3
Ainati Runa Sio Matuhete Makarotana
1 Anomu erepeka runa rei. Tau umetene haineke Yesus nanie ihokai honu, mka sio kahatena ouna sio wasoni oparisaa na mtinte opusu Kristus Yesus. 2 Mka sio kahatena reini mo, anoo runa sio tumatau tewa. Anoo runa ruao. Anoo runa kepeni. Oanamana ohati ruao. Oarinii ata ruao onesi sio pusiso. Oruni mansia nanai. Oatinu tau noa inau noa amau tewa. Sio umau ouna iake osiso oasau tewa, “Ano me atate rei osiku iake.” Oasau sanrei tewa. Anoo manisata tewa. 3 Anoo runa no mansiau tewa runa anoo kanihua runa tumatau no isanaya osiso tewa. Oruni mansia nanai runa oapamese anoo tewa. Sio no hau. Openeso tau sae waroni manisata. 4 Orui no netau osi no nisau. Ouna sae isa, ne oarinii tewa. Ohati ruao. No suka maise tuniai rerihoni no suka opusu Anahatana. 5 Oakarota oamahaiso ouna-una sae waroni Anahatana ne suka mani. Ne ouna sae waroni Anahatana ne suka titue-tue pusi anoo tewa. Aeua hainau rerihoni sio reini. 6 Tau sae, sio umau oapamanu sio tumatau na otapiso onusu no numau. Onusu no numau oyo, oakarota sio pinau wasoni oparisaa sae mani reiso opusu sio makarotana rei. Sio pinau rei no rosau panesi. Opalalosa opusu no maue kahatena panesi. 7 Masike sio oatuheteso suiosa, sio oanei tewa sae waroni titue, sae waroni titue tewa. 8 Sani masuae Yanes runa Yambres onesi Musa, sio reini onesi maunau titue. Sio oarinii pusu sae waroni kahatena mani. Anahatana ipenei tanuso tau oparisaa sae waroni titue tewa. 9 Ne mka oapamanu sio panesi tewa. Mka sio pusiso oanei ata sio reini oariruneso sani masuae sio oanei ata Yanes runa Yambres oariruneso oi.
Paulus Iaunau Timotius Honu
10 Ne ano mo, ano apusu pusire waroni uatuhetea tanure. Ano aanei ia-ia uamahaiku sapani. Ano aanei rerihoni uheu uuna sae. Ano aanei uparisaa tau maunau titue sapani. Ano aanei usapare tanuso sapani runa anoku runaso sapani. Ano aanei uapamese sapani. 11 Uapamese pannuhu sio ouna au sinsaraku. Ano aanei ata sio ouna sinsaraku sui niane Antiokhia, niane Ikonium, runa niane Listra. Ne masike sinsaraku iae, uapamese, oyo Upuri iakahaiku na uamahaiku sirinia. 12 Sio pusiso wasoni nanie oamahaiso ouna-una sae waroni Anahatana ne suka mani pusu anoo osa runa Kristus Yesus, mka sinsaraso. 13 Mka sio kahatena runa sio makarotana oakapena kahatena mainae honu. Mka oakarota sio umau aikee, sio tamena oakarota sio makarotana ruao oi. 14 Ne masike sio kahatena sanrei iae, kahurae ano ruamu arime maunauna waroni sio oatuhetea tanure sirinia. Maunauna waroni ano aparisaa tanure. Arimere tau ano aanei ata sio wasoni oatuhetea tanure, oatuhete pannuhu. 15 Arimere tau on ano ikine asi ano aanei Anahatana ne anamanaya monna. Pusu anamanaya rai, ano aanei sapani na mka Anahatana iapuheua na aamahaia rotu-tu ria supani haineke Anahatana pusu aparisaa tau Kristus Yesus. 16 Anahatana ne anamanaya pusire, Anahatana iruire osi ne mamsimana na okanure osiki. Pusu ne anamanaya rai, Anahatana iatuhete ita rerihoni sae waroni manisata. Iuna ita ianei re rosau, oyo ianei sapani na mka ipalalosa tewa nea. Iatuhete ita iamahaita manisate. 17 Anahatana irui ne anamanaya rai na sio wasoni oanori oanei pusire kahurae sio ounare. Reiso mka ouna sae mani iake.