Ʉlwipuuto lwa kʉsʉʉma ʉbʉtʉʉli bwa Kyala mbʉkangale
71
Gwe NTWA, mbopiile kʉmyako,ndɨngasʉʉkamo sikʉ.
2 Ʉgwe ʉlɨ ngolofu, ʉmboke,
ʉʉnyaamule ʉne, ʉʉnyaabʉle.
3 Ʉjege lwalabwe lwangʉ lwa kʉbopelako,
bʉjo bwa kwendamo akabalɨlo koosa.
Ʉlagɨle ʉkʉtɨ mbokigwe,
namanga ʉgwe gwe lwalabwe lwangʉ,
kangɨ gwe ilinga lyangʉ.
4 Gwe Kyala gwangʉ, ʉʉnyaabʉle mmaboko gaa bandʉ ababiibi,
mmaboko gaa bandʉ abaniongafu na boonangi.
5 Namanga ʉgwe ʉlɨ lʉsʉʉbɨlo lwangʉ,
gwe NTWA Kyala gwangʉ,
ngʉkʉsʉʉbɨla ʉgwe ʉkʉfuma mbʉtubwa bwangʉ.
6 Ngʉkʉsʉʉbɨla ʉgwe ʉkʉfuma ʉkʉpaapigwa kwangʉ,
jo ʉgwe gwalɨɨsoosiisye munda mwa jʉʉba.
Ngʉkʉtuufyaga bwila ʉgwe.
7 Ndɨ kandʉ kaa kʉswigɨsya kʉ bandʉ bingi,
looli ʉgwe ʉlɨ bʉbopelo bwa maka.
8 Akanwa kangʉ kiiswile ɨnduufyo syako,
nʉ bʉsisya bwako iisikʉ lyosa.
9 Ʉlɨngandaagaga pakabalɨlo kangʉ akaa mbʉkangale,
ʉlɨngaandekaga bo amaka gangʉ gikʉmalɨka.
10 Namanga abalʉgʉ bangʉ bikʉʉnjoba kabiibi,
aba bikʉlonda ʉkʉʉngoga bikʉjobesania,
11 bikʉtɨ, “Kyala anndekile,
tʉmmbopele, tʉkankole,
akajako najʉmo ʉgwa kʉmpoka!”
12 Gwe Kyala, ʉlɨngajaga kʉbʉtali na niine,
gwe Kyala gwangʉ, ʉkʉʉje kʉkʉndʉʉla.
13 Abalʉgʉ bangʉ boosa,
bakenyeesigwege, bapyutigwege.
Aba bikʉlonda ʉkʉʉfulasya,
bafujuligwe, basʉʉke.
14 Looli ʉne ngʉkʉsʉʉbɨlaga bwila,
ngʉkɨndɨlɨlaga ʉkʉkʉtuufya fiijo.
15 Angʉsifumusyaga ɨmbombo syako ɨsya bʉgolofu,
ngʉsifumusyaga ʉmuusi goosa ɨmbombo syako ɨsya bʉpoki,
na paapo ɨsyo sigakɨndile amahala gangʉ.
16 Gwe NTWA Kyala, ngʉsijobaga ɨmbombo syako ɨngʉlʉmba,
ngʉfumusyaga ʉkʉtɨ ʉgwe ʉlɨ ngolofu gwimwene.
17 Gwe Kyala, ʉʉmanyiisye ʉkʉfuma mbʉtubwa bwangʉ,
na ʉlʉ ngʉfumusya ɨfiika fyako ɨfya kʉswigɨsya.
18 Na paapo ngangeele ndɨ nɨ ɨfwe kʉntʉ,
gwe Kyala, ʉlɨngaandeka niimwene,
mpaka mbabʉʉle boosa abaa mu sopelo syosa ɨsi sikwisa,
ɨsya mbombo syako na maka gaako.
19 Gwe Kyala, ʉbʉgolofu bwako,
bʉkɨndile amahala gɨɨtʉ.
Ʉgwe ʉbombile ɨngʉlʉmba fiijo.
Gwe Kyala, jo jwani ʉjʉ alɨ bo ʉgwe?
20 Na paapo ʉmbelile ʉkʉtaamigwa mbʉtolwe ʉbwingi nɨ ngʉbɨlo,
looli kʉʉmbujɨkɨsyaga amaka.
Kʉʉnyiinʉlaga, kʉʉfyʉsyaga kʉmwanya,
ʉkʉfuma kʉ bʉsyʉka.
21 Kongelapo ʉlwɨmɨko lwangʉ,
nʉ kʉʉsʉʉbɨsya kangɨ.
22 Ʉne angʉkʉtuufyaga ni ipango,
gwe Kyala gwangʉ, kʉ bwanalooli bwako.
Angʉkwɨmbɨlaga ʉgwe nɨ kɨsango,
ʉgwe gwe Mwikemo gwa Isilaɨli.
23 Angʉlaataga ʉkʉkwɨmbɨla nʉ lʉsekelo,
bo ngʉkwɨmbɨla ʉgwe ɨnduufyo syako.
Angʉkʉtuufyaga, namanga ʉmbokile.
24 Ngʉbʉjobaga ʉbʉgolofu bwako iisikʉ lyosa,
namanga aba baalondaga ʉkʉʉfulasya,
bafujuliigwe, bakenyeesiigwe.