Ɨnguuto jaa mbʉtolwe
Kʉ mpaali gwa lwɨmbo. Ʉkʉkongana nʉ lwɨmbo ʉlʉ bikʉtɨ, Ɨmbabala ɨjaa Nʉlʉbʉnjʉ. Ʉlwɨmbo ʉlwa Ndaabɨti.
22
Kyala gwangʉ, Kyala gwangʉ, fiki ʉʉndekile?aFiki kʉja kʉbʉtali ʉtikʉmboka?
Fiki ʉtikwisa bo ngʉkuuta kʉmyako?
2 Kyala gwangʉ, ngʉlɨla pamuusi, ʉtikʉʉnyaamula,
ngʉlɨla pakɨlo, ndikʉkaba ʉlʉtengaano.
3 Poope ʉgwe ʉlɨ Mwikemo,
ʉgwe jo ʉgwe kʉtuufigwa mwi Isilaɨli.
4 Abiisʉkʉlʉ bɨɨtʉ baakʉsʉʉbɨlaga,
baakʉsʉʉbiile ʉgwe, gwabapokile.
5 Baakʉlɨliile ʉgwe, gwabapokile,
baakʉsʉʉbiile ʉgwe, bakaasʉʉkile.
6 Ʉne ndɨ kafiliifili itolo, ngaja mundʉ.
Abandʉ bikʉʉnyila nʉ kʉʉsyokela.
7 Boosa aba bikʉʉmbona, bikʉʉnyʉʉgɨɨlɨla.
Bikʉʉfyona, bikʉsukaania ɨmitʉ gyabo.
8 Bikʉtɨ, “Ikʉnsʉʉbɨla ɄNTWA,
po ɄNTWA ampoke.
Lɨnga ɄNTWA iikyeliile nagwe, ampoke.”
9 Nalooli, jo ʉgwe gwalɨɨsoosiisye munda mwa jʉʉba,
gwalɨɨndɨndɨliile bo ngonga amabeele gaake.
10 Ngʉkʉsʉʉbɨla ʉkʉfuma pakʉpaapigwa kwangʉ,
ʉkʉfuma munda mwa jʉʉba, ʉgwe gwe Kyala gwangʉ.
11 Ʉlɨngajaga pabʉtali na niine,
ʉbʉtolwe bʉlɨ kɨfuki,
akajapo najʉmo ʉgwa kʉndʉʉla.
12 Abalʉgʉ bingi baasyʉngʉʉtiile,
baasyʉngʉʉtiile bo ʉlwa ngambakʉ ɨngalɨ ɨsya kʉ Basyani.
13 Bikʉʉnyaasamila ɨmilomo gyabo,
bo ʉlwa ngalamu ɨsi sikʉnyangafulania ɨnyama,
ɨsi sikʉbuna bo sikʉlya.
14 Mmaliike bo ʉlwa mɨɨsi aga gooniike,
ɨfifupa fyangʉ fyosa fisegwike.
Ɨndumbula jangʉ jɨfwene bo ʉlwa mpulya,
jengwike nkatɨ mmyangʉ.
15 Amaka gangʉ gʉʉmile bo ʉlwa lʉjo,
ʉlʉlɨmi lwangʉ lʉmɨɨliile kʉ ngego syangʉ.
Ʉʉmbɨɨkile ndʉfumbɨ lwa bʉfwe.
16 Ɨkɨbugutɨla kya bandʉ ababiibi baasyʉngʉʉtiile,
baafinyatiile bo ʉlwa kɨlʉndɨlo ɨkya mbwa,
baanyangafwile mmaboko na mmalʉndɨ.
17 Ɨfifupa fyangʉ filɨ pabwelu mbagiile ʉkʉfibona,
abalʉgʉ bangʉ bikʉʉndʉʉsamila nʉ kʉʉnyʉʉgɨɨlɨla.
18 Baajabeene ɨmyenda gyangʉ,
nʉ kʉbomba ʉbʉlagʉsi ʉbwa nselekesye gwangʉ.b
19 Looli gwe NTWA, ʉlɨngajaga kʉbʉtali na niine!
Gwe bʉtʉʉli bwangʉ, gwise mbɨbɨmbɨbɨ ʉndʉʉle!
20 Ʉmboke kʉ lʉʉbo,
ʉbʉʉmi bwangʉ ʉbʉpoke kʉ mbwa ɨsi.
21 Ʉmboke kʉ ndomo gwa ngalamu,
na kʉ mbembe sya mbogo.
Ʉʉnyaamwile ʉlwipuuto lwangʉ.
Kyala ikʉpaaligwa kʉ bʉtʉʉli bwake
22 Ngʉbafumukɨsyaga abaamyɨtʉ ʉbʉkʉlʉmba bwako,
ngʉkʉpaalaga bo babʉngeene.c
23 Ʉmwe mwe mukʉntiila ɄNTWA, mumpaalege!
Mwesa mwe baa ndʉjungu lwa Jaakobo, muntuufyege!
Mwe Banyaisilaɨli, muntiilege,
24 namanga atikʉbasyokela nʉ kʉbahena,
aboonywa aba balɨ mbʉtolwe,
bo bikʉnndɨlɨla ikʉbaamula,
atikʉbasinda iikosi.
25 Ndʉkomaano lwa bandʉ bingi angʉkʉtuufyaga.
Angʉbombaga ɨsi naafingile, nkyeni ndɨ aba bikʉkwipuuta.
26 Abalondo aabikʉlya nʉ kwikʉta,
aba bikʉnndonda ɄNTWA aabikʉntuufyaga.
ɄNTWA abasaje bwila na bwila.
27 Ɨfiisʉ fyosa aafikʉkʉkʉmbʉkaga,
nʉ kʉkʉgomokela, gwe NTWA.
Abandʉ boosa abaa mfikolo fyosa,
aabikʉmmwipuutaga.
28 Namanga ʉbʉnyafyale bwa NTWA,
jo ʉjʉ ikʉfilagɨla ɨfikolo fyosa.
29 Abakabi boosa abaa pakiisʉ aabikʉlyaga nʉ kʉmmwipuuta,
boope aba balɨ kɨfuki ʉkʉfwa, aabikʉmmwinamɨlaga,
abo bakabagɨla ʉkwipapo ʉbʉʉmi.
30 Abandʉ baa mu sopelo ɨsi sikwisa, aabikʉmmbombelaga.
Aabikʉpangaga ɨnongwa sya Ntwa, kʉ bandʉ abaa mu sopelo ɨsi sikwisaga.
31 Aabikʉfumusyaga ʉbʉgolofu bwake kʉlɨ aba aabikʉpaapigwaga,
aabikʉtɨgɨ, “Kyala jo ʉjʉ abombile ɨsyo.”