Ʉlwɨmbo ʉlwa Ndaabɨti ʉlwa bʉtoli
Kʉ mpaali gwa lwɨmbo. Ʉlwɨmbo ʉlwa Ndaabɨti ʉmbombeli gwa NTWA. Aalɨmmwɨmbiile ɄNTWA bo ampokile ʉkʉfuma kwa Saʉli na kʉ balʉgʉ baake boosa.
(2 Samweli 22:2-51)
18
Gwe NTWA, ngʉganile,ʉgwe gwe maka gangʉ.
2 ɄNTWA jo imato lyangʉ,
ilinga lyangʉ, kangɨ mpoki gwangʉ.
Kyala gwangʉ, lwalabwe lwangʉ,
kʉmyake ko kʉno ngʉbopela.
Ngʉlʉ jangʉ, mpoki gwangʉ,
kangɨ bo bʉbopelo bwangʉ.
3 Ngʉnkoolela ɄNTWA, abagiisye ʉkʉtuufigwa,
ikʉmboka ʉne kʉ balʉgʉ bangʉ.
4 Ɨngoje sya bʉfwe syalɨɨsyʉngʉʉtiile,
ʉmweleesyo gwa lʉpyuto gwalɨɨnyaagile.
5 Ɨngoje sya mbʉsyʉka syalɨmbinyile,
ɨmitego gya bʉfwe gyalɨ nkyeni mmyangʉ.
6 Mbʉtolwe bwangʉ naalɨnkooliile ɄNTWA,
naalɨnndɨliile Kyala gwangʉ ʉkʉtɨ andʉʉle.
Aapɨliike ɨnguuto jangʉ kʉmwanya,
ɨnguuto jangʉ jaafikile nkyeni mmyake.
7 Po ɨkiisʉ kɨlɨnkʉsukaanika nʉ kʉsenyendeka,
ɨnyaalo sya fyamba silɨnkʉjʉngaanika,
silɨnkʉsukaanika paapo Kyala aakaleele.
8 Ɨlyosi lɨlɨnkʉsooka mu mbulo jaake,
nkanwa mmyake gʉlɨnkʉsooka ʉmooto gwa kʉpyuta,
nʉ mooto ʉgwa mabwe aga gikwaka, gʉlɨnkʉlapɨla.
9 Alɨnkʉnyaafula ʉmpaalanga, alɨnkʉsuluka paasi,
kwalɨ ni ibɨngo itiitʉ fiijo, kʉʉsi kʉ malʉndɨ gaake.
10 Alɨnkwitoga pa baakelubu,a alɨnkʉpululuka mbɨbɨmbɨbɨ,
alɨnkʉja pamwanya pa mapɨko gaa mbelo.
11 Alɨnkwikupɨkɨla nɨ ngiisi, alɨnkwifisa ʉmo,
amabɨngo amasito agaa fula galɨnkʉnsyʉngʉʉtɨla.
12 Ɨfimweku ɨfya njasi filɨnkʉmulɨka mmabɨngo nkyeni mmyake,
jɨlɨnkʉtima ɨfula ɨjaa mabwe nʉ nkala ʉgwa mooto.
13 Kʉmwanya ɄNTWA alɨnkʉtajanika,
Kyala ʉNkʉlʉmba alɨnkʉlaata,
jɨlɨnkʉtima ɨfula ɨjaa mabwe agaa mooto aga gikwaka.
14 Alɨnkʉbatonolela ɨmitipʉlo abalʉgʉ baake, alɨnkʉbanyambania,
alɨnkʉbakoma nɨ njasi, alɨnkʉbakaga.
15 Gwe NTWA, bo ʉbatiiliisye abalʉgʉ,
nʉ kʉguluma kʉ bʉkalɨ bwa bwite,
po paasi pa nyanja palɨnkʉboneka,
ɨnyaalo sya kiisʉ silɨnkʉsetʉligwa pabwelu.
16 Kyala alɨnkʉgolosya ɨkɨboko kyake ʉkʉfuma kʉmwanya,
alɨnkʉʉnyeega ʉne,
alɨnkʉʉsoosya ʉkʉfuma mmɨɨsi amingi.
17 Alɨnkʉmboka kʉ balʉgʉ abaa maka amingi,
aba baalɨɨmbengile fiijo,
paapo baalɨ na maka mingi ʉkʉngɨnda ʉne.
18 Bo ndɨ mbʉtolwe, baaliisile kʉkʉlwa na niine,
looli ɄNTWA aalɨ jo ngʉlʉ jangʉ.
19 Alɨnkʉndwala pabʉjo ʉbweleefu,
alɨnkʉmboka, paapo aaliikyeliile na niine.
20 ɄNTWA aalɨɨmbombiile ʉkʉkongana nʉ bʉgolofu bwangʉ.
Aalɨɨmbombiile bo ʉlo paapo ngaja na kababye nakamo.
21 Nsikongile ɨnjɨla ɨsya NTWA,
ngansambʉkɨla Kyala gwangʉ.
22 Nsikolile ɨndagɨlo syake syosa,
kangɨ ngakilaniamo ɨngomeelesyo syake.
23 Nkyeni mmyake ngaalɨ nɨ nongwa najɨmo,
nabwepʉkɨlaga ʉbʉtʉlanongwa.
