2
Sio oamanaru Yesus tau iasau ata ne kawasa isiru heu rosau
1 Yesus isuisene ia muhune pusi, oyo nene onona ate sanrei, inuniki pani kota Kapernaum. Sio panesi onooi, reiso osima osi umau. Oahata, “Yesus waipani ihokai nea.”
2 Reiso sio panesi ohoka oamanouso haineke numa rei rotu-tu sio umau mo, osupu naniao tewa nea. Pani muie, haineke mitanunue iae, sanrei sirinia. Sanrei oyo, Yesus iaunauso tau maunauna waroni on roe Anahatana. 3 Oyo sio ate ohokaso orori ia talae isa, nanie ororiki mai Yesus. 4 Ne sio panesi rei oneteso. Reiso oeu mai tanui iake tewa. Reiso osaa roe numa hahae, samatoro onosu ainataya waroni ranete numa rei, oyo oratiki tau ne kinoe poe Yesus. 5 Oratiki oyo, Yesus inoo ata sio rei oparisaa ata ia imaha heu kupue rei. Ta san rei oyo, Yesus iasau mai ia talae rei iahata, “He anaku, me rosau, usiru heure nea.”
6 Ne sio matuhete Musa ne maunauna umau wasoni oru-rueso pani rei. Oatinu Yesus ianamana san rei, oyo oasei pani anoo oahata, 7 “Ia mo, masike nai osa, ianamana sanrei. Nooi sani ia mo, Anahatana rei. Ia seia sahoro imaha isiru heu rosau sani Anahatana? Anahatana ruai sahoro imaha isiru heu rosau.”
8 Ta sanrei oyo, Yesus ianei sio rei anoo. Reiso iasau osiso iahata, “Omi nanie oasei pani anomo sanrei, nanie tahae? 9 Sani uasau osi ia talae reini, ‘Me rosau, usiru heure nea.’ Ne sapani na oanei ata kani usiru heure te tewa? Ne sani uasau osiki, ‘Ahanua, ahetu me kinoe rei, oyo ruamu aeu.’ omi mka oanei ata au we kawasa usuisene. 10 Ne muie reini, unina na oanei ata, mai tuniai reini, Au, Tumata Reini, Anahatana Ihitiku, we kawasa usiru heu rosau.”
12 Oyo ihanui, ihetu ne kinoe rei, oyo ihokai. Sio pusiso onoo ihanui, ihetu ne kinoe rei. Reiso osira. Oainaa runa Anahatana oahata, “Mania upu Anahatana. Ano mo, ano iake tunne nai osa. Ano me kawasa mainae. Una nitae reini mo, ami anoo tewasi.”
Sio oamanaru Yesus tau iaiki ikata sio kahatena
13 Yesus isuisene ia talae isa pusi, oyo ieui pani Wae Galilea honu. Ihokai pani waene nusue, oyo sio panesi ohokaso mai tanui na iatuheteso. 14 Ta Yesus waini ieu ipusu arena pani rei, oyo inoo ia mamnana pea isa waipo iruei poe numa mamnana pea. Ia reimo, nanai Lewi. Amai tau Alfeus. Sio mamnana peau oakahai sio Romau oeu oamanou peau arihoni sio Yahudiu. Sio Romau rei otapiso oakapena na onana kepeni umau osi sio ruao oi. Reiso sio Yahudiu openeso tanuso. Sio oahata sio mo, sio kahatena nai osa sani sio kimanakana. Yesus ioi ia rei. Iahata, “Aeu mai na apusu au.”
Yesus ioiki oyo ihitio ieu ipusu Yesus rei sirinia.
15 Yesus waini iaiki pani Lewi ne numa, oyo sio mamnana pea runa sio wasoni nusa niane oahata sio kahatena umau rei ohoka oaiso okata Yesus runa ne mampusua oi, tau sio panesi wasoni oeu opusu-pusui oi. 16 Sio matuhete Musa ne maunauna arihoni sio ona akama Yahudi onoo Yesus iaiki ikata sio mamnana pea runa sio wasoni nusa niane oahata sio kahatena rei. Reiso oasei tau Yesus ne mampusua oahata, “Omi mo matuhetene rei nanie iai ikata sio mamnana pea runa sio kahatena rei, nanie tahae?”
17 Iahata, “Sani ia mamsuisene isuisene sio iaka tewa, ne isuisene sio kupua, au oi uhokaku tewa uanaha runa sio wasoni oahata sio ruao, sio manisata. Ne uhokaku uanaha runa sio kahatena.”
Sio oamanaru Yesus tau ne mampusua oamaoni tewa
18 Taue isa Yohanes Ia Mamsohue ne mampusua runa sio ona Farisi pusiso wasoni oamaoni. Oyo sio umau ohokaso mai Yesus, nanie oasei tanui. Oahata, “Yohanes ne mampusua runa sio ona Farisi no mampusua oamaoni. Ne ano me mampusua mo, oamaoni tewa. Oamaoni tewa tau sae?”
19 Iahata, “Tau sio mausahaya oaiseneso, sio wasoni opusu maisene rei oamaoni te tewa? Munata ia hehuke waini ikata sio asi, oaiso sirinia, tea! Oamaoni iake tewa. 20 Ne mka sio umau osota ia hehuke rei, samatoro sio wasoni noi maisene rei oamaoni iake.
21 Sio oaturui papi monae tau nipa sini honue tewa. Tea mo, mka opapa papite rei oyo, erenunui, oyo papite rei wakihai mainae honu. 22 Sio oaiinu anggur sanaute wani honue pani une-une unte wani monae tewa. Tea mo, mka anggur sanaute wani honue rei ereuna unte rei wakihai. Ereuna sai-sai anggur sanaute runa unte uare. Anggur sanaute wani honue mo, kahurae oaiinui tau une-une unte wani honue oi.”
Yesus iatuheteso sanrei na oanei ata maunaune wani honue mo, onehui runa maunaune wani monae mo, iake tewa.
Sio oamanaru Yesus oahata ipusu ranie hatae wani iaranahata tewa
23 Tau ranie hatae wani iaranahata isa, Yesus waini ieu iniku sui nisi isa. Nisi reimo, sio orahui tau manei (nooi sani ana kanie). Yesus ne mampusua oeu ohuku manei rei nene huaya, na oai. 24 Sio ona Farisiu onoo sanrei, oyo oasei tau Yesus oahata, “Masi anoo. Ano me mampusua mo, opusu Musa ne maunauna tewa. Wasoni ohuku manei tau ranie hatae wani iaranahata, nanie tahae?”
25-26 Iahata, “Omi onoo tau Anahatana ne anamanaya tewa, sapani na Daud inana poroti wani sio oruiki osi Anahatana. Poroti reimo, Anahatana hasae itapi sio mamkenu makapanau osi Anahatana ruao mani sahoro oaiki. Aikee Daud inanai. Inanai tau Abyatar iuna ia aihuhue tau sio mamkenu makapanau osi Anahatana. Daud runa sio wasoni okatai rei omakaneaso. Reiso inusui pani Anahatana ne numa mainisie, oyo iai poroti rei. Isama sio wasoni okatai rei oi. Ne ia isa iakapuku tanui tewa. 27 Reiso ranie hatae wani iaranahata mo, Anahatana iunai osi mansia, ihaye mansia tewa na opusu maunauna rerihoni ranie hatae wani iaranahata rei mani. 28 Reiso Au, Tumata Reini, Anahatana Ihitiku, we kawasa uasau sae sahoro Anahatana itapita iunai tau ranie hatae wani iaranahata.”