Kyala mwene jo bʉbopelo
Kʉ mpaali gwa lwɨmbo. Kwa Jendutuni. Ʉlwɨmbo ʉlwa Ndaabɨti.
62
Kwa Kyala kwene ko kʉno ngʉtengaana,ʉbʉpoki bwangʉ bukʉfuma kʉmyake.
2 Mwene jo lwalabwe lwangʉ nʉ bʉpoki bwangʉ,
jo ilinga lyangʉ, andikʉjʉngaanika sikʉ.
3 Mpaka ndɨli aamukʉʉmbʉmbaga ʉne?
Bʉle, ʉmwe mwesa muungoge?
Ne ndɨ bo ʉlwa imato ɨlɨ lɨsendemeele,
ngatɨ lʉpaso ʉlʉ lukʉja pakʉgwa.
4 Babaatiike ʉkʉʉsoosyapo pabʉjo bwangʉ ʉbwɨmɨkigwa,
ʉlʉsekelo lwɨnu ko kʉtʉngʉlʉpa.
Kʉ milomo gyɨnu, mukʉʉsaja,
looli mu ndumbula syɨnu mukʉʉnguna. Sela
5 Ndengeene, ngʉnnguulɨla Kyala mwene,
ʉlʉsʉʉbɨlo lwangʉ lʉlɨ kʉmyake.
6 Mwene jo lwalabwe lwangʉ nʉ bʉpoki bwangʉ,
jo ilinga lyangʉ, andikʉjʉngaanika sikʉ.
7 Kyala jo ʉjʉ ikʉmboka ʉkʉtɨ nɨɨmɨkigwege nkyeni mmbandʉ,
Kyala jo lwalabwe lwangʉ ʉlwa maka,
nʉ bʉbopelo bwangʉ ko kwa Kyala.
8 Mwe bandʉ ʉmwe, munsʉʉbɨlege Kyala bwila,
mummbʉʉlege ɨsi silimo mu ndumbula syɨnu,
paapo ʉmwene jo bʉbopelo bwɨtʉ. Sela
9 Abandʉ balɨ bo ʉmʉʉji,
boosa baa itolo.
Lɨnga kʉbapɨma bakaja nʉ bʉsito nabʉmo,
boosa pamopeene bapepe ʉkʉkɨnda ʉmʉʉji.
10 Mulɨngasʉʉbɨlaga ʉbʉsyobi,
ʉtʉndʉ ʉtwa bʉhɨɨji mulɨngiifunɨlaga.
Lɨnga ɨfyʉma fyɨnu fikongelela,
somma ʉkʉfisʉʉbɨla.
11 Kyala aajobile ʉlwa kwanda naapɨliike,
kangɨ aajobile ʉlwa kabɨlɨ poope naapɨliike,
ɨsi ikʉtɨ, “Amaka gaa jʉ Kyala,”
12 kangɨ nʉ kʉtɨ, “Alɨ ni ipyana,”
namanga, “Ikʉmfwɨka kʉkʉtɨ mundʉ,
ʉkʉkongana nɨ mbombo syake.”a