Ʉbʉsisya bwa Kyala mbʉpeli
Kʉ mpaali gwa lwɨmbo. Ʉlwɨmbo ʉlwa Ndaabɨti.
19
Kʉmwanya kukʉfumusya ʉbʉsisya bwa Kyala.Ʉmpaalanga gukʉnangɨsya ɨmbombo ɨsya maboko gaake.
2 Kʉkʉtɨ isikʉ likʉjobesania ni isikʉ iinine,
ɨkɨlo kikʉkɨpangɨla ɨkɨlo ɨkɨnine ɨsi kɨsimeenye.
3 Looli fyosa ɨfyo fikaja na masyʉ,
iisyʉ lyabo lɨtikʉpɨlɨkigwa.
4 Ɨndʉmi jaabo jɨbalaniile pakiisʉ kyosa,
ʉkʉfika kʉmmalɨɨkɨsyo ʉgwa kiisʉ.a
Kyala alɨbɨɨkiile ʉbʉjo iisʉba mu mpaalanga.
5 Likʉsooka nʉ lʉsekelo ngatɨ mwega nkiikʉlʉ,
ʉjʉ ikʉsooka nkyumba kyake.
Likʉsekela ʉkʉbopa fiijo,
bo ʉlwa mundʉ ʉgwa maka,
ʉjʉ ikʉbopa ʉkʉbakɨnda abanine.
6 Likʉsooka ʉkʉfuma ɨkɨbafu kɨmo,
likʉsyʉngʉʉtɨla ʉkʉbʉʉka ɨkɨbafu ɨkɨngɨ.
Kakajako nakamo aka kabagiile,
ʉkwepa ʉbʉpyʉ bwake.
Ʉbʉnunu ʉbwa ndagɨlo sya Kyala
7 Ʉlʉlagɨlo lwa NTWA lʉkaagɨlwa nafimo,
lukʉmpa ʉmundʉ ʉbʉʉmi ʉbʉpya.
Ʉlʉbaatɨko lwa Kyala lwa kʉsʉʉbɨligwa,
lukʉbapa amahala aba bakaja nago.
8 Ɨngomeelesyo sya NTWA nunu,
sikʉjɨhobosya ɨndumbula.
Ɨndagɨlo sya NTWA ngolofu,
sikʉmmanyisya ʉmundʉ.
9 Ʉkʉntiila ɄNTWA bo bwelu,
kwa bwila na bwila.
Ɨngomeelesyo sya Kyala sya bwanalooli,
syosa sya bʉgolofu loosa.
10 Sikʉnyonyoofya ʉkʉkɨnda ɨsahabʉ,
ʉkʉkɨnda ɨsahabʉ ɨnunu fiijo.
Nyaafu ʉkʉlʉkɨnda ʉlʉʉki,
ʉkʉkɨnda ɨkɨpepele ɨkya lʉʉki.
11 Kʉlɨ ɨsyo, ʉmbombeli gwako ikʉsokigwa,
ʉjʉ ikʉsikola, ikʉkabamo fiijo.
12 Jwani abagiile ʉkʉsimanya ɨmbiibi syake?
Ʉʉswege ɨsi mbombile kɨsita kwibona.
13 Ʉʉnyeepʉsye ne mbombeli gwako ʉkʉja na matingo,
ʉʉngomole ʉkʉtɨ silɨngaandagɨlaga ɨmbiibi.
Po ngʉjaga nsita nongwa,
ndikʉjaga nɨ mbiibi najɨmo ɨngʉlʉmba.
14 Syosa ɨsi ngʉjoba sikʉhobosyege,
nɨ nyiinogono syangʉ sikʉkyelege.
Gwe NTWA, gwe lwalabwe lwangʉ,
kangɨ gwe mpoki gwangʉ.