Ɨnguuto jaa kʉsʉʉma ʉbʉtʉʉli
Kʉ mpaali gwa lwɨmbo. Ʉkʉkongana nʉ lwɨmbo ʉlʉ bikʉtɨ, Amajɨbɨjɨbɨ. Ʉlwɨmbo ʉlwa Ndaabɨti.
69
Gwe Kyala, ʉmboke,namanga amɨɨsi gafikile mmakosi.
2 Ngwibɨla mmatope amingi,
muno ngabagɨla nʉ kwɨma.
Ndɨ pakatɨ pa mɨɨsi amasolofu,
amɨɨsi aga gikwenda kʉ maka, gikʉʉnyiibɨsya.
3 Ngateele kʉnongwa jaa kʉkuuta,
pa mmilo pʉʉmile fiijo.
Amaaso gangʉ gapʉʉpeele,
bo ngʉkʉguulɨla, gwe Kyala gwangʉ.
4 Aba baambengile kɨsita nongwa najɨmo,a
bingi ʉkʉkɨnda ɨnywili syangʉ.
Balɨ na maka fiijo aba bikʉlonda ʉkʉʉngoga,
aba bikʉʉnjobela ɨsya bʉtʉngʉlʉ.
Bʉle, ngomosye akandʉ aka ngiiba?
5 Gwe Kyala, ʉbʉmeenye ʉbʉkonyofu bwangʉ,
ʉbʉtʉlanongwa bwangʉ bʉkiifisa kʉmyako.
6 Gwe Ntwa, gwe NTWA gwa filʉndɨlo,
aba bikʉkʉsʉʉbɨla ʉgwe,
balɨngasʉʉkaga kʉnongwa jangʉ.
Gwe Kyala gwa Isilaɨli,
aba bikʉkʉlonda ʉgwe,
balɨngafujuligwa kʉnongwa jangʉ.
7 Kʉnongwa jaako mfujuliigwe,
ɨsoni siiswile kʉmaaso kʉmyangʉ.
8 Ndɨ bo ʉlwa nheesya kʉ bakamu bangʉ,
kʉlɨ aba tʉlɨ nna jʉmojwene,
ndɨ bo ʉlwa mundʉ ʉjʉ bakammanya.
9 Ʉlʉgano lwangʉ kʉ nyumba jaako,
lukwaka ngatɨ mooto nkatɨ mmyangʉ.b
Amaheelu aga bikʉkʉtʉka ʉgwe,
gaalɨɨnyaagile ʉne.c
10 Bo ngwijiisya nʉ kʉfipɨɨka ɨfindʉ,
ngɨmba abandʉ bikʉndʉka.
11 Bo mfwele iilogota,
abeene balɨnkʉʉseka ʉne.
12 Aba bikʉtʉʉgala pa fifigo fya kaaja bikʉʉheeha,
ndɨ lwɨmbo lwa bagaala bwalwa.
13 Looli ʉne ngʉkʉsʉʉma ʉgwe, gwe NTWA.
Kʉkabalɨlo aka gwikyeliile,
gwe Kyala, ʉʉnyaamule kʉ bwingi bwa ipyana lyako,
paapo nalooli ʉgwe kʉbapoka abandʉ.
14 Ʉmboke, ʉʉfyʉle mmatope,
ʉlɨngaandeka ʉkwibɨla.
Ʉmboke kʉ balʉgʉ bangʉ,
na kʉ mɨɨsi amasolofu.
15 Ʉlɨngaandeka ʉkwegigwa nʉ mweleesyo,
pamo ʉkwibɨla mmɨɨsi amasolofu,
pamo ʉkʉmiligwa nʉ bʉfwe.
16 Gwe NTWA, ʉʉnyaamule,
namanga iipyana lyako inunu,
ʉkʉkongana nɨ kɨsa kyako, ʉngeetege.
