14
Ia pina isa isona mina roe Yesus unui
1 Nesi onona ua mani samatoro karisaa anoo rapeka runa noa upu oeu oarihoni Mesir runa karisaa sio Yahudiu oai poroti wani eresaa tewa. Sio onata arihoni sio wasoni osaka okenu makapanau osi Anahatana na sio matuhete Musa ne maunauna wasoni onina arena, nanie osota Yesus puru-purumene na ohunui. 2 Oahata, “Ne pene isotai tau karisaa rei. Tea mo, mka mansia pusiso oatanaso. Openeso oatinu tau ita.”
3 Tau rei, Yesus waira nia Betania, ria Simon ne numa. Ia mo, naone ikupu muhune. Oyo ia pina isa ihokai mai Yesus irori potone. Potone rei, ounai arihoni hatu. Oapataui tau mina. Mina rei, ounai arihoni ai namte. Yesus waini iaiki, oyo ia pina rei ihoka, ikuparehi potone tionae, samatoro isona mina rei roe Yesus unui. 4 Sio umau ria rei oakapuku tanui, reiso oasei mai umau oahata, “Ia pina rei iuna sai-sai mina sanrei, nanie tahae? 5 Mina rei mo, sani oaheniki, osupu kepeni panesi. Kepeni sani ia isa isupu tau musum osa. Kepeni rai, sio mka oruire osi sio mosokinia!” Reiso oakapuku tau ia pina rei.
6 Ne Yesus iasau osiso iahata, “Ia ruai! Omi nanie oakapuku tau ia pina rei, nanie tahae? Ia ne hali sanrei osiku, areimo iake. 7 Sio mosokinia wasoni okatamo sui osa. Kani mo maue, omaha oakahaiso sui osa. Ne au mka ukatamo sui osa tewa. 8 Ia pina rei iuna nea. Iuna pusire waroni imaha iunare. Mka umataku, oyo oaunutuku, ne ia pina rei isonaku tau mina ipusu monne naone nea. 9 Manisate. Sui supan-supani mani mai tuniai reini, sio oaunauso tau Sou Iake, mka oatinu rerihoni ia pina rei na anoo rapeka runai.”
Yesus iaiki ikata ne mampusua
10 Yudas Iskariot, ia mo, ia isa arihoni sio mampusua hutusa rahana ua rei, ieui pani sio onata arihoni sio wasoni osaka okenu makapanau osi Anahatana, nanie iaheni Yesus osiso. 11 Sio nanie ohunui, reiso oatinu tau anamanae rei iake. Oahata, “Mka arui kepeni osia.”
Reiso Yudas inina arena, nanie iaheni Yesus osiso.
12 Tau ranie hatae mataanoe arihoni karisaa sio Yahudiu oai poroti wani eresaa tewa. Tau ranie hatae rei sio ohunu rompau. Tau sae? Anoo rapeka runa noa upu oeu oarihoni Mesir. Tau ranie hatae rei, sio mampusua oasei tau Yesus oahata, “Upu. Tau karisaa anori rapeka runa rea upu ohitio oeu oarihoni Mesir, ano nanie aia sui supa?”
13 Reiso Yesus iaisosi sio ua iasau iahata, “Oeumo roe kota. Roe rei, mka osupu ia isa iasaoa tihu tau potone. Oeu opusui 14 rotu-tu noi numa wani inusui rei, oyo oasei tau numa upue rei, ‘Upuri nanie ianei naniai wani sui supa tau ia runa ne mampusua nanie oaiso tau karisaa anori rapeka runa rea upu ohitio oeuso oarihoni Mesir.’ 15 Mka iautuu runa kamar onate roe naue osimo. Roe kamar rei, mka osupu katerau runa pusire warumo matane nea. Roe rei oatanunu osita.”
16 Reiso uaso oeuso roe kota. Hoka roe oyo, osupu pusire sani Yesus iasau rei. Reiso oatanunu muaine tau karisaa anoo rapeka runa noa upu ohitio oeuso arihoni Mesir.
