28
Paulus Sio Pani Malta
1 Hoka ria muni pusima aamahaima oyo, ami aatinu rerihoni sio nusa niane ata ahokama ria nusa nanae Malta. 2 Sio nusa niane rei oatapeama iake runa oakahaima. Uane. Mahatane. Reiso oakanupu usa osima na aasama haineke usa rei. 3 Paulus ieu iamanou menia, oyo iaunutu menia poe usa. Iaunutu menia poe usa oyo, teke minne isa erehokai rerihoni usa rei nanie ererumai rerihoni titie. Oyo ereoto Paulus hanai. Erealapasiki tewa. 4 Sio nusa niane onoo ata tekene rei erealapasiki tewa, oyo oasau osi umau, “Ira oe. Titue. Ia rei ihunu tumata. Masike imatai nau nuae tewa iae, ia anahatana isa, anahatana waini iapasana pusita osa nanie ihunui pusu tekene rei. 5 Ne Paulus ikunariri hanai, oyo tekene rei erealapasi rerihoni hanai. Erealapasiki oyo, remnahui poe usa. Paulus iake. 6 Sio oahata mka-mka Paulus hanai ereposu te mata hun tewa oyo, iamnohoi imatai. Ne sio onapa potuina, oyo onoo ata ia iake sirinia. Reiso anoo rarinii tamene, oasau ata Paulus waini ia anahatana isa.
7 Tau otoe rei wani ia mainae tau nusa rei ne tuamane. Ia mainae rei nanai Publius. Iatapeama iake, oyo iainisi ami na aararane ria ne numa. Aararane ria ne numa rei onona tonu. 8 Tau muie rei, Publius amai ikupui. Ipusai runa tiai ereoto reiso inekei. Paulus ieu inooi, oyo iainisi runa iahusiei. Iainisi oyo, ia kupue rei iake. Ikupui tewa nea. 9 Areimo sanrei oyo, sio kupua pusiso sui nusa rei ohokaso mai Paulus. Paulus isuisene sio pusiso, oyo iake. 10 Sio oamuirama orui panesi osima. Ami nanie aeu aarihoniso nea, oyo oautue muaina runa apia roe kapane osima na ami mani apia apakere runa mani muaina tau mani weka roe kapane anoe.
Paulus Sio Oeu Oarihoni Malta Rotu-tu Ohokaso Roe Roma
11 Ami aruema pani nusa Malta hunana tonu oyo, aeuma asaa kapane wani erehokai on nau Aleksandria. Ereruei pani nusa Malta rotu-tu musum mahatane pusiki. Roe kapane uae wani siaie rerihoni sio no anahatanau waroni titue tewa. Oaoiso tau “Anahatanau Sio Alalekau.” 12 Kapane rei ereruma rotu-tu remamanui pani namane Sirakusa, oyo aamamanuma pani kota rei onona tonu. 13 Ita asaa kapane rei honu rotu-tu ahokama poe namane Regium. Hanroe oyo, ihute on nau haha. Reiso kapane ereruma rotu-tu nene hanroe sanrei, oyo remamanui poe namane Putioli. Hoka poe oyo, asipuma on roe kapane rei. 14 Poe rei asupu sio umau wasoni oparisaa tau Yesus. Sio rei oainisi na aararane akataso rotu-tu onona itu. Reiso ahokama roe Roma sanrei. 15 Sio wasoni oparisaa roe Roma oatinu ata ami wani ahokama. Reiso sio umau oeu rotu-tu sio umau ohokaso pani Pasar Apius runa sio umau honu ohokaso pani nia Numau Tonu. Ohoka oatapeama. Paulus isupuso, oyo ianamana osi Anahatana sanrei, “Amaku, Anahatana. Ano iake. Ano aaisosi me mansiau rei ohokaso oautunuma rotu-tu ahokama roe Roma.” Iasau sanrei, oyo iahana anoi kaie. 16 Ahokama roe Roma oyo, otapi Paulus ruai iruei tau ne numa isa ikata ia soratatue isa waini isaka-sakai.
