Kyala ntoli
Kʉ mpaali gwa lwɨmbo. Ʉlwɨmbo ʉlwa Asafu ʉlwa kwɨmbɨla ɨfyombo fya mbote.
76
Abandʉ abaa mu Juuta bammeenye Kyala,mu Isilaɨli ɨngamu jaake ngʉlʉmba fiijo.
2 Ʉbʉjo bwake bʉlɨ mu Salemu,a
akaaja kaake kalɨ pa kyamba Syoni.
3 Ʉko ko kʉno aakonyoleenie ɨmitipʉlo ɨgya balʉgʉ,
ɨngʉlʉ, ɨnyʉʉbo, nɨ filwɨlo ɨfingi ɨfya bwite. Sela
4 Gwe Kyala, gwe mwɨmɨkigwa fiijo,
ʉlɨ nʉ bʉsisya fiijo bo kʉgomoka ʉkʉfuma kʉ fyamba,
kʉno ʉbatolile abalʉgʉ baako.
5 Boope na bagaasi fipʉpiigwe ɨfi baalɨ nafyo,
akabalɨlo aka balɨ ntʉlo ʉtwa bʉfwe,
akajapo ʉndwabwite najʉmo ʉjʉ abagiile ʉkwinʉla amaboko.
6 Gwe Kyala gwa Jaakobo, bo ʉbakemiile,
ɨfalaasi na aba baaliitogile balɨnkʉgwa paasi nʉ kʉfwa.
7 Gwe Kyala, ʉgwe ʉlɨ nsisya fiijo!
Jwani abagiile ʉkwɨma nkyeni mmyako bo ʉkaleele?
8 Ʉkʉfuma kʉmwanya gwatumwile ɨnongwa,
ɨkiisʉ kyatiilile, kɨlɨnkʉmyeka,
9 Kyala bo gwɨmile pakʉlonga,
ʉkʉbapoka boosa aba bikʉboneligwa pakiisʉ. Sela
10 Ʉbʉkalale bwako kʉ bandʉ,
bukʉtwala ɨnduufyo kʉmyako,
abalʉgʉ baako aba baponile ʉkʉgogigwa,
bikʉkwipuutaga.
11 Mulapege ʉkʉnsookesya iikemo ɄNTWA Kyala gwɨnu,
mumpege ɨfi mukʉlapa kʉmyake.
Mwe mulɨ nkiisʉ ɨkya kɨfuki, mumpege ɄNTWA ɨfyabʉpe,
ʉjʉ abagiisye ʉkʉtiiligwa.
12 Ikoonyola amaka agaa balongosi abakʉlʉmba,
ikʉbatiilɨsya abanyafyale abakʉlʉmba.