17 Nene pumono pani sanrei, Yesus ihokai roe kakaranae rei runa ne mampusua hutusa rahana ua rei. 18 Hoka roe oyo, oaiso. Sio wasoni oaiso, oyo Yesus iasau iahata, “Uasau osimo, ia isa arihoni omi reini waini iaiki ikataku, mka iaheniku osi sio wasoni nanie ohunuku.”
19 Oatinu tau rei, anoo runai. Ia isa iasei iahata, “Ia reimo, au te sae rei?” Oyo ia isa honu iasei honu iahata, “Ia reimo, au te sae rei?” rotu-tu pusiso oasei sanrei.
20 Oyo Yesus iasau iahata, “Ia rei mo, ia isa arihoni omi hutusa rahana ua reini. Ia rei, waini inono poroti poe pirune osa runa au. 21 Nene manisate mo, au, Tumata Reini, Anahatana Ihitiku, mka ohunuku sani oaunutui noi Anahatana ne anamanaya. Ne ia sahoro iaheniku osi sio wasoni nanie ohunuku, ia ne siraka nai osa. Nene iake tau ia rei, pene iamrae nea.”
22 Reiso wasoni oaiso, oyo Yesus inana poroti. Inana poroti, oyo iainisi iainaa runa Anahatana iahata, “Uainaa runaya mani Upu Anahatana. Ano mo, ano aia tau nante runa tuamane pusiki utui. Auna manei ereruhu on poe tuamane na auna poroti tanui.”
Oyo ikihoi tau hanai, isamai osi ne mampusua, iahata, “Onana poroti rei na oaiki, areini mo, tinaiku.”
23 Ita inana koinanae. Iainaa runa Anahatana iahata, “Uainaa runaya mania Upu Anahatana. Ano mo, ano aia tau nante runa tuamane pusiki utui. Ano ahaye tau anggur huaya.”
Oyo irui koinanae rei osi ne mampusua. Sio pusiso oninu mkane-mkane. 24 Iahata, “Areini mo, au we nasi. Mka umataku, we nasi erenia na sio pusiso oanei ata Anahatana iuna tau sio sani masuae itotoe. We nasi rei erenia tau sio panesi. 25 Uasau osimo, mka uninu sanaute rei tewa nea samatoro uninui honu ukatamo tau Anahatana irime tuniai reini.”
26 Oyo sio ohete ahinae oainaa runa Anahatana samatoro oeuso roe pupue wani nanae Zaitun.
Petrus iakanihu nanai
27 Yesus sio wasoni oeuso roe pupue wani nanai Saitun oyo wasoni arena tinai tihue oyo iasau osi ne mampusua iahata, “Mka pusimo orumamo oarihoniku. Tau sae? Sio oaunutui tau Anahatana ne anamanaya ata Anahatana iasau sanrei,
‘Mka uhunu ia mamsakae,
oyo ne rompau pusiso orumaso sakakau.
Sio umau suru ria. Sio umau suru nau.’
28 Ne mka uamahaiku honu, oyo ueu uanaonemo poe otoe Galilea. Mka opusu tau muie.”
29 Petrus iasau iahata, “Upu. Masike sio pusiso oeu arihonia iae, mka au mo, ueu uarihonia tewa.”
30 Oyo Yesus iasau iahata, “Nene manisate, mka-mka pumono, manue eretunkeko nai ua tewasi oimo, ano asau ata ationa au tewa, rotu-tu nai tonu nea.”
31 Isopo mtinte, “Upu. Masike umataku runaya iae, manisate, upeneku uasau ata au uationaya tewa!”
Oyo ne mampusua pusiso oasau sanrei sirinia.
Yesus iainisi ria Getsemani
32 Oyo Yesus runa na mampusua oeuso ria nisi wani nanae Getsemani. Hoka ria oyo, iasau osi ne mampusua iahata, “Oru-ruemo mai rei na ueu uanamana runa Anahatana.”
