Ʉlwɨmbo ʉlwa bʉtoli
Kʉ mpaali gwa lwɨmbo. Ʉlwɨmbo ʉlwa Ndaabɨti.
68
Kyala ikʉsumuka, abalʉgʉ baake bikʉbalanila,aba bammbengile, bikʉbopa nkyeni mmyake.
2 Bo ʉlwa lyosi likʉbelelʉsigwa nʉ mbelo,
bo lʉlʉʉlo boope bikʉbelelʉsigwa.
Bo ʉlwa mpulya gukwengʉka kʉ mooto,
mo muno ababiibi bikʉpyutigwa nkyeni mwa Kyala!
3 Looli abagolofu bikʉsekela nkyeni mwa Kyala,
bikʉhoboka nʉ kʉsaala.
4 Mumpaalege Kyala, mujɨtuufyege ɨngamu jaake,
mutendekesye ɨnjɨla jaake ʉjʉ iitogile pa mabɨngo.
Ɨngamu jaake jo NTWA,
musekelege nkyeni mmyake.
5 Kyala ʉjʉ ikʉtʉʉgala pabʉjo bwake ʉbwikemo,
jo gwise gwa bapɨɨna,
ndɨndɨlɨli gwa bafwɨle.
6 Kyala ikʉbapa ʉbʉjo aba balɨ beene,
ikʉbaabʉla abapinyigwa, ikʉbapa ɨsajo.
Looli aba basambwike, bikʉtʉʉgala nkiisʉ ɨkyʉmu.
Kyala ikʉbatola abalʉgʉ baake
7 Gwe Kyala, bo kʉbalongosya abandʉ baako,
bo kwenda ndʉngalangala, Sela
8 ɨkiisʉ kɨlɨnkʉsenyendeka,
ʉmpaalanga gʉlɨnkʉtimɨsya ɨfula ɨnyingi,
nkyeni mwa Kyala, ʉgwa kyamba Sinai,
nkyeni mwa Kyala, Kyala gwa Isilaɨli.
9 Gwe Kyala, gwatimiisye ɨfula nyingi,
gwakɨsyʉsiisye ɨkiisʉ kyako ɨkɨ kyakateele loosa.
10 Abandʉ baako balɨnkʉjengamo,
mbooloolo bwako gwabaningile abatolwe.
11 ɄNtwa aajobile ʉlʉlagɨlo lwake,
po ɨkɨlʉndɨlo kɨnywamu ɨkya bakiikʉlʉ,
balɨnkʉfumusya ɨndʉmi, balɨnkʉtɨ,
12 “Abanyafyale na basikali baabo bikʉbopa mwalomwalo!
Abakiikʉlʉ bikʉjabana ɨfi fipʉpiigwe mbwite.
13 Ʉmwe mulɨngasyala mfibaga fya ngʼoosi,
paapo ɨfifwani fya ngʉnde ɨfi fikʉnangɨsya ʉbʉtoli,
amapɨko gaabo gapakiigwe ɨfeesa,
amajoja gaake ɨsahabʉ.”
14 Kyala ʉMwene maka goosa,
aabanyambeenie abanyafyale ʉko,
bo ʉlwa ngaala ɨjɨ jikʉgwa nkyamba Salimoni.
Kyala bo atolile, ikʉbʉʉka pa kyamba ɨkiikemo
15 Bo bʉkʉlʉmba bʉki, mwe fyamba Basyani,
mwe fyamba ɨfitali Basyani!
16 Mwe fyamba, fiki mukʉkɨkeeta na kabini,
ɨkyamba ɨkɨ Kyala akɨsalile ʉkʉtʉʉgalapo?
ɄNTWA aikʉtʉʉgalaga ʉko bwila na bwila,
17 pa kyamba Sinai, pabwikemo bwake.
Ʉko ʉNtwa Kyala alɨ pakatɨ pa mageleeti gaake agaa bwite,
mingi fiijo ʉkabagɨla ʉkʉbala.
18 Bo kʉfyʉka kʉmwanya,
gwafyʉkile nabo abapinyigwa bingi.
Gwalyambɨliile ɨfyabʉpe,a
ʉkʉfuma kʉ balʉgʉ aba baatoliigwe mbwite,
na kʉ bandʉ aba baasambwike.
Gwe NTWA Kyala, kʉtʉʉgalaga bwila na bwila apo.