24 ɄNTWA aasajile ʉkʉkongana nʉ bʉgolofu bwangʉ,
nkyeni mmyake ngaja na kababye nakamo.
25 Kʉ bandʉ abaa bwanalooli,
kʉnangɨsya ʉkʉtɨ ʉgwe ʉlɨ gwa bwanalooli,
kʉ bandʉ abagolofu,
kʉnangɨsya ʉkʉtɨ ʉgwe ʉlɨ ngolofu.
26 Kʉ bandʉ abeelu ʉlɨ mwelu,
looli kʉ bandʉ abakomu ʉlɨ nkalɨ.
27 Ʉgwe kʉbapoka abaa lwijiisyo,
looli abaa matingo kʉbasulusya.
28 Gwe NTWA, kʉʉnyaakɨsya ɨnyaale jangʉ.
Kyala gwangʉ, kʉjɨpela ɨngiisi ʉkʉja lʉmuli kʉmyangʉ.
29 Kʉ bʉtʉʉli bwako ngʉbatola abalʉgʉ abingi,
kʉmbapo amaka agaa kʉnyeela ʉlʉpaso.
30 Ɨnjɨla jaa Kyala jɨkaagɨlwa nakamo,
ʉlʉfingo lwa NTWA lwa nalooli.
Ʉmwene ngʉlʉ kʉ bandʉ boosa aba bikʉbopela kʉmyake.
31 Jo jwani jo Kyala? Mwene ɄNTWA.
Jo jwani jo lwalabwe? Mwene Kyala gwɨtʉ.
32 Kyala jo ʉjʉ ikʉmbapo amaka,
ikʉjɨpela ɨnjɨla jangʉ ʉkʉja nunu.
33 Ikʉgakasya amalʉndɨ gangʉ bo ʉlwa mbabala,
ikʉmbela ʉkʉbopa mfyamba.
34 Ikʉgamanyisya amaboko gangʉ ʉkʉlwa ʉbwite,
ʉkʉtɨ gabʉpɨndege ʉbʉpɨnde ʉbwa kɨbʉngʉ.
35 Ʉgwe kʉmba ɨngʉlʉ ɨjaa bʉtoli,
ɨkɨboko kyako ɨkiilɨɨlo kikʉngasya ʉne,
ʉbooloolo bwako bʉmbelile ʉkʉja nkʉlʉmba.
36 Kweleesya ɨnjɨla jangʉ,
ʉkʉtɨ amalʉndɨ gangʉ galɨngatyelemukaga.
37 Naabakongile abalʉgʉ bangʉ nʉ kʉbakola,
ndikʉgomoka kʉnyuma mpaka bo mbapyutile.
38 Naabagwɨsiisye paasi, baatoliigwe ʉkwinʉka kangɨ,
naabagogile, baagwile paasi pa malʉndɨ gangʉ.
39 Ʉgwe gwalɨmbeele amaka agaa kʉlwa ʉbwite,
gwabataagile paasi pa malʉndɨ gangʉ.
40 Gwabapelile abalʉgʉ bangʉ ʉkʉbopa,
aba baalɨɨmbengile, naabapyutile.
41 Baakuutile ɨnguuto, looli akaalipo ʉgwa kʉbapoka,
baalɨnndɨliile ɄNTWA, looli akaabaamwile.
42 Naabakanyeenie, balɨnkʉja bo ʉlwa lʉfumbɨ,
ʉlʉ lukʉbelelʉsigwa nʉ mbelo.
Naabakanyeenie bo ʉlwa matope agaa mu njɨla.
43 Kʉmboka kʉ bandʉ aba bikʉlwa na niine,
kʉmbela ʉkʉja ndagɨli gwa fiisʉ,
abandʉ aba ngabamanya ngʉbalagɨla.
44 Abaheesya bo bikʉpɨlɨka ɨnongwa syangʉ, bikʉndiila,
bikwijiisya kʉmyangʉ.
45 Bikʉkoligwa nʉ lʉtende,
bikʉsooka mmalinga gaabo bo bikʉsɨlɨla.
46 ɄNTWA mʉʉmi! Atuufigwege lwalabwe lwangʉ!
Ɨmɨkigwege Kyala, ʉmpoki gwangʉ!
47 Ʉmwene jo Kyala ʉjʉ ikʉbabukɨsya ʉbʉbiibi abalʉgʉ bangʉ,
nʉ kʉfibɨɨka ɨfiisʉ paasi pa malʉndɨ gangʉ.
48 Ikʉmboka kʉ balʉgʉ bangʉ,
aanyiinwile ʉkʉja pamwanya palɨ aba baambengile,
ikʉʉnyeepʉsya kʉ bandʉ aba bikʉleefya.
49 Gwe NTWA, kʉlɨ syosa ɨsyo,
angʉkʉtuufyaga pakatɨ pa fikolo ɨfya bandʉ,
ngʉjɨmbɨlaga ɨnduufyo ɨngamu jaako.b
50 Ikʉmpa ʉbʉtoli ʉbʉkʉlʉmba ʉmalafyale gwake,
ikʉnnangɨsya iipyana lyake ʉmpakigwa amafutac gwake,
kwa Ndaabɨti nʉ lʉjungu lwake loosa.