33 Oyo ikata Petrus, Yakobus, runa Yohanes. Anoi ereuponu. Iahana anoi mtinte nai osa. 34 Iahata, “Anoku mtinte nai osa. Uahana nanie umataku nea. Onapa mai rei runa osaka.”
35 Oyo ieui hainau mkane, samatoro irike tune poe tuamane. Iainisi tau Anahatana kani ne ukuro rerihoniki. 36 Iahata, “Ama, amaku, ano anei auna pusire. Reiso uainisi arihonia na anana we ukuro rei arihoniku. Ne pene apusu au we maue. Apusu ano ruamu me maue.”
37 Oyo Yesus inuniki pani ne mampusua tonu rei. Isupuso wasopo onekeso. Iasei tau Petrus, “Simon, anekea? Ueu uarihonimo potuina tewasi, ne amaha asaka-saka tewa? 38 Osaka oainisi na pene ia isa ireamo. Ireamo na opalalosa. Manisate, anomo nanie rapusu manisate. Ne okua tewa tau tinaimo ramankaeso.”
39 Oyo ieu iarihoniso honu, nanie iainisi sani sinasi rei honu. 40 Iainisi pusi oyo, inuniki honu pani tonuso. Isupuso onekeso honu. Tau sae? Sio matao mtinta. Reiso oanei tewa oasau sapani osi Yesus.
41 Yesus inuniki mai tanuso nai tonu, oyo iasei iahata, “Onekemo oaranahamo asi? Onekemo erelai nea. Mata huni tewa oyo, oaheni au, Tumata Reini, Anahatana Ihitiku, osi sio wasoni opalalosa. 42 Ohanumo roe na ieuta. Onoo ia waini iruiku ihokai nea.”
Sio osota Yesus
43 Yesus waini ianamana asi, oyo sira tau Yudas, ia isa arihoni sio hutusa rahana ua rei, ihokai ikata sio hutue. Sio rei orori tunua runa kahitata. Sio onata arihoni sio wasoni osaka okenu makapanau osi Anahatana, sio matuhete Musa ne maunauna runa sio ona Yahudi nesia rei sahoro oaisosi sio rei na nanie osota Yesus. 44 Yudas, ia waini iaheni Yesus, iasau osiso naone iahata, “Ia waini oninai, mka umukiki na oationai. Osotai oyo ororiki. Osakai ia-ia.”
45 Yudas ihokai, oyo sira tau ieui mai haineke Yesus iahata, “Upu.” Oyo imukiki. 46 Imukiki oyo, sio rei osotai runa oaresiki. 47 Ia isa waini haineke sio, isaru ne tunue, oyo iseha ia onate arihoni sio wasoni osaka okenu makapanau osi Anahatana ne manorine isa tinai totue hae. 48 Oyo Yesus iasei tanuso iahata, “Omi ata kani uaisosiso na pene oatinu tau kupania? Omi ata kani uaisosiso na pene opusu kupania ne maue? Tau rei, orori tunua runa kahitata nanie osotaku? 49 Ranie hatae isa uatuhete, hanroe, poua rei honu uatuhete roe Anahatana ne numa nusue na onoo. Ne osotaku tewa. Ne osotaku sani reini sani Anahatana ne anamanaya ereasau.”
50 Oyo sio mampusua pusiso oruma oarihoni Yesus.
51 Ia honue isa pani rei, irehe nipae mani, ipusu Yesus. Oyo sio nanie osotai, 52 ne inosu ne nipae rei, oyo irumai sanakui.
