Ʉkʉlongosigwa nʉ kʉlɨndɨlɨligwa
Ʉlwɨmbo ʉlwa Ndaabɨti.
25
Gwe NTWA, ngʉkʉsʉʉbɨla ʉgwe.2 Gwe Kyala gwangʉ, ngʉkʉsʉʉbɨla ʉgwe,
ʉndʉʉle ndɨngasʉʉka,
abalʉgʉ bangʉ balɨngaanyangalɨlaga.
3 Aba bikʉkʉsʉʉbɨla alɨngasʉʉka najʉmo,
looli basʉʉkege aba bakʉsambʉkiile.
4 Gwe NTWA, ʉʉnangɨsye ɨnjɨla syako,
ʉʉmanyisye ʉkʉsikonga.
5 Ʉʉndongosye mbwanalooli bwako, ʉʉmanyisye,
paapo ʉgwe gwe Kyala, ʉmpoki gwangʉ,
ngʉkʉsʉʉbɨla ʉgwe ʉbʉsikʉ boosa.
6 Gwe NTWA, ʉkʉmbʉke ɨkɨsa kyako ni ipyana lyako,
filiko ʉkʉfuma liijolo.
7 Ʉlɨngasikʉmbʉka ɨmbiibi syangʉ,
ʉbʉtʉlanongwa ʉbwa mbʉtubwa bwangʉ.
Gwe NTWA, ʉngʉmbʉkege ʉkʉkongana ni ipyana lyako,
kʉnongwa jaa booloolo bwako.
8 ɄNTWA nnunu kangɨ ngolofu,
fyobeene ikʉbamanyisya abatʉlanongwa ɨnjɨla jaake.
9 Ikʉbalongosya mbʉgolofu abaa lwijiisyo,
ikʉbamanyisya ɨnjɨla jaake.
10 Ɨnjɨla syosa ɨsya NTWA,
sya ipyana nʉ bwanalooli,
kʉlɨ aba bikʉʉmɨɨlɨla ʉlwitɨkano lwake,
nɨ ndagɨlo syake.
11 Gwe NTWA, kʉnongwa jaa ngamu jaako,
ʉʉhobokele ʉbʉtʉlanongwa bwangʉ bwingi.
12 Jo jwani ʉmundʉ ʉjʉ ikʉntiila ɄNTWA?
Ʉjo, ɄNTWA aikʉmmanyisya ɨnjɨla jaa kʉkonga.
13 Ikʉnogaga fiijo amasikʉ goosa,
abaa ndʉjungu lwake bikwisa kʉkaba ɨkɨlɨngo kya kiisʉ kyabo.
14 ɄNTWA mmanyaani gwa ʉjʉ ikʉntiila,
ʉmwene ikʉnsetʉlɨla ʉlwitɨkano lwake.
15 Amaaso gangʉ bwila ganndʉʉlaliile ɄNTWA.
Ʉmwene aikʉgasoosyamo amalʉndɨ gangʉ mu ntego.
16 Ʉngeete, ʉlɨɨmbaakɨsya,
namanga ʉne ndɨ niimwene, ngʉtaamigwa.
17 Ʉmboke ʉbʉtolwe mu ndumbula jangʉ,
ʉʉsoosyemo mu ndaamyo.
18 Ʉsikeete ɨngʉbɨlo syangʉ nʉ bʉtolwe bwangʉ,
ʉʉhobokele ʉbʉtʉlanongwa bwangʉ boosa.
19 Ʉbakeete abalʉgʉ bangʉ, bingi fiijo,
baambengile fiijo.
20 Ʉʉndɨndɨlɨle, ʉmboke.
Ngʉkʉbopela ʉgwe, ndɨngasʉʉka.
21 Ʉbʉgolofu nʉ bwanalooli fiindɨndɨlɨle,
paapo ngʉkʉsʉʉbɨla ʉgwe.
22 Gwe Kyala, ʉbapoke abandʉ baako Isilaɨli,
ʉbapoke mbʉtolwe bwabo boosa.