PAULUS NE SURATE OSI TITUS
1
Tapeae
1 Anaku Titus,
Au, Paulus, ukanu surate reini. Au wani Anahatana ne manorine runa Yesus Kristus ne maisosie. Ihitiku na uakahai sio wasoni ininiso na oparisaa runai. Uakahaiso na oparisaai ia-ia. Ihitiku na sio oanei maunau titue waroni rakahaiso oamahaiso ouna-una sae waroni Anahatana ne suka mani. 2 Reiso mka oparisaa ata oamahaiso rotu-tu ria supani. Anahatana ianei iakarota tewa. Oni ihaye tuniai reini tewasi, itotoe ata mka ne mansiau oamahaiso rotu-tu ria supani. 3 Oyo erelai umetene wani Anahatana ihetei, oyo iatuhete ne maunauna rai osi sio panesi pusu ne manorina oaunauso tanure. Iparisaa maunauna rai osi au oi na uaunauso. Anahatana Ia Waini Iapuheuso sahoro iaisosiku.
4 Ukanu surate rei osia, Titus. Ano wani anaku tau ano aparisaa sani au reini oi. Uainisi tau Amari Anahatana runa Kristus Yesus Ia Waini Iapuheuta osimo sanrei, “Ama. Upuku Yesus. Masike Titus ipalalosa iae, orui iake mainae osiki sirinia. Ounai ikarihuru iamahai.”
Titus Ne Tanei Nau Nusa Kreta
5 Uarihonia nau nusa Kreta na apamanisa taneiu waroni pusire tewasi. Uarihonia nau rei na ano ahiti sio onata tau sio wasoni oparisaa. Ahitiso sui niana pusire sani naone uaisosia. Areimo uaisosia sanrei: 6 Ahiti ia waini sio pisa oasau tewa ata ne isanae, sahai osa mani ne isahu-sahui tewa. Ahiti ia waini ne hehuka oparisaa tau Kristus runa pene sio umau oasau ata ne hehuka rei sio ikina wasoni uao anoa ihuta te oatinu tau no mansia mainaya tewa. 7 Ia onate tau sio wasoni oparisaa inana Anahatana ne tanei reiso ahiti ia waini sio pisa oasau tewa ata ne isanae. Ahiti ia waini ihati ruai tewa runa ia waini anoi eresaa rapu tewa. Ahiti ia waini ininu panesi tewa runa ia waini iatana panesi tewa. Ahiti ia waini anoi runa kepeni tewa. 8 Ne ahiti ia waini anoi iake iararuma sio wasoni ohokaso noi ne numa, ia waini ne suka runa sae waroni iaka, iapamese anoi, anoi manisate, ia manisate onate. 9 Ahiti ia waini irime kuru tau maunauna rerihoni Yesus Kristus waroni ita pisa iparisaare sani ami aatuhetea tanure nea. Irime kurure na ianei iaunau sio wasoni oparisaa runa sae waroni manisata. Irime kurure na ianei iapamanu sio wasoni onesire.
10 Tau sae, sio panesi onesi maunauna rai oatinu tau sio mainaya tewa, mataanoe sio wasoni sinasi sio Yahudiu. Oakarota runa oanamana ramnahu huie. 11 Kahurae ohoni sio rei hohao na pene oatuheteso sanrei. Tau sae, sio ouna kaka wani pusiso na oparisaa sae waroni manisata tewa nea tau sio oatuheteso titue tewa. Oatuheteso onina kepeni panesi mani. Ouna sanrei ereuna erepumaa mani. 12 Ia mamsimane isa rerihoni Kreta ruai iasau sanrei, “Sio Kreta wasoni oakarota suiosa. Sio sani binatang seaya. Sani pisa iatuhete binatang seae tewa na anoe manisate, sio Kreta oi, pisa oatuheteso tewa na anoo manisata. Sio wasoni sio tai onata wasoni ohanamata.” 13 Ia mamsimane rei, iasau titue. Reiso aapamanu sio wasoni oparisaa nau Kreta rei ia-ia ata sio reimo oatuhete eresana. Aapamanuso na sio oparisaa tau maunauna waroni titue sirinia. 14 Aapamanuso na pene sio oatinu tau sio Yahudiu no mamrunia waroni titue tewa runa pene oatinu tau maunauna rerihoni sio wasoni openeso tau maunauna waroni titue. 15 Pusire waroni iake osi sio wasoni anoo manisata. Ne osi sio wasoni oapaputiso runa oparisaa tewa, sae isa iae wani iake osiso tewa. Tau sae, anoo ranoa runa no paputia. Ouna isanae ne oahana ata sio no isanaya tewa. 16 Sio oasau ata oationa Anahatana. Aikee ita ianei ata sio oationa Anahatana tewa tau no atata waroni kahatena rai. Sio wasoni anoo rakopuso, oatinu tau Anahatana ne maunauna tewa, oanei ouna saeisa wani iake tewa.