Ʉlʉsʉʉbɨsyo pakabalɨlo akaa bʉtolwe
Kʉ mpaali gwa lwɨmbo. Kwa Jendutuni. Ʉlwɨmbo ʉlwa Asafu.
77
Naalɨnkooliile Kyala ʉkʉtɨ andʉʉle,naalaatile ʉkʉnkoolela Kyala ʉkʉtɨ apɨlɨke.
2 Bo ndɨ mbʉtolwe, naalɨnndondile ʉNtwa,
pakɨlo naagolwisye amaboko kɨsita kʉkatala,
fikaalipo nafimo ɨfya kʉʉsʉʉbɨsya.
3 Naalɨmmwinogwine Kyala, naalɨlile.
Naaliinogwine, amaka gaalɨɨmalɨkiile. Sela
4 Gwalɨɨnyiimile ʉtʉlo ɨkɨlo kyosa,
naataamiigwe, naatoliigwe nʉ kʉjoba.
5 Naaliinogwine ɨnongwa ɨsya mmasikʉ aga gaakɨndile,
ɨsya fyɨnja ɨfya ijolo.
6 Naakʉmbwike ɨnyɨmbo ɨsi nɨmbaga pakɨlo,
naaliinogwine mu ndumbula jangʉ, nʉ kwilaalʉʉsya,
7 “Bʉle, ʉNtwa ikʉtʉtaaga bwila na bwila?
Atikʉtʉpaakɨsya ʉswe loosa?
8 Bʉle, iipyana lyake lɨmaliike syepwa?
Bʉle, ɨsi aafingile atikwisa kʉsibomba?
9 Bʉle, Kyala iibiibwe ɨkɨsa kyake?
Bʉle, ɨngalalɨsi syake syomwile ʉbooloolo bwake?” Sela
10 Po ndɨnkʉtɨ, “Ɨsi sikʉʉfulasya fiijo,
Kyala ʉNkʉlʉmba andwike, atikʉtʉtʉʉla!
11 Gwe NTWA, ngʉsikʉmbʉkaga ɨmbombo syako.
Eena, ngʉfikʉmbʉkaga ɨfiswigo fyako ɨfya ijolo.
12 Ngʉsiinogonaga ɨmbombo syako syosa,
ɨmbombo syako ɨngʉlʉmba ngʉsiinogonaga.”
13 Gwe Kyala, syosa ɨsi kʉbomba nyiikemo,
akajako ʉnkʉlʉmba bo ʉlwako.
14 Gwe Kyala, jo ʉgwe kʉbomba ɨfiswigo,
ʉnangiisye amaka gaako kʉ fikolo fyosa.
15 Gwabaabwile abandʉ baako na maka gaako,
abaa ndʉjungu lwa Jaakobo na Joosefu. Sela
16 Gwe Kyala, amɨɨsi gaakʉbwene,
amɨɨsi gaakʉbwene, gaakʉbopile,
pa nyanja pa bʉsolofu paatetiime.
17 Ɨfula jɨlɨnkooneka ʉkʉfuma mmabɨngo,
ɨnjasi jɨlɨnkʉtajanika kʉmwanya,
ɨfimulimuli filɨnkʉmulɨka koosakoosa.
18 Ɨliisyʉ ɨlya njasi jaako lyapɨlɨkigwaga nkafulafumbɨ.
Ɨfimweku fya njasi filɨnkʉpamulɨka pakiisʉ poosa,
pakiisʉ palɨnkʉtetema nʉ kʉsenyendeka.
19 Ɨnjɨla jaako jaalyendile mu nyanja,
jaalyendile pa mɨɨsi amingi fiijo,
looli amakato gaako gakaaboniike.
20 Gwabalongwisye abandʉ baako bo ʉlwa ntiimo gwa ngʼoosi,
akabalɨlo aka Moose na Aaloni baabalongwisye.