Ʉlwipuuto lwa mundʉ ʉngolofu
Ʉlwɨmbo ʉlwa Ndaabɨti.
26
Gwe NTWA, ʉʉnosye,paapo ʉne ndɨ ngolofu mbʉʉmi bwangʉ boosa,
nʉnsʉʉbiile ɄNTWA, kɨsita kwilaamwa.
2 Gwe NTWA, ʉʉngele, ʉngeete muno njɨɨliile,
gweneesye ɨndumbula jangʉ nɨ nyiinogono syangʉ.
3 Ɨliipyana lyako lɨlɨ kɨfuki na niine,
ngwenda mbwanalooli bwako.
4 Ndikwangala na bandʉ abaa mwalo,
ngaja nʉ bʉlɨɨlanisi na basyobi.
5 Nsibengile ɨngomaano sya babomba mbiibi,
andikʉbʉngaanaga na bandʉ abatʉlanongwa.
6 Gwe NTWA, ngʉsugusula amaboko gangʉ,
ʉkʉnangɨsya ʉkʉtɨ ngaja nʉ bʉtʉlanongwa,
nʉ kʉkɨsyʉngʉʉtɨla ɨkɨgemo kyako,
7 bo ngwɨmba ʉlwɨmbo ʉlwa kʉkʉgwɨla ʉlʉpi,
nʉ kʉfumusya ɨmbombo syako ɨsya kʉswigɨsya.
8 Gwe NTWA, njɨganile ɨnyumba jaako,
pabʉjo apa bʉlipo ʉbʉsisya bwako.
9 Ʉlɨngambyuta palɨkɨmo na batʉlanongwa,
pamo ʉkʉbʉtaaga ʉbʉʉmi bwangʉ,
pamopeene na bandʉ aba bikoona iilopa.
10 Ɨmbombo syabo bwila nyali,
bandʉ aba biisibiile ʉkʉhonga.
11 Looli ʉne ngʉbomba ɨsya bʉgolofu,
ʉmboke nʉ kʉmbaakɨsya.
12 Ɨkɨlʉndɨ kyangʉ kyɨmile pa bʉnunu,
ngʉntuufyaga ɄNTWA pakatɨ pa lʉkomaano ʉlʉkʉlʉmba.