Ɨnduufyo kwa Kyala ʉkʉkʉsya ɨfindʉ
Kʉ mpaali gwa lwɨmbo. Ʉlwɨmbo ʉlwa Ndaabɨti.
65
Gwe Kyala, ʉbagiisye ʉkʉtuufigwa nkyamba Syoni,aatukʉbomba ɨsi tʉfingile kʉmyako.
2 Namanga jo ʉgwe gwe kʉpɨlɨka ɨnyiipuuto,
abandʉ boosa bikwisaga kʉmyako.
3 Bo twilɨkɨliigwe nʉ bʉtʉlanongwa bwɨtʉ,
jo ʉgwe kʉtʉswa loosa.
4 Basajiigwe aba ʉbasʉngwile ʉkʉja nabo kɨfuki,
ʉkʉtɨ batʉʉgalege mbʉjo bwako.
Tukwisa kwikʉtaga ʉbʉnunu ʉbʉ bʉlɨ nnyumba jaako,
ʉbʉnunu ʉbwa mu tempeli jaako ɨnyiikemo.
5 Gwe Kyala, gwe mpoki gwɨtʉ,
kʉ mbombo syako ɨsisya kʉtwamula.
Ɨfipeligwa fyosa fikʉkʉsʉʉbɨla,
pakiisʉ poosa na mu nyanja kʉbʉtali fiijo.
6 Gwafyɨmiike ɨfyamba na maka gaako,
ʉgwe ʉlɨ na maka fiijo.
7 Jo ʉgwe kʉbotesya ɨnyanja,
nʉ koobela ʉkwa majɨga gaake,
nʉ njwego gwa bandʉ.
8 Ɨfiisʉ fyosa fikʉswiga ɨmbombo syako ɨngʉlʉmba,
kukʉpela ʉlʉsekelo mbʉjo boosa,
ʉkʉfuma kʉbʉsookelo mpaka kʉbʉjongelo.
9 Jo ʉgwe kʉkeetelela ɨkiisʉ nʉ kʉkɨtimɨkɨsya ɨfula,
kʉkɨpelela ɨmboto nʉ bʉkabi ʉbwingi.
Ʉlwɨsi lwako Kyala lwiswile amɨɨsi amingi,
kʉbapa abandʉ ʉntondolo,
namanga mo muno kʉkɨtendekesya ɨkiisʉ.
10 Ɨmigʉnda kʉgɨtimɨkɨsya ɨfula ɨnyingi,
kʉbundasya ɨkiisʉ nɨ fula ɨjɨ jikʉnyaganya,
kʉfisaja fyosa ɨfi fibyaliigwe fikʉmela.
11 Kʉkɨsaja ɨkyɨnja kʉ booloolo bwako,
poosa apa kwenda fiiswile ɨfinunu.
12 Ɨmitiimo giiswile mu ndeka jaa ndʉkʉbo,
ɨfyamba fiiswile ʉlʉsekelo.
13 Ʉlʉkʉbo lwiswile ɨmitiimo,
na mu sooko gwiswile ʉntondolo,
kʉkʉtɨ kandʉ kikʉluluutɨla nʉ lʉsekelo.