16
Yesus iamahaiki Honu
1 Ranie hatae rei iaranahata erenikui nea, oyo Salome, Maria (arihoni nia Magdalena) runa Maria (Yakobus inai) tonuso oeu ohane hau rihue nanie osonai roe Yesus tinaini. 2 Tau omnano tunne, ranie hatae mataanoe tau minggu nunue rei, oeuso poe hatu nohue tau ranie eresaa nea. 3 Oasei tau umau oahata, “Ia seia mka iakahaita na ikamauni hatu wani erenete hatu nohue nene mitanunue?”
4 Hoka poe oyo, onoo roe uae, samatoro onoo ata sio okamauni hatu rei arihoni mitanunue nea. Hatu rei mainae nai osa. 5 Reiso onusu pani hatu nohue rei, samatoro sira tau onoo ia honue isa iru-ruei mai hanao wanana. Ia waini iausahu papi putie. Onoo ia honue rei, reiso osira hunu ruao. 6 Ia honue rei iasau osiso iahata, “Pene osira. Onina Yesus arihoni nia Nazaret. Ia waini sio opakui roe hini wani reniene. Waini tewa nea. Waini iamahaiki honu. Masi onoo, naniai wani oaunutui wapo rei. 7 Masi oeu oruni-runi osi Petrus runa sio mampusua pusiso. Osima osiso oahata, ‘Yesus waini ieu ianaonemo poe otoe Galilea nea. Poe rei omi mka onooi sani naone iasau osimo rei.’”
8 Reiso ohokaso arihoni hatu nohue rei, oyo orumaso. Tea mo, osira runa okaitau. Oasau sae isa tewa osi ia seia mani oi. Tea mo, okaitau hunu ruao.
Yesus Iatuhete Ruai Osi Ne Mampusua
9 Yesus iamahaiki honu tau omnano tunne tau ranie hatae mata anoe arihoni minggu unue rei. Mataanoe, iatuhete ruai osi Maria, ia pina Magdalena. Naone, Yesus inei sakahatena itu arihoniki. 10 Reiso Maria, ia pina Magdalena rei, ieu isima ata inoo Yesus waini iamahaiki honu. Isima osi sio wasoni naone okata Yesus. Sio rei wasoni orani oasanoata. 11 Ne oatinu ata Yesus waini iamahaiki honu, oatinu ata Maria inooi nea, oparisaa tewa.
12 Oyo Yesus iatuhete ruai osi ne mampusua ua. Uaso onooi tamene. Onooi pannuhu wasoni oeuso mai nisiu. 13 Reiso onuniso, oyo oruni osi no netau. Oahata, “Ira oe. Ami anoo Yesus waini iamahaiki honu!”
Ne no netau reimo oparisaa tewa sirinia.
14 Tau muie Yesus iatuhete ruai osi ne mampusua hutusa rahana osa pannuhu wasoni oaiso. Iasau nioi mainae. Tea mo, sio opisa unuo tewa runa unuo onata reiso oparisaa tewa wasoni oruni-runi. Oruni ata onoo nea ata Yesus waini iamahaiki honu. 15 Oyo Yesus iasau osiso iahata, “Oeu ohori niana-niana pusire mai tuniai rei. Oaunauso tau Sou Iake wani on roe Anahatana. Oaunau sio pusiso mai tuniai reini. 16 Ia seia waini iparisaa, oyo osohui na sio oanei ata Anahatana iheu ne rosau nea, Anahatana iapuheui na iruei haineke Anahatana rotu-tu ria supani. Ne ia seia iparisaa tewa, mka Anahatana iaisosiki ieui hainau arihoniki. 17 Sio wasoni oparisaa, mka ouna sima-simana sani onei sakahatena tau au we kawasa, oanamana tau sou waroni ruao oaneire tewa. 18 Munata orime tekene te oninu minne, sio rei okupu tewa, omata tewa. Munata oahusie sio kupua tau hanao, mka sio kupua rei iake. Okupu tewa nea.”
19 Upuri Yesus iaunauso pusi, oyo Anahatana iapusaai na roe noiyaha. Roe rei, Yesus isupu kawasa reiso iruei mai Anahatana hanai wanane. 20 Reiso sio mampusua oeu oaunau tau Anahatana ne maunauna sui niana-niana mai tuniai reini pusiki. Upuri iakahaiso oi na ouna sima-simana. Tau rei, sio pusiso oanei ata no anamanaya manisata.