3
Oainisi Osima
1 Mania kakau, mania waniu. Tau muie ami aainisi na omi oainisi tau Anahatana osima. Oainisi na sio panesi honu oatinu maunauna rerihoni Upuri on sini. Oainisi na sio oparisaa tau maunauna rai sani omi naone oparisaare. 2 Oainisi na Upuri isakama rerihoni sio wasoni oakahate tanuma. Tau sae, sio pusiso oparisaa tau mani maunauna rai tewa.
3 Ne ita iparisaa Upuri iake. Reiso ianei ata mka iakahaimo oparisaa ia-ia sirinia. Ianei ata mka inetemo na pene ia aia sakahatene iakarotamo. 4 Omi oparisaa tau Upuri reiso omi wani opusu sae waroni ami aaunaumo tanure nea. Ami aaneiki nea. Reiso ami aanei ata mka opusu mani maunauna waroni tau surate rei oi.
5 Ami aainisi tau Upuri, “Ama. Aakahai sio Tesalonika na oanei anomu runaso sapani. Aakahaiso na masike sinsaraso iae, oapamese anoo sirinia. Oapamese anoo sani Kristus ruai iapamese anoi.”
Openemo Tau Sio Hanamatana
6 Mania kakau, mania waniu. Ami aaisosimo tau Upuri Yesus Kristus ne kawasa na pene oatani sio wasoni ohanamata runa sio wasoni opusu maunauna tewa. Maunauna waroni ami aaunaumo tanure. 7 Omi ruamo oanei sapani na kahurae oamahaimo. Oanei tau onoo sapani na ami aamahaima kua omi tihue. Ami ahanamata tewa. 8 Ami aai ia isa ne muaine tewa on asenui tewasi. Asenui samatoro aaima. Tau onone, tau ranie anana taneiu panesi na pene auna mtinte tau ia isa rerihoni omi rei. 9 Ami mani kawasa aaisosimo na oakahaimo osamama tau muaine. Ne masike mani kawasa iae, aaisosimo tewa na auna siaie osimo na oanei oamahaimo sapani. 10 Ami akatamo asi, aaisosimo sanrei, “Ia seia ipenei inana tanei, pene osamai tau muaine.”
11 Ami aaunaumo sanrei tau aatinu ata sio umau rerihoni omi wasoni ohana-hanamata. Oamauna tewa. Onehu runa mansiau no masanau. 12 Ami aaisosi sio wasoni sanrei tau Upuri Yesus Kristus ne kawasa. Aaisosiso sanrei, “Pene otuntana runa umau. Ne onana tanei na ruamo osupu mo muaina.”
13 Mania kakau, mania waniu. Pene oarihoni ouna iake. Pene ohanamata ouna iake. 14 Munata ia isa ipenei ipusu maunauna waroni ami akanu mai surate reini, areimo osima runai osi sio pusiso. Pene oatani ia rei na mka iaumaa. 15 Ne pene ohiti nisa runa ia. Hasae oaunaui sani moa kakau moa waniu.
Maunauna Waroni Nesia Tau Muie
16 Ami aainisi tau Upuri ruai waini iunata ikarihuru iamahai, “Ama. Una sio Tesalonika okarihuru oamahai suiosa tau pusire. Akata runaso.”
17 Au, Paulus, uauwatu tapeae osimo. Au ruaku ukanu surate reini nene otoe reini. Uakakina we surata pusire sanrei na omi oanei ata au, Paulus, uauwatui. Ukanu sanrei.
18 Ami aainisi tau Upuri Yesus Kristus, “Ama. Masike sio Tesalonika opalalosa iae, arui iake mainae osiso sirinia.”