Sio orori Yesus pani ia aihuhue tau sio mamkenu makapanau osi Anahatana
53 Sio orori Yesus pani ia aihuhue tau sio mamkenu makapanau osi Anahatana. Hoka pani oyo, sio onata arihoni sio wasoni osaka okenu makapanau osi Anahatana, sio matuhete Musa ne maunauna, runa sio ona Yahudi nesia rei pusiso oamanouso. 54 Petrus ipusu Yesus on ria hainau rotu-tu inusui pani mitanunue arihoni ia aihuhue rei ne numa nene pakelo. Hoka pani oyo, iru-ruei iasa tinaini haineke usa ikata sio mamsakaya. 55 Sio onata arihoni sio wasoni osaka okenu makapanau osi Anahatana runa sio pusiso on sinasi rei onina sio umau na osima runa Yesus ne isanaya na oruiki osi sio wasoni no kawasa ohunui. Ne osupu ne isanae isa tewa. 56 Sio panesi ohoka oruni oakarota rerihoni Yesus, ne sio no mamrunia osa tewa. Pusiso oruni tamena-tamena. Reiso no kawasa tewa na oaisosi sio ohunui.
57 Oyo sio umau ohitio roe, samatoro oruni oakarota rerihoni Yesus oahata, 58 “Ami atinui iasau iahata, ‘Mka ukohu Anahatana ne numa mainisie reini, sio ruao onanai, oyo onona ua, uapuoo honue. Areimo sio ruao oapuooi tewa.’”
59 Aikee sio no mamrunie osa tewa.
60 Reiso ia aihuhue iooi kua tihue, oyo iasei tau Yesus iahata, “Sio rei oruni kahatene rerihonia. Ne ano asau sae isa tewa?”
61 Ne Yesus iamaturui mani. Iasau sae isa tewa. Oyo ia aihuhue iasei honu iahata, “Ano mo, Ia waini Anahatana Iratia Iapuheu Mansia, ia sahoro ita iainaa runai anai?”
62 Iahata, “Au wani rei nea rei tea. Mka pusimo onoo au, Tumata Reini, Anahatana Ihitiku, urue mai Ia waini Ne Kawasa hanai wanane. Mka uhokaku honu runa yahu on roe nante.”
63 Iatinu sanrei, oyo ia aihuhue ikiha ne papite na sio oanei ata anoi eresaa tau Yesus. Iahata, “Kahurae sio oruni oamanarui tewa nea. 64 Omi ruamo oatinui ianamana sani ia Anahatana. Oapamata sou sapani?”
Sio pusiso oapamata sou ata Yesus isana, reiso kahurae ohunui. 65 Oyo sio umau ohuto Yesus, onete matai usena na inoo mosa tewa, oyo ohitai oaumaniki oasau osiki oahata, “Masi asau. Ia seia ihitaya?”
Sio mamsakaya oroho Yesus panesi oi.
Petrus iauhaa ata iationa Yesus
66 Petrus waipani naniai rei asi, oyo ia pina makahaie tau ia aihuhue tau sio mamkenu makapanau osi Anahatana ihokai mai. 67 Inoo ata Petrus waini iasa tinaini haineke usa, oyo iarinii uai anoe ia-ia, samatoro iasei iahata, “Ano sahoro akata ia Nazaret rei oi rei tea. Ia Nazaret waini nanai Yesus tea?”
68 Iahata, “He. Uationai tewa. Uanei tewa. Ano wani asau runa sae rei?”
Oyo Petrus ieui pani mitanunue.
69 Ia pina makahaie rei inoo Petrus, oyo iasau osi sio pani rei, “Manisate, ia reini, ia isa arihoni sio.”
70 Iahata, “Au? Uationai tewa.”
Oyo sira tau sio pani rei oasau osi Petrus oahata, “Nene manisate, ano mo, ano isa arihoni sio rei. Tau sae? Ano arihoni otoe Galilea!”
71 Oyo Petrus isopa ruai iahata, “Anahatana nanai. Uationa ia rei, ia waini omi oanamana runai, tewa.”
72 Mata huni tewa oyo, manue eretunkeko honu. Eretunkeko nai ua nea. Oyo Petrus anoi erepeka runa Yesus ne anamanae. “Mka manue eretunkeko nai ua tewasi oi, ano asau ata ationa au tewa nai tonu nea.”
Reiso Petrus irani anoi repunoko pusiki.