4
1 Kristus Yesus mka ihokai honu mai tuniai reini na iapasana pusita. Iapasana ita wani iamahaita runa sio wasoni omataso nea. Ihokai honu na irime tuniai reini. Reiso uaisosia, Anahatana runa Kristus Yesus onoo. 2 Uaisosia aaunauso tau Anahatana ne anamanaya. Aaunau sio wasoni nanie oatinu tanure runa sio wasoni openeso oatinu tanure. Asima osiso rerihoni kahurae ouna sae. Kani ouna isanae, aasau osiso. Aaisosiso na pene ouna isanaya. Aaunauso asapare tanuso. Aatuheteso asapare tanuso. Aatuheteso ia-ia. 3 Tau sae, mka tau muie sio openeso oatinu tau sio wasoni oatuheteso pannuhu. Ne mka oamanou sio matuhetena panesi osi sio ruao. Sio matuhetena wasoni onana sio anoo na oaunauso pusu sio ruao no suka oatinu. Oamanou sio matuhetena rei tau sio nanie opusu ruao no maue kahatene. 4 Mka openeso oatinu sae waroni titue. Ne oatinu tau mamrunia waroni titue tewa. 5 Ne ano mo, aanei ruamu suiosa. Aapamese sinsaraya. Asima runa Sou Iake osi sio wasoni oatinui tewasi. Aanori runa Anahatana auna pusi me taneiu. 6 Tau sae? Au mo, urui ruaku na umataku pusu Anahatana ne maue. Areimo sani sio oohu sanaute poe tuamane osi Anahatana pusu Anahatana ne maue. 7 Rerihoni Sou Iake, uaunauso tau we mkonae pusiki sani ia waini iapataruna irumai tau ne mkonae pusiki. Au uuna pusi we taneiu nea sani ia waini iaparatuna irumai rotu-tu iniku yaute. Uparisaa tau Kristus Yesus ia-ia rotu-tu reini. 8 Reiso sani ia iapataruna waini ne untu isupu piala, Anahatana iaunutu sae isa osi au oi tau anoku manisate. Upuri waini iapasana manisate mka iruiki osiku. Mka iapasanata oyo iruiki. Ne iruiki osi au ruaku tewa. Ne mka iruiki osi sio pusiso wasoni anoo rarihu na ihokai honu.
Paulus Iainisi Na Timotius Ihokai Mai Tanui
9 Anina ia-ia na ahoka rapu mai. 10 Tau sae, Demas ieu iarihoniku nea. Anoi runa tuniai reini runa sae waroni isupu mai rei reiso iarihoniku nea. Ieui pani niane Tesalonika nea. Kreskes ieui pani otoe Galatia nea. Titus ieui pani otoe Dalmatia nea. 11 Hasae Lukas sahoro ikataku asi. Aeu mai akata Marukus. Tau sae, ianei iakahaiku uanori runa Anahatana. 12 Aeu mai tau uaisosi Tikhikus pani niane Efesus nea. 13 Mka ahokaya, arori we papi titie osiku. Papi titie wani uarihoniki runa Karpus pani niane Troas. Arori we surata rerihoni unte tarakasi runa we surata tamena oi.
14 Aleksander, ia tukane tampaka, iuna kahatene mainae osiku nea. Mka Upuri iapasanai pusu sae wani iuna osiku. 15 Reiso asaka-saka ia-ia na pene iuna kahatene osi ano oi. Tau sae, inesi ita re maunauna.
16 Uanamana unete ruaku mataanoe, ia isa ihokai tewa na iakahaiku unete ruaku. Ne sio pusiso oruma oarihoni au ruaku. Uainisi na Anahatana pene iapasanaso tau rei. 17 Ne Upuri ikata runaku. Irui kawasa osiku na uaunauso tau Sou Iake pusiki na sio wasoni sio Yahudiu tewa oatinui. Upuri iakahaiku na pene sio ohunuku sani inanaku rerihoni maisan hohae na pene maisan ereaiku. 18 Reiso uanei ata mka Upuri iakahaiku na inanaku rerihoni pusire waroni kahatena ro-rotu-tu iroriku roe noiyaha na uamahaiku rotu-tu ria supani. Iroriku roe noiyaha, irime tuniai on roe rei. Mai, na iainaa runai ro-rotu-tu ria supani. Amin.
Paulus Iauwatu Tapeae
19 Uauwatu tapeae osi Priskila runa Akwila runa Onesiforus ne mansiau. 20 Erastus ipusu au on pani niane Korintus tewa. Waipani iruei pani rei asi. Trofimus, uarihoniki pani niane Miletus tau ikupui. 21 Anina ia-ia na ahokaya mai samatoro musum mahatane. Ebulus, Pudes, Linus runa Klaudia oauwatu tapeae osia runa rea kakau rea waniu wasoni oparisaa pusiso.
22 Uainisi osimo sanrei, “Ama. Akata runa Timotius sio. Masike opalalosa iae, arui iake osiso sirinia.”