Ʉlwɨmbo ʉlwa kʉgwa ʉlʉpi
Kʉ mpaali gwa lwɨmbo. Ʉlwɨmbo.
66
Mwe bandʉ boosa pakiisʉ,mumpaalege Kyala na koogo kaa lʉsekelo.
2 Mubʉpaalege ʉbʉsisya ʉbwa ngamu jaake,
mubʉtuufyege ʉbʉsisya bwake.
3 Mummbʉʉlege Kyala mutɨgɨ,
“Bo bʉsisya bʉki ɨmbombo syako!
Amaka gaako makʉlʉmba fiijo,
fyobeene abalʉgʉ baako bikwijiisya kʉmyako.
4 Ɨkiisʉ kyosa kikʉkwipuuta ʉgwe,
abandʉ boosa bikʉkwɨmbɨla ʉgwe ɨnduufyo.” Sela
5 Isaga mukeete ɨsi Kyala abombile,
abombile ɨmbombo ɨsisya pakatɨ pa bandʉ.
6 Aajɨsanwisye ɨnyanja ʉkʉja kiisʉ ɨkyʉmu,
abandʉ baalobwike ʉmo na malʉndɨ,a
po twasekiile kʉ mbombo ɨsi aabombile.
7 Ikʉlagɨla na maka gaake bwila na bwila,
amaaso gaake gikʉfikeeta ɨfikolo fyosa,
aba basambwike balɨngalwaga nagwe. Sela
8 Mwe fikolo fyosa, mumpaalege Kyala gwɨtʉ,
akoogo kaa nduufyo syake kapɨlɨkigwege.
9 Ʉmwene abʉlɨndɨliile ʉbʉʉmi,
nʉ kʉgasigɨla amalʉndɨ gɨɨtʉ ʉkʉtyelemuka.
10 Gwe Kyala, gwatʉpɨmile ʉswe,
gwatwelwisye bo ʉlʉ bikwelʉsya ɨfeesa mmooto.
11 Gwatwingiisye mu ntego,
gwatʉtwɨkile ɨfitwalo ɨfisito.
12 Gwabiitɨkiisye abandʉ ʉkʉtʉkanya mmitʉ,
twalyendile mmooto na mmɨɨsi.
Looli lɨɨlɨno ʉtʉtwele pabʉjo ʉbʉnunu.
13 Angwisa mu nyumba jaako ni ikemo ɨlya kookya,
angʉsoosyaga ɨfi naafingile kʉmyako,
14 ɨsi ɨmilomo gyangʉ gyajobile,
na ɨsi akanwa kangʉ kaafingile bo ndɨ mbʉtolwe.
15 Angʉkʉsookesyaga amakemo amookye amanyaate,
na makemo agaa ngʼoosi ɨmbongo,
angʉkʉsookesyaga ɨngambakʉ nɨ mbene. Sela
16 Isaga ʉmwe mwe mukʉntiila Kyala, mupɨlɨke,
mbabʉʉle ɨsi aambombiile ʉne.
17 Naalɨnkooliile na kanwa kangʉ,
ɨnduufyo syake naasijobile.
18 Lɨnga niinogonaga ɨmbiibi mu ndumbula jangʉ,
ʉNtwa ngalɨ akambɨlɨka.
19 Nalooli Kyala apɨliike,
apɨliike iisyʉ ɨlya lwipuuto lwangʉ.
20 Kyala atuufigwege,
akalʉkaana ʉlwipuuto lwangʉ,
pamo ʉkʉsoosyapo iipyana lyake.