SOU IAKE RERIHONI YESUS WANI MARKUS IKANUI
1
Yohanes ia mamsohu heu rosau iseka tau arena osi Yesus
1 Au nanie uruni rerihoni Sou Iake nene aikune. Sou Iake reini mo, nene aikune rerihoni Yesus. Ia mo, Anahatana Iratiki na Iapuheu Mansia. Ia mo, Anahatana Anai. 2 Sou Iake rei nene aikune wani sani masuae wani ia mamsima runa Anahatana ne maunauna isa waini nanai Maleakhi ikanui. Ikanu ata Anahatana iasau sanrei,
“Mka uaisosi we ia maisosie na ianaone, ano tau muie,
na ia rei iaunauso, nooi sani iseka tau arena osia.”
3 Oyo ia mamsima runa Anahatana ne maunauna isa honu, waini nanai Yesaya, ikanu ata Anahatana iasau sanrei,
“Ia isa nioi iakapona pani otoe huie sanrei,
‘Sani sio oseka tau arena osi ia mainae,
aunauso rerihoni au, na oatinu tau Upuri
sani ouna arena katopue mka ieu.’”
4 Yesaya ikanui sanrei, areimo sani Yohanes ihokai pani otoe huie. Ihokai na isohuso tau tihu na sio umau onoo ata oarihoni no rosau nea. Iaunauso sanrei, “Oarihoni mo rosau na Anahatana isiru heu mo rosau rai. Oarihonire, oyo usohumo.”
5 Mansia pusiki sui otoe Yudea runa kota Yerusalem ohoka, nanie oatinu Yohanes ne maunauna. Oamanaku no rosau, oyo Yohanes isohuso pani Wae Yordan.
6 Yohanes mo, iausahu papite wani ounai arihoni unta nene unte. Inene koropou unte pani ahai. Iai kauka runa kilalan wesie. 7 Iaunauso sanrei, “Mka ia isa ihokai tau muie. Ia reimo mka ne kawasa mainae erenesi au. Au mo, au mainae tewa. Reiso ukanahata na unosu ne sanraliu arihoni aini atua mani iae, iake tewa oi. 8 Usohumo tau tihu na sio onoo ata oarihoni mo rosau nea. Ne ia sahoro mka irui Anahatana Ne Inaha osimo.”
Yohanes isohu Yesus
9 Oyo Yesus ihokai on poe nia Nazaret poe otoe Galilea, samatoro Yohanes isohui ria Wae Yordan. 10 Isohui pusi oyo, Yesus ihokai arihoni waene rei, inoo nante erehekai. Oyo Anahatana Ne Inaha isipui. Anahatana Ne Inaha rei mo, nooi sani manu puane, samatoro inusui pani Yesus. 11 Inusui oyo, oatinu nioke isa on roe noiyaha ereasau sanrei, “Ano mo, au anaku wani anoku runaya. Anoku iake tau ano.”
12 Mata huni tewa oi, oyo Anahatana Ne Inaha iaisosi Yesus ieui ria otoe huie. 13 Reiso iruei ria rei onona hutu ate. Oyo ia aia sakahatene iakarotai na ipusui. Binatang seana warora rei oi. Ne sio maisosia on roe noiyaha ohoka oakahaiki.
Yesus ioi sio mamhikua ate
14 Sio oaresi Yohanes nea, oyo Yesus ieu poe otoe Galilea. Ieui poe rei nanie isima runa Sou Iake wani on roe Anahatana. 15 Hoka poe oyo, isima iahata, “Potuina tewa oi, oyo mka Anahatana irime tuniai reini. Oarihoni mo rosau. Oparisaa tau Sou Iake wani on roe Anahatana.”
16 Yesus waini ieu ipusu Wae Galilea nusue, oyo inoo sio mamhikua ua. Sio ua reimo Simon runa wanini Andreas. Uaso wasoni ohiku onina ikae. 17 Yesus iasau osiso iahata, “Oeu mai na oeu opusu au. Mka uatuhetemo na oeu ohiku tumata osiku.”
18 Oyo oarihoni no ueta rai sirinia, samatoro oeu opusu Yesus.
19 Yesus ieu hainau mkane, ita inoo Zebedeus ne hehuka, Yakobus runa wanini Yohanes. Uaso wasopani arupae anoe oseka tau no ueta. 20 Oyo Yesus ioiso rei sirinia. Reiso oarihoni noa ama pani arupae anoe rei runa sio umau honu. Oarihoniki runa sio wasoni isehaso na opakarian osiki rei. Oyo uaso oeu opusu Yesus.
