Ʉlwipuuto ʉlwa kʉnsʉʉmɨla ʉmalafyale
Ʉlwɨmbo ʉlwa Solomoni.
72
Gwe Kyala, ʉnndongosye ʉmalafyale gwɨtʉ ʉkʉlongosya kanunu,ʉmmanyisye ʉkʉlonga kʉ bʉgolofu.
2 Alongosyege abandʉ baako kʉ bʉgolofu,
nʉ kʉbabombela kanunu abafujufu,
3 ʉkʉtɨ ɨkiisʉ kyosa mfyamba na ntwamba,
abandʉ batʉʉgalege nʉ lʉtengaano.
4 Ʉmalafyale gwɨtʉ abɨɨmɨlege aba bikʉboneligwa,
abapokege abaana baa balondo,
nʉ kʉbatajʉlania aba bikʉbabonela abandʉ.
5 Ʉmwene anogege nʉ kʉkwipuuta bwila,
bo ʉlwa isʉba nʉ mwesi ɨfi fikʉbala mu sopelo syosa.
6 Ʉmalafyale gwɨtʉ ajege bo ʉlwa fula,
ɨjɨ jikʉtima pa liisʉ ɨlya ndeka,
ɨjɨ jikʉnyuunya ʉkʉbundasya ɨkiisʉ.
7 Mbʉʉmi bwake abandʉ banogege mbʉgolofu,
ʉlʉtengaano lʉjengeko bwila bo ʉkʉbala kwa mwesi.
8 Ajege ndagɨli ʉkʉfuma kʉ nyanja,
ʉkwakʉfika kʉ nyanja ɨjɨngɨ,
ʉkʉfuma pa lwɨsi Fulati,
ʉkwakʉfika apa kɨmalɨkiile ɨkiisʉ.
9 Aba bikʉtʉʉgala ndʉngalangala,
bafugamege nkyeni mmyake,
abalʉgʉ baake babwɨlege ɨfumbɨ.
10 Abanyafyale baa mu Talisisia na mu sʉngo,
bantwalɨlege ɨsongo.
Abanyafyale abaa mu Syeba na mu Seba,
bantwalɨlege ɨfyabʉpe.
11 Abanyafyale boosa bammwɨmɨkege,
abandʉ abaa fikolo fyosa bammbombelege.
12 Namanga ikʉmpoka ʉntolwe ʉjʉ ikʉnndɨlɨla,
ʉjʉ ikʉboneligwa looli akaja nʉ ntʉʉli.
13 Ikʉbapaakɨsya aboonywa na balondo,
nʉ kʉbapoka abatolwe mbʉfwe.
14 Ikʉbapoka ʉkʉfuma mbʉgaasi na mbwite,
namanga ʉbʉʉmi bwabo bʉpala fiijo kʉmyake.
15 Ʉmalafyale ajengeko bwila,
apeeligwege ɨsahabʉ ɨjaa mu Syeba.
Abandʉ bammwipuutɨlege bwila,
Kyala ansajege ʉmuusi goosa.
16 Ɨfindʉ fijege fingi nkiisʉ kyɨtʉ,
moope na mfyamba ɨfitali.
Ɨmigʉnda gɨjege nʉ ntondolo mwingi,
bo ʉlwa mipiki ɨgya mu Lebanoni.
Ʉtwaja twisʉlege abandʉ,
bo ʉlwa liisʉ lingi.
17 Ɨngamu jaa malafyale jɨfumukege bwila,
ʉbʉfumuke bwake bʉjengeko akabalɨlo koosa.
Ɨfiisʉ fyosa fisajigwege ʉkwendela kʉmyake,
abandʉ boosa bantuufyege ʉkʉtɨ nsajigwa.
18 Atuufigwege ɄNTWA Kyala, Kyala gwa Isilaɨli,
ʉjʉ mwene ntɨga ikʉbomba ɨsya kʉswigɨsya.
19 Ɨngamu jaake ɨsisya jɨtuufigwege bwila,
ʉbʉsisya bwake bwisʉlege pakiisʉ poosa.
Ameni, kangɨ Ameni.
20 Ɨnyiipuuto sya Ndaabɨti, ʉnnya Jese, simalɨkiile apa.