PAULUS NE SURATE MATAANOE OSI SIO TESALONIKA
1
Tapeae
1 Mania kakau, mania waniu wani oparisaa tau Yesus Kristus pani kota Tesalonika. Omi wani Amari Anahatana runa Upuri Yesus Kristus no mansiau,
Au, Paulus, ukanu surate rei. Silas runa Timotius wasoni okataku oi.
Ami aainisi tau Anahatana sanrei, “Ama. Masike sio Tesalonika opalalosa iae, arui iake mainae osiso sirinia. Aunaso okarihuru oamahai.”
Sio Tesalonika Oparisaa Ia-ia
2 Ami aasau osi Anahatana suiosa, “Mania ama, Anahatana. Ano iake tunne naiosa. Sio Tesalonika wasoni oparisaa tau ano ia-ia asi.” Ami aainisi tau Anahatana, ami ahete nanamo suiosa. 3 Ami aainisi tau Amari Anahatana, anoma rapeka runa mo atata waroni omi ounare tau omi oparisaa. Anoma rapeka sapani na oanori runaso tau anomo runa Anahatana. Anoma rapeka sapani na oapamese. Masike sio ounamo sinsaramo iae, oapamese sirinia. Tau sae, oparisaa runa Upuri Yesus Kristus.
4 Mania kakau, mania waniu. Anahatana anoi runamo. Anahatana ininimo. 5 Ami aaunaumo tau Sou Iake rerihoni Yesus Kristus tau anamanaya ruaya tewa. Ne ami aaunaumo tau Sou Iake runa kawasa rerihoni Anahatana Ne Inaha reiso aanei ata Anahatana ininimo. Ami aanei ia-ia ata Sou Iake rei titue. Omi oanei sapani na ami aamahaima aanori runamo tau akatamo.
6 Omi mo, omi wani oamahaimo sani ami aamahaima. Omi wani oamahaimo sani Upuri iamahaiki. Areimo, masike sio ounamo sinsaramo mainae, omi oatinu tau maunauna anomo miri-mirika. Anahatana Ne Inaha sahoro iuna anomo miri-mirika. 7 Reiso omi ouna siaie osi sio pusiso wasoni oparisaa sui otoe Makedonia runa otoe Akhaya. 8 Tau sae, sio panesi oatinu rerihoni omi oparisaa sapani. Sio Makedonia runa sio Akhaya ruao oatinu tewa. Ne sio sui supani-supani mani oatinu tau maunauna rerihoni Upuri. Reiso ami asima osiso tewa sapani na omi oparisaa. Sio oanei nea. 9 Pusiso oruni rerihoni omi oararumama sapani. Ahokama pani tanumo, oatapeama iake. Sio oruni rerihoni sapani na omi oarihoni oainaa runa anahatanau waroni titue tewa na ouni oanori runa Anahatana. Anahatana waini titue. Waini iamahaiki. 10 Sio oruni rerihoni sapani na omi onapa Anahatana Anai ihokai honu on roe noiyaha. Anai waini imatai oyo iapuhaiki. Ia reimo Yesus waini mka iapuheuta na pene Anahatana iapasanata. Mka Anahatana anoi erenuku-nuku erenaka-naka reiso iapasana sio wasoni opalalosa.