Ʉkʉnsyʉkwa Kyala
Ʉlwɨmbo ʉlwa Ndaabɨti, bo alɨ ndʉngalangala ʉlwa Juuta.
63
Gwe Kyala, ʉgwe gwe Kyala gwangʉ,ɨndumbula jangʉ jikʉkʉsyʉkwa ʉgwe,
bo ʉlwa mundʉ ʉgwa kyʉmɨlwa,
ʉjʉ alɨ nkiisʉ ɨkyʉmu ɨkɨsita mɨɨsi nagamo.
2 Ngʉbwene pabʉjo bwako ʉbwikemo,
nʉ kʉgabona amaka gaako nʉ bʉsisya bwako.
3 Ɨliipyana lyako inunu ʉkʉbʉkɨnda ʉbʉʉmi,
ɨmilomo gyangʉ gikʉkʉtuufyaga.
4 Ngʉkʉtuufyaga bwila bo ndiko kʉ bʉʉmi,
ngwinʉlaga amaboko gangʉ bo ngwipuuta.
5 Angʉsekelaga ngatɨ ndiile ɨfinyaate,
ɨmilomo gyangʉ aagikʉkʉpaalaga.
6 Bo ndambaleele, ngʉkʉkʉmbʉka ʉgwe,
ngʉkwinogona bʉkye.
7 Namanga jo ʉgwe kʉndʉʉla bwila,
ngwɨmbaga nʉ lʉsekelo nkɨpepo ɨkya mapɨko gaako.
8 Ʉne ngʉkʉʉmɨɨlɨla ʉgwe,
ɨkɨboko kyako ɨkiilɨɨlo kikʉngola.
9 Looli aba bikʉlonda ʉkʉʉngoga ʉne,
aabikʉsulukaga kʉ bʉsyʉka.
10 Aabikʉgogigwa nʉ lʉʉbo,
aabikʉjaga findʉ fya findingo.
11 Looli kʉnongwa jaako, ʉgwe Kyala,
ʉmalafyale aikʉsekelaga.
Aba bikʉlapa mu ngamu jaa Kyala aabikʉntuufyaga,
looli ɨmilomo gya batʉngʉlʉ aagikwigaligwa.