15
Yesus iamanane Pilatus
1 Nene omnano tunne sanrei, sio pusiso, sio onata arihoni sio wasoni osaka okenu makapanau osi Anahatana, sio matuhete Musa ne maunauna runa sio ona Yahudi nesia rei oapamata sou. Okanihoo Yesus, oyo ororiki nanie oruiki osi Pilatus, ia waini ne kawasa tau otoe rei. 2 Ororiki oyo, Pilatus iasei tanui iahata, “Areimo manisate? Ano sahoro auna natu tau sio Yahudiu?”
Iahata, “E-e. Areimo sani ano wamo asaui rei tea.”
3 Sio onata arihoni sio wasoni osaka okenu makapanau osi Anahatana oamanaru Yesus. Oahata, “Ia reimo, ne masanau panesi.”
4 Reiso Pilatus iasei honu tau Yesus. Iahata, “Ano asau sae isa tewa? Masi anoo, sio wasoni osima sapani runaya.”
5 Ne Yesus iamaturui mani. Pilatus inoo sanrei isira.
6 Tau karisaa sio anoo rapeka runa noa upu ohitio oeu oarihoni Mesir, Pilatus isaka ihoka-hoka ia isa arihoni pui anoe waini sio oainisiki. 7 Pani pui anoe ia isa waini nanai Barabas. Ikata sio wasoni oatana runa sio kupaniau, reiso ohunu sio umau. 8 Reiso sio hutue ohokaso, oyo oainisi arihoni Pilatus sanrei, “Upu. Ami ainisi arihonia na ahoka ia isa arihoni pui anoe sani sui osa tau karisaa reini.”
9 Pilatus iasei tanuso iahata, “Onina na uhoka ia natu tau omi Yahudiu osimo?”
10 Iasei sanrei tau inoo ata sio onata arihoni sio wasoni osaka okenu makapanau osi Anahatana orui Yesus osiki tau sio wasoni oananai.
11 Ne sio onata rei oasau osi sio hutue rei oahata, “Oainisi na ihoka Barabas. Pene oainisi na ihoka Yesus.”
Reiso sio oainisi Barabas. 12 Oyo Pilatus iasei honu tau sio hutue rei iahata, “Reiso omi onina na au una sae runa ia reini waini omi oaoiki tau natu tau omi Yahudiu?”
13 Oakapona, “Pakui roe hini wani reniene!”
14 Iasei, “Tau sae? Ia ne isanae sae?”
Oyo oakapona erenesi sinasi oahata, “Pakui roe hini wani reniene!”
15 Pilatus inina na sio anoo iaka reiso ihoka Barabas osiso. Oyo iaisosi sio umau osapu Yesus tau awane unia. Osapui samatoro iruiki osi sio umau na opakui roe hini wani reniene.
Sio opaku Yesus roe hini wani reniene
16 Sio soratatua orori Yesus pani ia onate arihoni kupania ne numa, oyo oanaha runa sio no tikane soratatua pusiso. Oanaha runaso, oyo oamanouso. 17 Sio nanie oaumani Yesus tau sio oaoiki tau natu. Reiso oausahu papi msinae osiki, oyo opepe awane unie wani nonae, samatoro oausahui roe unui. 18 Oyo oatapeai. Oahata, “Arue nai-naimu, natu tau sio Yahudiu.”
19 Ohita-hita unui tau ai sanae, oyo ohuto-hutoi, samatoro orike tune mai Yesus sani oamuirai. 20 Oaumaniki pusi, oyo onosu papi msinae rei, oyo oausahu ruai ne papite osiki honu. Oyo ororiki pani manahane nanie opakui roe hini wani reniene.
21 Sio otentene tau Simon, ia Kirene, na ihana hini osi Yesus. Ia rei Aleksander runa Rufus amai. Ia mato ihokai on pani niane, nanie inusui roe kota. 22 Reiso orori Yesus roe pupue wani nanae Golgota. Golgota nene manariti mo, unuke kanie. 23 Hoka roe oyo, nanie oruiki ininu anggur nene sanaute wani onehui runa mur, na pene iahana tinaini ereina. Ne ipenei ininui. 24 Oyo opakui roe hini wani reniene rei, samatoro opesi hatu kania, nanie osama Yesus ne apia osi ruao. 25 Opakui roe hini tau ranie erehiti-hiti. 26 Oaunutu roe hini, roe unui, ia ne isanae sapani. Okanu, “Natu tau sio Yahudiu.” 27 Opaku Yesus runa sio kimanakana ua roe hini wani reniene oi. Opaku ia isa mai Yesus hanai wanane runa ia isa mai hanai pante. 28 Ouna sani Anahatana ne anamanaya raasau, “Oahata ia rei, ia isa runa sio kahatena.”
