PAULUS NE SURATE MATAANOE OSI TIMOTIUS
1
Tapeae
1 Anaku Timotius,
Au, Paulus, ukanu surate rei. Au maisosie wani Kristus Yesus runa Anahatana oaisosiku. Anahatana iapuheuta na iamahaita rotu-tu ria supani. Kristus Yesus waini ita iparisaai. 2 Ukanu surate rei osia, Timotius, ano sani anaku susu tau ano aparisaa. Uainisi tau Amari Anahatana runa Upuri Kristus Yesus, “Ama. Upuku Yesus. Masike Timotius ipalalosa iae, orui iake mainae osiki sirinia. Anomo runai. Ounai ikarihuru iamahai.”
Ainati Runa Sio Matuhete Makarotana
3 Au we maue na ano aruea pani kota Efesus sirinia sani uasau osia nea. Ueu pani otoe Makedonia, uaisosia arue pani Efesus nea. Arue pani Efesus na aaunau sio umau wasoni oatuheteso tau maunauna waroni titue tewa. Aaisosiso na pene oatuhete sanrei nea. 4 Aaisosiso na pene anoo ranoa rapusu mamrunia waroni titue tewa. Pene anoo ranoa rapusu noa upu nanao waroni roha-rohaya tewa. Arai pusire hasae raunaso tau otuntana runa umau mani. Sio ouna Anahatana ne maue ereeu tewa. Ne maue wani sio oaneiki pusu oparisaai. 5 Aaisosiso sani au mato uasau rei na sio anoo runa tumata. Anoo runa tumata pusu anoo manisata. Anoo runa tumatau pusu hasae ouna sae waroni oanei ata manisata. Anoo runa tumata pusu oparisaa manisate maunau titue. 6 Sio umau ouna sanrei tewa nea. Reiso oanamana ramnahu huie mani. 7 Tau sae, nanie oatuheteso tau Musa ne maunauna. Aikee sio ruao oanei Musa ne maunauna rai tewa. Masike ouna ruao sani oaneire iae, oaneire tewa. Oanamana inamatane.
8 Ita ianei ata Musa ne maunauna waroni iaka. Hete sae, sio ounare pannuhu. 9 Kahurae anori rapeka ata Anahatana irui maunauna rai osi Musa na iaunau sio kahatena tanure. Iruire osi sio manisata tewa. Iruire osi sio wasoni openeso opusu maunauna. Iruire osi sio wasoni oatinu tanui tewa, osi sio wasoni ouna sae wani ia ne suka tewa. Iruire osi sio wasoni opalalosa wasoni anoo manisata tewa. Iruire osi sio wasoni opusu akama tewa runa sio wasoni ohunu noa inau, noa amau. Iruire osi sio mamhunua. 10 Iruire osi sio maneaya pina hanaie. Iruire osi sio hanaia osoulaha runa sio hanaia, sio pinau osoulaha runa sio pinau. Iruire osi sio wasoni okimanaka mansia. Iruire osi sio makarotana runa sio wasoni oasau ata mka ouna sae isa, oyo ounai tewa. Iruire osi sio wasoni ouna sae mani maunau titueu waroni ranetere. 11 Uaunauso tau Sou Iake wani Anahatana iparisaai osi au na uaunauso tanui, uaunauso tau maunau titueu rai oi. Areimo Sou Iake rerihoni Anahatana wani ne rinane wani ita-itane eresita. Anahatana waini kahurae ita iainaa runai.
Anahatana Irui Iake Osi Paulus
12 Au uasau osi Upuri Kristus Yesus, “Upuku, Yesus. Ano mo, ano iake. Arui kawasa osiku na uanori runaya. Ano aahata pisa aparisaaku reiso ahitiku na unana tanei osia. Ano mo, ano iake tunne naiosa.”
13 Naone uanamana kahatene rerihoni Kristus Yesus. Au uuna ne mansiau sinsaraso. Umakaniai. Ne masike uuna sanrei iae, Anahatana anoi runaku. Tau sae, uanei tewa wani uuna sae. Uparisaa tau Kristus tewasi. 14 Upuri irui iake mainae osiku na uparisaa tau Kristus Yesus nea. Irui iake mainae osiku na anoku runai.
15 Anamanae reini titue-tue reiso ita pisa iparisaa ia-ia, “Kristus Yesus ihokai mai tuniai reini na iapuheu sio wasoni opalalosa.” Au we rosau panesi ranesi sio pusiso. 16 Ne Kristus anoi runaku. Au wani upalalosa mainae erenesi sio pusiso. Ne isapare tau au sahoro upalalosa mainae, areimo siaie osi sio pusiso wasoni mka oparisaa tau ia, oyo oamahaiso rotu-tu ria supani. Iatuheteso sapani na isapare tanuso. Iarihoni isapare tanuso tewa. Iatuheteso pusu isapare tanuku.
17 Uainisi osi Anahatana sanrei, “Ama. Uamuiraya runa uainaa runaya rotu-tu ria supani. Ano wani Aia osi sio naene tau naene napisi tau napisi. Ano wani pisa amataya tewa. Ami pisa anooa tewa. Hasae taa ano sahoro ano Anahatana titue. Amin.”
18 Anaku, Timotius. Sani ia kapitane iaisosi ne soratatua, au oi uaisosia. Uaisosia pusu sae waroni sio onata oasau osia naone. Oahusiea osima runa sapani na mka pani muie oanori runa Anahatana. Uaisosia na sani ia soratatue iahita runa ne nisau, ano oi anesi sio matuhete makarotana. 19 Anesiso aparisaa ia-ia tau maunau titue runa hasae auna sae waroni aanei ata manisata. Sio umau openeso ouna sanrei reiso oparisaa tau maunau titue tewa nea. 20 Himeneus runa Aleksander wasoni sio ua sanrei. Reiso sio ruao. Utapiso na ia aia sakahatene, ne kawasa tanuso nea na oanei ata kahurae oarihoni oanamana kahatene rerihoni Anahatana.