Ʉlwipuuto ʉlwa kʉsʉʉma ʉbʉlɨndɨlɨli
Kʉ mpaali gwa lwɨmbo. Ʉlwɨmbo ʉlwa Ndaabɨti.
64
Gwe Kyala, ʉlɨɨpɨlɨkaga iisyʉ lyangʉ bo ngwilɨlɨɨsya,ʉʉndɨndɨlɨle kʉ balʉgʉ bangʉ aba bikʉndiilɨsya.
2 Ʉʉnyeepʉsye kʉlɨ ɨsi bikʉbaatɨka mbʉtiitʉ,
ʉkʉʉmbombela ʉne kabiibi,
kʉ kɨlʉndɨlo ɨkya bandʉ abaniongafu.
3 Bapyasiisye ɨndɨmi syabo bo ʉlwa nyʉʉbo,
bikʉlʉʉlɨka amasyʉ amabiibi ʉkʉfwana mitipʉlo.
4 Bikwifisa nʉ kʉnndasa ʉnsita nongwa najɨmo,
bikʉnndasa nakalɨnga kɨsita lʉtende nalʉmo.
5 Bikʉsongana ʉkʉbomba ɨmbiibi pamopeene,
biitɨkeene pa bʉfiso ɨmitego gyabo,
bikʉtɨ, “Akajako ʉjʉ abagiile ʉkʉtʉbona.”
6 Bikʉlondeesya ʉkʉbomba ɨmbiibi,
bikʉtɨ, “Tʉbaatiike kʉ bʉkomu kanunu!”
Ɨsya mbʉtiitʉ sifisiigwe mu ndumbula jaa mundʉ.
7 Looli Kyala ikwisa kʉbalasa nɨ mitipʉlo,
aabikʉgwa nakalɨnga.
8 Aikʉbapyuta kʉnongwa jaa masyʉ gaabo,
boosa aba bikʉbabonaga, aabikʉbasekaga.
9 Po abandʉ boosa aabikʉtiilaga,
aabikʉfumusyaga ɨsi abombile Kyala,
nʉ kʉsiinogona ɨmbombo syake.
10 Abagolofu aabikʉsekelaga kʉ NTWA,
nʉ kʉbopela kʉmyake,
abeelu mu ndumbula aabikʉntuufyaga.