SIO MAISOSIA NO ATATA
sani Lukas Ikanure
1
Anahatana Iapusaa Yesus Roe Noiyaha
1 Teofilus, we neta.
Tau we surate mataanoe usima runa pusire waroni Yesus iunare runa iatuhetere 2 rotu-tu Anahatana iapusaai roe noiyaha. Naone Yesus iaisosi ne maisosia wasoni ininiso na sio oakahaiki. Iaisosiso runa kawasa rerihoni Anahatana Ne Inaha. 3 Yesus imatai, oyo tau onona hutu ate iatu-atuhete ruai osi ne maisosia na sio oanei ia-ia ata waini iamahaiki honu. Sio onooi, oyo ianamana rerihoni sapani na Anahatana irime tuniai reini.
4 Taue isa, tau Yesus waini iaiki ikataso, iaisosiso sanrei, “Pene oeu oarihoni kota Yerusalem reini. Napa mai kota reini rotu-tu Anahatana irui sae wani itotoe iruiki sani naone uasau osimo rei. 5 Yohanes isohu heu mo rosau tau tihu ne nesie onona ina oyo, Anahatana inusu Ne Inaha osimo.”
6 Reiso tau sio wasoni okata Yesus, oasei tanui, “Upu. Ano nanie ahiti ia Israel tau aia sani masuae, na pene ia rakane isa irime ita nea?”
7 Iahata, “Amaku ruai ihete umetene. Ne itapi omi oaneiki tewa. 8 Ne mka osupu kawasa. Anahatana Ne Inaha mka ihokai tanumo, oyo osima runa au mai kota Yerusalem reini, sui otoe Yudea pusiki, poe otoe Samaria, rotu-tu tuniai reini nene rurue.” 9 Iasau sanrei oyo, Anahatana iapusaai roe noiyaha noi sio mata kahutua. Oyo yahu erenetei reiso onooi tewa nea.
10 Sio wasoni oamrou roe nante asi onooi isaai, oyo sira tau sio ua oausahu papi putia wasoni oooso mai nusuo. 11 Sio rei oasei, “He, omi rerihoni otoe Galilea. Omi wani ooomo oamrou roe nante, nanie taa hae? Yesus rei, Anahatana mato iapusaai roe noiyaha, mka ihokai honu sani sinasi omi onooi isaai rei tea.”
Sio Ohiti Matias Ikati Yudas
12 Sio maisosia onuniso roe kota Yerusalem oarihoni pupue wani nanae Zaitun. Pupue rei haineke kilo osa rerihoni Yerusalem. 13 Ohoka roe Yerusalem oyo, ohokaso mai numa wani sio oararane tanui, samatoro osaaso roe kamar roe naue. Sio maisosia rei wasoni:
Petrus,
Yohanes,
Yakobus,
Andreas,
Filipus,
Tomas,
Bartolomeus,
Mateos,
Alfeus anai waini nanai Yakobus,
Yakobus anai waini nanai Yudas,
runa Simon. Ia rei ipenei tau sio rakana orime ne niane.
14 Sio oamanouso na oanamana runa Anahatana suiosa sio anoo osa. Oamanouso runa sio pinau umau sani Yesus inai waini nanai Maria. Yesus nea waniu okataso oi.
15 Tau sio wasoni oamanouso, Petrus ihitioi roe, nanie ianamana osiso. Sio rei, sio utuni hutu ua. Reiso Petrus iasau sanrei, 16 “Wea kakau, wea waniu. Masuae sio okanu tau Anahatana ne anamanaya ata Anahatana Ne Inaha iuna aia Daud isima runa pani muie mka sapani runa Yudas. Daud isima, oyo ereeu sani iasau rei sirinia. Yudas sahoro iautunu sio oaresi Yesus. 17 Yudas, ia mo, naone ikata ita. Yesus ihitiki na ikata ita na pusita inana tanei osi Anahatana.”
18 (Yudas isupu tuamane nea tau kepeni waroni sio oruire osiki tau ne kahatene rei. Poe tuamane rei, iamnahui, oyo imatai, tiai wapisai, oyo apui unue erehokai. 19 Sio pusiso sui Yerusalem oatinu tau rei, reiso oaoi tuamane rei tau Akeldama tau sio no sou. Nene manariti ‘Tuama Nasi’.)
20 Oyo Petrus iasau honu, “Ia sahoro ikanu Surate Ahinaya ikanu sanrei,
‘Tapi ne numa huie;
Pene ia isa iruei tanui.’
Ikanu honu ata,
‘Tapi ia tamene isa ikatiki.’
21-22 Reiso kahurae inini ia isa na ikatata na isima ata inoo Yesus waini iamahaiki honu. Ia rei, kahurae naone ikata-kata ita tau ipusu Upuri Yesus. Kahurae ia rei ikatata on Yohanes isohu heu no rosau rotu-tu Anahatana iapusaa Yesus roe noiyaha rerihoni ita.”
23 Reiso oatinu tau rei, onini sio ua. Sio reimo wasoni Matias runa Yusuf Barsabas, oaoiki tau Yustus oi. 24 Oyo oainisi sanrei, “Upu. Ano aanei pusiso anoo nea. Autuu na asima ia seia rerihoni sio ua reini sahoro ano aniniki 25 na ikati Yudas. Ikatiki na iuna ia maisosie na inana tanei osia. Yudas iarihoniki nea. Ieui noi naniai nea.” 26 Oyo okanu uaso nanao tau hatu, samatoro oapataure pani kawei anoe. Apataure, samatoro okainisu kawei rei rotu-tu hatu isa erehokai. Hatu wani sio okanu Matias nanai erehokai, reiso oahata ia osa runa sio maisosia hutusa rahana osa tamena.