Ʉlwipuuto lwa bʉtoli bwa malafyale
Kʉ mpaali gwa lwɨmbo. Ʉlwɨmbo ʉlwa Ndaabɨti.
20
Gwe malafyale, ɄNTWA akwamule pi isikʉ lya bʉtolwe!Ɨngamu jaa Kyala ʉgwa Jaakobo jɨkʉlɨndɨlɨle!
2 Akʉtwalɨle ʉbʉtʉʉli ʉkʉfuma pabʉjo ʉbwikemo,
akʉpe amaka ʉkʉfuma pa kyamba Syoni.
3 Akʉmbʉke fyosa ɨfi kʉnsookesya,
agambɨlɨle amakemo gaako amookye. Sela
4 Kyala akʉpe fyosa ɨfi kʉlonda,
fyosa ɨfi ʉbaatiike fije kanunu.
5 Tʉsekelege kʉ bʉpoki bwako.
Mu ngamu jaa Kyala gwɨtʉ tʉluluutɨlege kʉ bʉtoli bwako.
ɄNTWA akʉpe fyosa ɨfi kʉnsʉʉma.
6 Lɨɨlɨno mmeenye ʉkʉtɨ ɄNTWA ikʉmpoka ʉmpakigwa amafuta gwake,
ikʉmmwamula ʉkʉfuma kʉmwanya kʉmyake kʉ bwikemo,
ikʉmpa ʉbʉtoli kʉ maka gaake amakʉlʉmba.
7 Bamo bikʉsʉʉbɨla amageleeti gaa bwite, abangɨ ɨfalaasi,
looli ʉswe tukʉnsʉʉbɨla ɄNTWA, Kyala gwɨtʉ.
8 Abeene aabikwipɨɨsaniaga nʉ kʉgwa paasi,
ʉswe tukwinʉkaga nʉ kwɨma na maka.
9 Gwe NTWA, ʉmpoke ʉmalafyale,
ʉtwamule bo tukʉkʉkoolela.