Ɨkɨjabo ɨkya bʉtatʉ
(Ɨsabʉli 73–89)
Ʉbʉgolofu bwa Kyala
Ʉlwɨmbo ʉlwa Asafu.
73
Nalooli, Kyala nnunu kwa Isilaɨli,kʉlɨ aba balɨ nɨ ndumbula ɨnyeelu.
2 Naalɨ kɨfuki fiijo ʉkwitabania,
panandɨ itolo, ngalɨ ndyelemwike.
3 Namanga naalɨ nʉ bʉʉfi kʉ baa matingo,
bo ngʉbabona abaniongafu bikʉnoga.
4 Batikwagigwapo nɨ ngʉbɨlo,
ɨmibɨlɨ gyabo mitupe gɨlɨ na maka.
5 Bakaja nʉ bʉtolwe nabʉmo bo ʉlwa bandʉ abangɨ,
batikʉkabamo ɨndaamyo bo ʉlwa bandʉ boosa.
6 Amatingo giipelile nyambo mmakosi gaabo,
bafwele ʉlʉʉgi bo ʉlwa myenda.
7 Amaaso gaabo giiswile ʉbʉʉfi,
ɨnyiinogono syabo siiswile ʉbʉkonyofu bʉtʉpʉ.
8 Bikʉbʉʉgɨɨlɨla abandʉ nʉ kʉbajobela ɨmbiibi,
kʉ matingo bikʉbaatɨka ʉkʉbabonela.
9 Bikʉntʉka Kyala ʉgwa kʉmwanya,
bikʉbalagɨla abandʉ boosa na masyʉ agaa matingo.
10 Boope abandʉ baa Kyala bikʉbakonga,
batikʉsibona nasimo ɨmbiibi,
bikwitɨka syosa ɨsi bikʉjoba,
11 bikʉtɨ, “Kyala abagiile bʉleebʉle ʉkʉmanya?
Kyala ʉNkʉlʉmba akabagɨla ʉkʉsyagania!”
12 Abandʉ abaniongafu bo balɨ,
bwila batengeene, bikongelapo ʉkʉkaba ɨkyʉma.
13 Niijʉʉlile itolo ʉkʉja nɨ ndumbula ɨnyeelu,
nʉ kwilɨndɨlɨla, ʉkʉtɨ ndɨngatʉla ɨnongwa.
14 Ʉmuusi goosa ngomiigwe,
kʉkʉtɨ lʉbʉnjʉ ngʉfundigwa.
15 Lɨnga naajobaga ɨsyo,
ngalɨ mbasyobile abandʉ baako.
16 Bo ngelile ʉkwinogona ɨnongwa ɨsi,
syalɨ ngafu fiijo kʉmyangʉ,
17 mpaka bo ningiile pabwikemo bwa Kyala,
po ndɨnkʉsimanya ɨsi sikwisa kʉbaaga abaniongafu.
18 Nalooli jo ʉgwe kwisa kʉbabɨɨka pa bʉtyelele,
bikwisa kʉgwɨsigwa paasi, bikwisa kʉpyutigwa.
19 Bikwisa kʉpyutigwa nakalɨnga!
Bikwisa kʉsulusigwa bo bakoliigwe nʉ lʉtende.
20 Gwe Ntwa, bo kwɨma,
kwisa kʉbabona ʉkʉja bandʉ baa itolo,
bo ʉlwa mundʉ ʉjʉ alembwike ntʉlo,
ikwibwa nakalɨnga ɨsya njosi syake.
21 Ʉmoojo gwangʉ bo gukʉbabigwa,
bo mfulasiigwe mu ndumbula,
22 naalɨ bo ʉmundʉ ʉndema,
ʉnsita kʉsyagania nasimo,
naalɨ bo ɨkɨnyamaana nkyeni mmyako.
23 Looli ʉne ndɨ pamopeene na nungwe bwila,
ʉngolile ɨkɨboko ɨkiilɨɨlo.
24 Kʉʉndongosya nɨ manyisyo syako,
kʉmmalɨɨkɨsyo aakʉʉnyambɨlɨla nʉ lwɨmɨko.
25 Jwani ʉjʉ ndɨ nagwe kʉmwanya?
Jo ʉgwe gwimwene!
Pakiisʉ kakajapo nakamo aka niikyeliile nako,
looli ʉgwe gwimwene.
26 Ʉmbɨlɨ gwangʉ nɨ ndumbula jangʉ,
fikʉmalɨka amaka,
looli Kyala ikʉjɨkasya ɨndumbula jangʉ,
ʉmwene gwangʉ bwila na bwila.
27 Aba balɨ kʉbʉtali na nungwe aabikʉpyutigwa,
kwasya boosa aba bikʉkʉkaana.
28 Looli kʉmyangʉ ʉne, kʉnunu ʉkʉja kɨfuki na Kyala.
Gwe NTWA Kyala ʉlɨ bʉbopelo bwangʉ,
angʉfumusyaga ɨmbombo syako syosa.