Ʉlwipuuto lwa kʉsʉʉma ʉbʉpoki bwa Isilaɨli
Ʉlwɨmbo ʉlwa mahala ʉlwa Asafu.
Ʉkwilɨlɨɨsya kʉnongwa jaa kʉbulutuligwa ɨtempeli
74
Gwe Kyala, keeta ʉtʉtaagile loosa?Fiki, ɨngalalɨsi syako sikʉfuuka ngatɨ lyosi, kʉ ngʼoosi syako?
2 Ʉbakʉmbʉke abandʉ baako,
aba gwabʉʉlile liijolo,
ɨkɨkolo ɨkɨ gwabaabwile ʉkʉja baa kɨlɨngo kyako.
Ʉkʉmbʉke ɨkyamba Syoni,
ɨkɨ kyalɨ pabʉjo bwako.
3 Gwendege ʉkeete akaaja aka koonangiike loosa!
Abalʉgʉ boonangile kʉkʉtɨ kandʉ pabwikemo.
4 Abalʉgʉ baako bagulwime bo ʉlwa ngalamu,
pabwikemo, apa gwaganilaga na nuuswe,
biinwile ɨndembeela syabo ʉkʉja kɨmanyilo kya bʉtoli.
5 Balɨ bo ʉlwa baseba mbabʉ,
aba bikʉtumula ɨmipiki nɨ ndwanga syabo.
6 Ʉtʉndʉ toosa ʉtwa matapwa ʉtʉ tʉnosiigwe,
batumuleenie nɨ ndwanga,
nʉ kʉtikania nɨ mbondelo syabo.
7 Bapakosiisye nʉ mooto pabwikemo bwako,
bapanyasiisye pabʉjo bwa ngamu jaako.
8 Baajobile mu ndumbula syabo baatile,
“Tʉbapyute loosa!”
Ʉbʉjo bwa kʉmmwipuuta Kyala,
babʉkosiisye boosa nkiisʉ.
9 Tʉtikʉfibona ɨfimanyilo ʉkʉfuma kwa Kyala,
tʉkaja nʉ nkunguluka najʉmo,
tʉkamanya ʉkʉtɨ ʉbʉtolwe bwɨtʉ,
bukwendelaga mpaka ndɨli.
10 Gwe Kyala, ʉndʉgʉ ikʉkwangalɨlaga ʉgwe, ʉkwakʉfika ndɨli?
Bʉle, ikʉjɨtʉkaga ɨngamu jaako bwila?
11 Fiki ʉtikʉtʉtʉʉla?
Keeta ʉtikʉkɨgolosya ɨkɨboko kyako?
Ʉbʉpoki bwa Kyala bʉliko ʉkʉfuma liijolo
12 Looli ʉgwe Kyala, gwe malafyale gwangʉ ʉkʉfuma liijolo,
kʉbomba ɨngʉlʉmba ɨsya bʉpoki pakiisʉ.
13 Jo ʉgwe gwajɨtapʉleenie ɨnyanja na maka gaako,a
gwagɨtakeenie ɨmitʉ ɨgya mijoka ɨgya mu nyanja.
14 Gwagɨtikeenie ɨmitʉ gya nyiifwɨla,
ʉkʉja findʉ fya finyamaana ɨfya ndʉngalangala.
15 Jo ʉgwe gwapelile ɨnyiibʉko sya mɨɨsi nʉ twɨsi,
gwasyʉmiike ɨnyɨɨsi ɨnywamu.
16 Ʉmuusi gwako nɨ kɨlo kyako,
gwapelile ʉmwesi ni isʉba.
17 Gwabɨɨkile ɨmipaka gyosa ɨgya pakiisʉ,
gwapelile akabalɨlo akaa lʉmu na kaa mbepo.
Ʉkʉnsʉʉma Kyala ʉkʉtɨ abalɨndɨlɨle abandʉ baake
18 Gwe NTWA, ʉsikʉmbʉke ɨsyo,
abalʉgʉ bikʉkwangalɨla,
abandʉ abakonyofu bikʉjɨtʉka ɨngamu jaako.
19 Ʉlɨngiibwaga bwila na bwila ʉbʉʉmi bwa bandʉ baako aba bikʉboneligwa,
bo ʉlwa mundʉ ʉjʉ ikʉfisopela ɨngʉnde ɨfinyamaana ɨfikalɨ.
20 Ʉlʉkʉmbʉkege ʉlwitɨkano lwako,
ʉlʉ gwaliitɨkeene na nuuswe.
Mbʉjo boosa nkiisʉ, ʉbʉ bʉlɨ nɨ ngiisi,
bwiswile ʉbʉgaasi ʉbʉbiibi fiijo.
21 Ʉlɨngabalekaga aba bikʉboneligwa ʉkʉsʉʉka,
abalondo na batolwe bajɨtuufyege ɨngamu jaako.
22 Gwe Kyala, gwɨme gwilwɨle jʉjʉʉgwe,
ʉkʉmbʉke muno kʉtʉkɨligwa na bakonyofu ʉmuusi goosa.
23 Somma ʉkwibwa ʉnjwego gwa balʉgʉ baako,
na koogo kaa bwite akaa aba bikʉkʉpɨnga bwila.