Yesus inei sakahatene arihoni tumata
21 Yesus runa ne mampusua oeu rotu-tu ohokaso pani kota Kapernaum. Tau ranie hatae wani iaranahata isa, Yesus inusui pani sio Yahudiu no numa manoune, nanie iatuhete noi rei. 22 Sio wasoni oatinui rei, osira tau ne matuhetene rei. Tau ia mo, iatuhete runa ne kawasa. Iatuhete sani sio matuhete Musa ne maunauna tewa.
23 Oyo ia isa waini iauwena runa sakahatene inusui pani numa manoune rei, oyo iakapona iahata, 24 “E, Yesus, ano Nazaret. Nanie auna sae tanuma reini? Ahokaya nanie ahunuma si? Uaneia nea. Ano mo, ano manisate onate. Ahokaya on roe Anahatana!”
25 Ne Yesus ihesa tau sakahatene rei. Iahata, “Amaturua! Ahokaya arihoni ia reini.”
26 Reiso ia rei ikananunu tau sakahatene rei eresuniki, oyo iasanoata, oyo sakahatene rei erehokai arihoniki rei sirinia. 27 Erehokai oyo, sio pusiso osira hunu ruao. Reiso oasei mai umau oahata, “Ira, oe! Sae reini? Matuhete honue maa! Tau ne kawasa inei sakahatena, oyo rahokaso rapusu ne maue rei sirinia, tea!”
28 Reiso mata huni tewa oi, oyo sio pusiso sui otoe Galilea oatinu rerihoni Yesus.
Yesus isuisene sio panesi
29 Yesus ikata Yakobus runa Yohanes, oyo tonuso ohokaso oarihoni sio Yahudiu no numa manoune rei, samatoro oeuso poe Simon runa Andreas no numa. 30 Simon inai hanahanai waipo inekei tau ikupui. Reiso osima runa ne kupue rei osi Yesus. 31 Reiso Yesus ieu poe iakahuu ia pina onate hanai atue, samatoro iakahaiki ihitioi. Oyo ia pina onate rei, ne kupue iake rei sirinia. Ia iake nea, reiso inana muaine na ipanaso.
32 Nene manin ruru rei, oyo sio panesi orori sio kupua runa sio wasoni oauwena runa sakahatena. 33 Reiso sio niane hahae rei pusiki, pusiso oamanouso haineke Petrus ne numa mitanunue. 34 Oyo Yesus isuisene sio panesi wasoni osupu kupu nita-nitaya, inei sakahatena. Ne isopo sio sakahatena rei na pene oanamana. Tau oanei ata ia mo, ia seia.
Yesus iaunau pani otoe Galilea
35 Nene hanroe omnano tunne sanrei oyo, Yesus ihanui. Ihanui oyo ieu iarihoni numa rei. Ieui na roe oto huie isa nanie ianamana runa Anahatana. 36 Ne Simon sio oeu oninai. 37 Oeu oninai, oyo osupui. Osupui, oyo oasau osiki oahata, “Sio pusiso wasoni oeu oninaya rei!”
38 Ne Yesus iasau osiso iahata, “Mai, na ieuta sui nia tamena sui otoe Galilea reini. Na uaunauso oi. Tea mo, uhokaku mai rei mo, tau rei, tea!”
39 Reiso Yesus ieu ihori otoe Galilea rei pusiki. Ieu iaunau sui sio Yahudiu no numa manouna runa ieu isuisene sio wasoni oauwena runa sakahatena.
Yesus isuisene ia muhune
40 Kami sepakat untuk memakai kata Tuhan untuk semua rangkaian cerita, walaupun dalam cerita itu memakai nama "Allah". Taue isa ia muhune isa ieu pani Yesus. Hoka pani, irike tune iakapuni Yesus aini isopa ikokuroui. Oyo iainisi na Yesus isuisenei. Iahata, “Upu. Sani me maue mo, mai na asuiseneku, areimo ano me kawasa asuisene.”
41 Yesus anoi runai reiso iakahuui oyo iahata, “Iake. Usuisenea nea.”
42 Ranie hatae rei sirinia, oyo kupue rei rerihoniki rei sirinia. Kupue rei rerihoniki, oyo ia muhune rei iake rei sirinia. 43 Oyo Yesus iaisosiki ieui. Iasau osiki iahata, 44 “Anomu erepeka. Asupu sio umau mo, pene aruni. Ne aeua pani ia mamkenu makapanau osi Anahatana isa na ainisi na iariniia. Arui manua ua osiki na ikenure osi Anahatana sani Musa iaunau rei. Tau rei, sio pusiso mka oanei ata ano iake nea.”
45 Ne ipusu Yesus ne maunaune rei tewa. Ieu suru ria, suru nau iruni osi sio panesi. Iahata, “Yesus isuiseneku.”
Reiso iruni suru ria, suru nau rotu-tu Yesus inusu niana iau-iauhuniki mani. Iruei iauhuniki pani niane muie mani. Ne sio on ria, on nau ohokaso mai tanui sui osa sirinia.