29 Sio wasoni onikuso, okoka unuo oaumaniki, oyo orati osohiki, oahata, “He. Ano asau ata mka akohu Anahatana ne numa mainisie, oyo onona ua, oyo apuooi honu. 30 Masi asipua arihoni hini na apuheu ruamu.”
31 Sio onata arihoni sio wasoni osaka okenu makapanau osi Anahatana runa sio matuhete Musa ne maunauna oaumaniki oi. Oahata, “Iapuheu sio panesi ne ianei iapuheu ruai tewa. 32 Kani ia rei waini natu Israel, Ia Anahatana Iratiki Iapuheuso, kahurae isipui arihoni hini rei na inoo runa iparisaa tanui.”
Sio ua wasoni opakuso roe hiniu okatai rei iae, orati sohiki oi.
Yesus imatai
33 Tau ranie katopu, oyo ranie hatae rei erepumonoi pani otoe rei rotu-tu ranie ereuni. 34 Oyo Yesus iakapona nioi mainae tau ia ne sou, “Eloi, Eloi lama sabakhtani?” Nene manariti, ‘Upuku. Anahatana. Aeu arihoniku, nanie tahae?’
35 Sio umau pani rei oatinui ioi sanrei, reiso oasau oahata, “Masi oatinu. Ioi Elia.” Elia mo, masuae ia waini ia mamsima runa Anahatana ne maunauna.
36 Ia isa pani rei irumai inana nokasa sanae. Inonoi poe sanau maninue, samatoro isumai tau ai sanae rurue. Oyo isopai roe Yesus sihurui, inina na Yesus ininu sanaute rei. Isopai roe iahata, “Napa ee. Mai, na inoo ata kani Elia ihokai iratiki arihoni hini wani reniene rei te tewa.”
37 Oyo Yesus iakapona mainae, samatoro nahai erenikui.
38 Nipae wani erenete mitanunue poe Anahatana ne numa mainisie rei wakihai. Eresamai tau ua on roe rurue rotu-tu poe rurue. 39 Ia kapitane tau sio soratatua utuni ioo mai hini rei uae iatinu Yesus iakapona runa inoo Yesus imatai sapani, iahata, “Nene manisate, Ia reini mo, Anahatana anai.”
40 Sio pinau umau wasoni pani rei oi. Sio wasoni oasumata pusire on hainau. Sio rei mo, Salome, Maria arihoni nia Magdalena, runa Maria (Yoses runa Yakobus, ia honue, inai). 41 Tonuso opusu-pusu Yesus. Sani ihokai pani otoe Galilea oakahaiki. Pani rei iae wasoni sio pinau panesi oi. Sio rei ohokaso mai Yerusalem okata Yesus.
Sio oaunutu Yesus
42 Ranie hatae rei, areimo ranie hatae sio oatanunu tau hanroe. Tau sae? Hanroe, areimo ranie hatae rei iaranahata. Tau ranie manne nea 43 Yusuf arihoni nia Arimatea ihokai. Ia rei mo, ia osa arihoni sio ona Yahudiu. Sio panesi oationai runa oamuirai. Ia oi waini inapa ranie hatae rei sio pusiso mai tuniai reini opusu Anahatana ne maue tau sio oanei ata ia mo, ia Natu. Reiso Yusuf iapamese anoi, oyo ihokai mai Pilatus nanie iainisi Yesus hatai. 44 Pilatus iatinu ata Yesus imatai nea, isira. Reiso iaisosi ia isa ioi ia kapitane tau sio soratatua utuni rei. Hoka mai oyo iasei tanui iahata, “Yesus imatai nea?”
45 Iahata, “E-e, upu. Imatai nea.”
Oyo Pilatus iamanaku. Iasau osi Yusuf iahata, “Anana hatai rei.”
46 Oyo Yusuf ihane nipa iake isa, samatoro iaputunu Yesus, oyo iopai tau nipae rei. Oyo inusu hatai rei pani hatu nohue. Hatu nohue rei mo, ounai arihoni hatu tatepie. Inusu tihane hatae rei, samatoro ikamauni hatu mainae isa erenete hatu nohue rei nene mitanunue. 47 Maria, ia Magdalena, runa Maria, Yesus inai, oasumata sio oaunutui.