafyale
65 Kʉ bʉʉbo ʉNtwa alɨnkʉfwana,
bo ʉlwa mundʉ ʉjʉ alembwike ntʉlo,
alɨnkʉfwana bo ʉlwa mundʉ ʉngaasi,
ʉjʉ ikʉjwega bo anwile ʉbwalwa.
66 Alɨnkʉbakoma abalʉgʉ baake,
alɨnkʉbagomokesya kʉnyuma,
balɨnkʉsʉʉka loosa.
67 Po alɨnkʉbakaana abaa ndʉjungu ʉlwa Joosefu,
ɨkɨkolo ɨkya Efulaimu akaakɨsalile.
68 Looli alɨnkʉkɨsala ɨkɨkolo kya Juuta,
ɨkyamba Syoni ɨkɨ akɨganile.
69 Alɨnkʉjenga ɨtempeli jaake bo ʉlwa fyamba,
ɨjaa kʉjako bwila bo ʉlwa kiisʉ.
70 Alɨnkʉnsala Ndaabɨti ʉmbombeli gwake,
alɨnkʉmmwega ʉkʉfuma mmatembe gaa ngʼoosi.
71 Aalɨnsoosiisyemo muno aatiimaga ɨngʼoosi,
alɨnkʉmmbɨɨka ʉkʉbatiima abaa ndʉjungu ʉlwa Jaakobo,
Isilaɨli, abasʉngʉligwa baake Kyala.
72 Ndaabɨti alɨnkʉbatiima abandʉ kʉ bʉgolofu,
alɨnkʉbalongosya na mahala gaake goosa.