2
Aapamese Sinsaraya Tau Maunau Iake Rerihoni Kristus Yesus
1 Reiso ano mo, anaku, atapi ata Anahatana irui kawasa osia pusu irui iake osia tau anomu osa runa Kristus Yesus. 2 Ano runa sio panesi honu oatinu Sou Iake rerihoni au nea. Sou Iake rei, aatuhetei osi sio wasoni ano aparisaaso runa oanei oatuhetei osi sio umau honu.
3 Aapamese rotu-tu sinsaraya sani pusita wani iaunauso rerihoni Kristus Yesus. Aapamese sani ia soratatue waini iake iapamese sinsarai. 4 Auna sani ia soratatue iamauna inana ne tanei mani. Patapariki runa ruai ne atata tewa. Inana ne tanei mani na ne kapitane anoi iake. 5 Auna sani ia waini iapataruna. Ia waini iapataruna ipusu maunauna na mka isupu piala. Kani ipusu maunauna pusire tewa, mka isupu piala tewa. Ano iae apusu maunauna pusire na mka asupu piala on roe Anahatana. 6 Auna sani ia mamrahue waini iamauna. Ia sahoro ne kawasa inana atuhu naone. 7 Aarinii sae waroni au mato uasau rei, na mka Upuri iakahaia aanei pusire.
8 Anomu erepeka runa Yesus Kristus na aapamesei. Imatai, oyo iamahaiki honu. Ia Daud upui. Areimo Sou Iake wani au uaunauso tanui. 9 Au wani sinsaraku tau uaunauso tau Sou Iake rei. Ne masike sio onusuku pani pui anoe iae, oyo okanihooku tau ranta sani au kahatene, Anahatana ne Sou Iake rei, sio pisa okanihooi tewa. Sio pisa onetei tewa. 10 Reiso uapamese pusire na uakahai sio wasoni Anahatana ininiso na oparisaa runai. Uapamese na sio rei oi, mka Anahatana iapuheuso tau oparisaa tau Kristus Yesus, oyo orueso okatai roe naniai wani rinane eresita ita-itane. Okatai rotu-tu ria supani. 11 Aapamese tau anamanae reini titue-tue,
Munata ita ipeneta iuna sani naone,a
mka iamahaita ikatai rotu-tu ria supani.
12 Munata ita iapamese sinsarata,
mka irime tuniai reini ikatai.
Ne munata ita iasau ata iationai tewa,
mka iasau ata iationa ita tewa oi.
13 Munata ita iparisaa tewa nea,
ia iuna sani naone iasau sirinia.
Tau sae, ipusu ne hali reiso iakarota tewa.
Pene Atapi ata Sio Matuhete Makarotana Oakarotaya
14 Aakiraso rerihoni sae waroni au uasau osia. Aaunauso na Anahatana inoo. Aaunauso na pene otuntana runa anamanaya. Otuntana sanrei, areimo tau sae isa tewa. Hasae ounaso oparisaa ia-ia tewa nea. 15 Anina ia-ia na Anahatana iasau ata ano mo, ano iake. Anina na anana me taneiu iaka na pene aaumaa rerihoni me taneiu rai. Aaunauso pannuhu rerihoni Anahatana ne anamanaya rai. 16 Pene aatinu tau sio wasoni oanamana ramnahu huie, oanamana kahatene. Tau sae, sio wasoni oanamana sanrei, mka ouna sae wani Anahatana ne suka tewa mainae honu. 17 Pene aatinu tau anamanaya waroni ramnahu huie. Tau sae, anamanaya rai rahari na sio panesi oatinure sani apate erehari na mainae. Himeneus runa Filetus wasoni sio ua oanamana sanrei. 18 Sio reimo oatuhete pannuhu tewa rotu-tu sio umau oanei tewa nea kahurae oparisaa sae. Sio reimo oasau ata Anahatana iapuhai sio matana nea. Reiso sio umau oparisaa tau maunau titue tewa nea. 19 Ne Anahatana ne anamanaya, sio mka onenire tewa. Anahatana ne anamanaya sani numa aikune makae poe hue. Anahatana ne anamanaya rai rakahai sio wasoni oparisaa na oapamese. Numa ereoo tau nene aikune rei makae reiso repamese. Sani pusiso oanei ia numa upue ia seia tau sio okanu nanai tau hatu tinipae, “Upuri iationa sio wasoni titue-tue ne mansiau,” runa “Sio wasoni ooi Yesus tau ‘Upuku’, kahurae oarihoni no isanaya.”
20 Pani ia kaya ne numa wani mainae isupu piruna runa apia sanrei nitaya panesi. Umau hunonia mainaya, sio otukare rerihoni hunahane te, sanaa te. (Sanaa, nooi sani hunahane ne putie.) Ne umau honu hunonia mainaya tewa, sio otukare rerihoni ai te, tuamane te. Piruna iaka, sio oai tanure tau karisaa mainaya. Ne piruna tamena, sio oai tanure pannuhu sio ruao mani. 21 Reiso ia waini iarihoni pusire waroni kahatena, ia sahoro mka ianori runa Upuri iake. Inapa nanie Upuri iuna tanei sae mani wani Upuri mka iaisosiki unai. Tanei sae mani wani iake. Ia mo, ia manisate onate. Reiso ia sani piru iake. Sio oautue pirune ruae osi numa upue na erenapa numa upue rei inanai tau tanei iake.
22 Reiso aeu hainau rerihoni kahatena waroni sio honua no maue opusure. Anina na anomu manisate, aparisaa tau maunau titue, anomu runa Anahatana runa sio pusiso. Auna anomu kaie runa sio wasoni oainisi tau Upuri anoo manisata. 23 Pene aanamana runa sio wasoni oanamana rirunena. Sio reini mo, sio oatuheteso ia-ia tewa. Pene aanamana osiso. Tau sae, ano aanei nea. Sio ounaso otuntana mani. 24 Ne Upuri ne manorine kahurae pene ituntana. Ne kahurae ia ianamana iake runa sio pusiso. Kahurae ianei iatuheteso ia-ia runa imanu tanuso. 25 Kahurae iatuhete tau manne sio wasoni onesiki. Kahurae iatuheteso tau manne na kani Anahatana mka iunaso oarihoni no rosau runa oparisaa maunau titue. 26 Kahurae iatuheteso tau manne na oanei ruao honu, oyo orumaso rerihoni sae wani ia aia sakahatene ne mamsotae. Ia aia sakahatene iakarotaso nea na opusu ia ne maue.