17 Ʉlɨngaasindaga iikosi ne mbombeli gwako,
namanga ndɨ mbʉtolwe,
ʉʉnyaamule mbɨbɨmbɨbɨ.
18 Gwise, kʉkʉmboka,
ʉʉnyaabʉle kʉ balʉgʉ bangʉ.
19 Ʉgwe ʉmeenye muno ngʉtʉkɨligwa,
ʉkʉsʉʉka nʉ kʉfujuligwa kwangʉ,
abalʉgʉ bangʉ boosa ʉgwe ʉbameenye.
20 Ʉkʉtʉkigwa amaheelu,
kʉʉmalile amaka.
Naasʉʉbɨlaga ʉkʉpaakɨsigwa,
looli akaalipo najʉmo ʉgwa kʉmbaakɨsya.
Naasʉʉbɨlaga ʉkʉsʉʉbɨsigwa,
looli ngaalɨmmwagile najʉmo.
21 Baabɨɨkile ʉnkota ʉgʉ gukʉgoga mfindʉ fyangʉ,
bo ndɨ nɨ kyʉmɨlwa baalɨmbeele ɨfinga ɨngalɨ.
22 Bo balɨ pa findʉ fyabo ɨfya pa lʉsekelo, Kyala afisanusye ʉkʉja ntego,
ʉntego ʉgwa kʉbakola abeene, ʉkwikinyamo nʉ kʉbafunda.
23 Amaaso gaabo gabɨɨkigwe ɨngiisi,
ʉkʉtɨ balɨngafibonaga nafimo,
ɨnyuma syabo sigundamege bwila.d
24 Ʉboonele ɨngalalɨsi syako pamwanya pamyabo,
ʉbʉkalale bwako bʉbaagege.
25 Akaaja kaabo kajege kɨsaame,
alɨngatʉʉgasyangamo ʉmundʉ najʉmo.e
26 Namanga bikʉbataamya aba ʉbafundile ʉgwe,
bikʉsijoba ɨngʉbɨlo ɨsya aba ʉbafuleesye.
27 Ʉbongelepo ʉlʉfundo pamwanya pa lʉfundo,
balɨngakabapo ʉlʉhobokelo lwako.
28 Ʉbasoosyemo mwa kalata ʉgwa bʉʉmi,
ʉlɨngabasimba pamopeene na bagolofu.
29 Looli ʉne ngʉtaamigwa nɨ fifulalo.
Gwe Kyala, ʉmboke, ʉʉndɨndɨlɨle.
30 Po angʉjɨtuufyaga ɨngamu jaa Kyala nʉ lwɨmbo,
angʉnngwɨlaga ʉlʉpi, ʉkʉmpaala.
31 Ɨfyo aafikʉnkyelaga ɄNTWA ʉkʉkɨnda ʉkʉnsookesya ɨngʼombe,
pamo ɨngambakʉ ɨngʉsi ɨjɨ jɨlɨ nɨ mbembe nɨ fyʉga.
32 Abafujufu bo basibwene, aabikʉhoboka,
mwesa mwe mukʉnndonda Kyala,
mukasigwege mu ndumbula syɨnu.
33 Namanga ɄNTWA ikʉbapɨlɨka aba baagiilwe,
atikʉbiibwamo abandʉ baake aba bapinyiigwe.
34 Ʉmpaalanga nɨ kiisʉ fimpaalege Kyala,
ɨnyanja na fyosa ɨfi filimo ʉmo fintuufyege.
35 Namanga Kyala aikʉkapoka akaaja akaa mu Syoni,
nʉ kʉtʉjenga ʉtwaja ʉtwa Juuta,
abandʉ baake aabikʉtʉʉgalaga ʉmo nʉ kʉkɨkaba ɨkiisʉ.
36 Abaana baa babombeli baake aabikwingɨlapo ɨkɨlɨngo,
boosa aba bajɨganile ɨngamu jaake, aabikʉtʉʉgalaga ʉmo.