Ʉlwipuuto ʉlwa mundʉ ʉngolofu
Ʉlwipuuto lwa Ndaabɨti.
17
Gwe NTWA, ʉpɨlɨkɨsye ɨnongwa jangʉ ɨngolofu,ʉpɨlɨkɨsye ɨnguuto jangʉ, ʉndʉʉle.
Ʉne ngaja nsyobi,
ʉpɨlɨkɨsye ʉlwipuuto lwangʉ.
2 Jo ʉgwe kʉʉnosya pa nongwa jangʉ,
amaaso gaako gabʉbone ʉbwanalooli.
3 Ʉsikeetile ɨsya mbʉtiitʉ mu ndumbula jangʉ,
ʉʉnyiisiile ʉne pakɨlo.
Ʉʉnyeeneesiisye, ʉkasibona ɨmbiibi nasimo,
ndumwile ʉkʉsita kʉjobamo ɨsya bʉtʉngʉlʉ.
4 Ndikʉbomba bo ʉlwa bandʉ abangɨ,
ʉne ngʉlɨkonga iisyʉ lyako,
niijeepwisye mu njɨla sya bandʉ abaa bwite.
5 Ngʉjɨkonga bwila ɨnjɨla jaako,
ngatyelemukamo sikʉ.
6 Gwe Kyala, ngwipuuta kʉmyako,
paapo ʉgwe aakʉʉnyaamula ʉne.
Ʉtege ɨmbʉlʉkʉtʉ syako,
bo ngwipuuta kʉmyako.
7 Nangɨsya iipyana lyako,
ʉgwe gwe kʉbapoka aba bikʉbopela kʉmyako,
ʉkʉfuma kʉ balʉgʉ baabo.
8 Ʉʉndɨndɨlɨle ngatɨ kɨsige kyako,
ʉʉfise nkɨpepo ɨkya mapɨko gaako,
9 nje patali na bandʉ ababiibi aba bikʉʉfwɨma,
abalʉgʉ abagogi aba baasyʉngʉʉtiile.
10 Balɨ nɨ kɨpahʉ fiijo,
biiswile amasyʉ agaa kwijumbɨka.
11 Bangongile, ʉlʉ baasyʉngʉʉtiile,
bikʉʉfwɨma ʉkʉtɨ baangwɨsye paasi.
12 Bikʉlonda ʉkʉʉnyaafulania bo ɨngalamu,
bo ɨngalamu ɨndubwa ɨjɨ jikʉʉsigɨla ʉne.
13 Gwe NTWA, gwɨme, gwaganile nabo, ʉbagwɨsye,
nʉ lʉʉbo lwako mboka kʉ baniongafu.
14 Gwe NTWA, ʉmboke kʉ bandʉ abo,
abandʉ aba ɨkɨjabo kyabo kɨlɨ pakiisʉ apa.
Ʉbafunde nʉ lʉfundo ʉlʉ ʉbabɨɨkiile,
na baanaabo bakabe ʉlʉfundo ʉlwa kʉbafwana,
lʉsyalepo na kʉ baana baa baanaabo.
15 Looli ʉne ngwisa kʉkʉbona na maaso gangʉ,
paapo ʉne ngaja na nongwa najɨmo.
Bo ndembwike, angʉsekela fiijo ʉkʉkʉbona.