Paulus Iaunauso Roe Kota Roma
17 Paulus wairo kota Roma onona tonu nea oyo, ianaha runa sio ona Yahudiu ohokaso noi tanui. Hoka poe oamanouso samatoro Paulus iasau sanrei, “Wea kakau, wea waniu. Masike au uuna sae isa tewa na unesi ita Yahudiu. Masike au uuna sae isa tewa wani rei monna ita isupure rerihoni rea upu rasopota iae, sio Yahudiu roe Yerusalem oaisosiso osotaku, oyo oruiku osi sio wasoni ia Natu Kaisar mai Roma iaisosiso. 18 Ia natu Kaisar ne mansiau oasei tanuku, oyo nanie oalapasiku. Tau sae, osupu sae isa tewa wani au uuna kahatene na mka ohunuku. 19 Sio Yahudiu rei openeso tau ia Natu Kaisar ne mansiau oalapasiku. Reiso otentene tanuku na uainisi na ia Natu Kaisar iatinu we parakana rei na iasau sae wani titue, sae wani eresana. Masike au nanie uamanaru wea kakau, wea waniu wasoni sio Yahudiu tewa, sio otentene tanuku uainisi sanrei. 20 Areimo sanrei, reiso uanaha runamo na unoomo, oyo uanamana osimo. Tau sae, sio okanihooku tau rante rei tau uparisaa tau ia waini ita Israel iparisaa ata mka ihokai.”
21 Oyo sio ona Yahudiu oasau osiki sanrei, “Ami asupu surate isa on pani Yudea tewa, mai eresima runa ano. Ia Yahudi isa tewa ihokai isima runaya. Ia isa iamanarua osi ami reini tewa. 22 Ne ami nanie aatinu rerihoni ano aparisaa sapani. Tau sae, ami aanei ata sui supani-supani mani sio oanamana kahatene rerihoni sio Saraneu wasoni opusu ano me maunauna.”
23 Reiso ohete umetene na oamanouso honu. Tau ranie hatae rei sio ohetei nea, sio panesi ohokaso noi Paulus ne numa erenesi sio wasoni ohokaso mataanoe. Ohokaso tau omnanoe oyo, Paulus iatuheteso rotu-tu ranie manne. Iatuheteso runa isima osiso runa sapani na Anahatana iuna natu mai tuniai reini. Paulus iaunauso pusu Musa ne maunauna runa sio mamsima runa Anahatana ne anamanaya no surata na iunisui reaso na oparisaa ata Yesus waini Ia Anahatana Iratiki Iapuheuso. 24 Sio umau oparisaa tau Paulus ne anamanaya. Ne sio umau honu openeso oparisaa. 25 Sio Yahudiu otuntana runa umau nanie onuniso nea. Reiso Paulus iasau osiso sanrei, “Masuae Anahatana Ne Inaha iuna Yesaya, ia mamsima runa Anahatana ne anamanaya isa, iasau titue. Iasau osi moa upu sani Anahatana iasau sanrei,
26 ‘Aeua sui me mansiau rei, oyo aasau,
“Mka tinamo ukuna raatinu we maunauna,
ne omi oaneire tewa.
Mka matamo usena ranoo sae waroni au uunare,
ne omi oaneire tewa.”
27 Mka sio oanei tewa tau openeso oarinii manisate.
Openeso oatinu tau tinao ukuna.
Openeso onoo tau matao usena.
Munata openeso tewa, mka matao usena ranoo oyo oanei.
Munata openeso tewa, mka tinao ukuna raatinu oyo oanei.
Munata openeso tewa, mka oarinii manisate oyo oanei.
Oanei, oyo anoo rauni rapusu au
na au uuna heu no rosau.’”
28 Reiso kahurae omi oanei ata maunaune rei rerihoni sapani na Anahatana iapuheuso na oamahaiso rotu-tu ria supani haineke Anahatana, iruiki osi sio wasoni sio Yahudiu tewa. Mka sio oatinu.” 29 Paulus iasau sanrei, oyo sio Yahudiu rei onuniso. Oeu otuntana runa umau.
30 Paulus iruei roe Roma musum ua. Iruei tau numa wani isehai. Iatapea sio pusiso wasoni ohokaso onooi runa oanamana osiki. 31 Iaunauso rerihoni sapani na Anahatana iuna natu mai tuniai reini. Iaunauso rerihoni Upuri Yesus Kristus. Iaunauso mai manahane, iauhuniki tewa. Ikaitau tewa. Sio osopoi tewa.