19 ɄNtwa atuufigwege kʉkʉtɨ isikʉ,
ʉjʉ ikʉtʉpɨmbɨla ɨfitwalo fyɨtʉ,
Kyala jo bʉpoki bwɨtʉ. Sela
20 Kyala gwɨtʉ, jo Kyala ʉjʉ ikʉpoka,
ɄNTWA Kyala, mwene jo ʉjʉ ikʉtʉpoka mbʉfwe.
21 Kyala aikʉgɨtajʉlania ɨmitʉ gya balʉgʉ baake,
pa lʉndosi palɨ aba bʉʉmɨɨliile ʉbʉtʉlanongwa.
22 ɄNtwa aajobile aatile,
“Angʉbagomola abalʉgʉ ʉkʉfuma kʉ Basyani,
angʉbabujɨsya ʉkʉfuma mbʉsolofu ʉbwa nyanja,
23 ʉkʉtɨ mujubɨke amalʉndɨ gɨɨnu mwi ilopa lya balʉgʉ bɨɨnu,
ɨmbwa syɨnu syope aasikʉmyanda ɨkɨjabo kyabo.”
Ɨfilʉndɨlo fya kʉsekela ʉbʉtoli bwa Kyala
24 Gwe Kyala, bafibwene ɨfilʉndɨlo fyako ɨfya kʉsekela ʉbʉtoli,
ɨfilʉndɨlo ɨfya Kyala gwangʉ, ʉMalafyale gwangʉ,
fikʉbʉʉka pabwikemo bwake.
25 Aba bikwɨmba batalilepo nkyeni,
kʉnyuma bikʉkonga abakʉba fisango,
abalɨndwana balɨ pakatɨ bikʉkʉba ɨpelekete.
26 Muntuufyege Kyala ndʉkomaano ʉlʉkʉlʉmba.
Mwe Banyaisilaɨli mwesa, mumpaalege ɄNTWA.
27 Ɨkɨkolo ɨkɨnandɨ ɨkya Benjamini kyo kɨlongoliile,
kikʉkonga ɨkɨlʉndɨlo ɨkya bakʉlʉmba baa Juuta.
Kʉnyuma bikʉkonga abalongosi baa fikolo ɨfya Sabuloni na Nafutali.
Ʉlwipuuto kʉ bʉtoli bwa Kyala
28 Gwe Kyala, nangɨsya amaka gaako,
gwe Kyala, tʉnangɨsye ɨngʉlʉmba ɨsi ʉtʉbombiile.
29 Ʉnangɨsye amaka gaako,
ʉkʉfuma mu tempeli jaako mu Jelusalemu,
kʉno abanyafyale aabikʉkʉtwalɨla ʉgwe ɨfyabʉpe.
30 Ʉnkemele Misili, ɨkɨnyamaana kɨla ɨkya mu ndete,
nɨ fikolo fya bandʉ, ɨkɨlʉndɨlo kɨla kya ngambakʉ nɨ ngwata.
Fiijiisyege nkyeni mmyako nʉ kʉkʉtwalɨla ɨfeesa.
Ʉfinyambanie ɨfikolo fya bandʉ aba babʉganile ʉbwite.
31 Aba batʉmiigwe aabikwisa ʉkʉfuma kʉ Misili,
Ityopija aikʉmmwinʉlɨlaga amaboko Kyala.
Ɨnduufyo kwa Kyala
32 Mwe bʉnyafyale bwa pakiisʉ,
mumpaalege Kyala,
muntuufyege ʉNtwa nɨ nyɨmbo. Sela
33 Mummwɨmbɨlege ʉjʉ iitogile pa mpaalanga,
ʉmpaalanga ʉgwa ijolo na ijolo.
Mumpɨlɨkɨsyege, ikʉsoosya iisyʉ lyake,
iisyʉ ɨlya maka fiijo.
34 Mufumusyege amaka gaa Kyala,
ʉjʉ ikʉlagɨla pamwanya pa Isilaɨli,
amaka gaake gafikile mmabɨngo.
35 Kyala gwa kʉtiilɨsya pabʉjo bwake ʉbwikemo,
nalooli, ʉmwene jo Kyala gwa Isilaɨli!
Ikʉbapa abandʉ baake amaka nʉ bʉkʉlʉmba.
Kyala atuufigwege!