13
Yesus ianamana rerihoni kakinate rerihoni tuniai reini erepena
1 Yesus runa ne mampusua oeu arihoni Anahatana ne numa mainisie nusue, oyo ne mampusue isa iasau sanrei iahata, “Upuku Matuhetene, masi anoo. Anahatana ne numa mainisie rei, iake. Sio onanai tau hatu maina-mainaya waroni iaka.”
2 Iahata, “Onoo numa mainaya rai? Mka sio okuka Anahatana ne numa mainisie reini na hatu rai ratanuhaha tewa nea. Hatu rai rakukaso rarihoni nahaya.”
3 Oyo Yesus ieu roe pupue wani nanae Zaitun. Hoka roe oyo, iruei iamanane Anahatana ne numa mainisie pani ekote hanae pani hae. Oyo Petrus, Yakobus, Yohanes, runa Andreas ohoka mai tanui, nanie oasei tau sio ruao okatai. 4 Oasei sanrei, “Masi asau mai. Inasa sio okuka Anahatana ne numa mainisie sani ano asau rei? Mka anoo akakinate sae naone na anei ata sio nanie okukai nea?”
5 Iahata, “Osaka-saka na pene sio oakarotamo oahata, “‘Tuniai reini erepena nea.’ 6 Mka sio panesi ohokaso ohete au nanaku oasau oahata, ‘Au mo Ia waini Anahatana Iratiki Iapuheu Mansia’ oyo oakarota sio panesi. 7 Munata oatinu sio osima runa manahitana mo, pene okaitau. Kahurae sanrei, aikee tuniai reini erepena tewasi. 8 Mataanoe kupaniau oatana runa umau, niana oatana runa umau. Mai tuniai reini mo, isu sui supan-supani. Sio panesi omakaneaso. Tea mo, osupu muaine tewa nea. Ne areini mo, pusire nene aikune mani sani ia ikine nanie iamrae inai tiai ereuni.
9 Kahurae osaka-saka. Mka sio osotamo na oruimo osi sio mainaya tau niana. Mka ohitamo sui numa mananouna osi sio Yahudiu. Mka ororimo oamanane sio no kawasa runa sio aiau noso oparisaa tau au. Reiso osaka oaunauso rerihoni au. 10 Kahurae oaunau sio niana pusire mai tuniai reini tau Sou Iake naone. 11 Mka oaresimo, oyo ororimo oamanane sio onata, pene anomo rauponu runa mka oasau sapani. Mka Anahatana iasau osimo kahurae oasau sapani. Omi ruamo oanamana tewa, ne Anahatana Ne Inaha mka irui anamanaya osimo. 12 Mka kakai irui wanini waini iparisaa tau au osi sio ohunui. Wanini irui kakai waini iparisaa tau au osi sio ohunui. Sani rei honu runa amai runa ne hehuka. Sio ikina mka orui noa ama runa noa ina osi sio umau na ohunuso. 13 Mka sio pusiso openeso tanumo noso oparisaa runa au. Ne ia seia iapamese rotu-tu imatai, mka iamahaiki rotu-tu ria supani haineke Anahatana.
14 Mka onoo sio oapuoo kahatene wani ereuna Anahatana ieui arihoni ne numa. Anahatana isopo na pene oapuooi pani ne numa rei. (Ano wani anoo surate rei, atinu ia-ia na anei.) Sio oapuooi, oyo kahurae sio pusiso sui Yudea orumaso roe tinetaya. 15 Sio wasoni oru-rueso roe ainata hahaya pene osipuso, pene onususo pani no numau honu na onana no apia. 16 Sio noi nisiu pene onuniso, pene onana no papita. 17 Sio wasoni tiao te wasoni osusu sio ikina asi pani muie reimo siraka. Oruma iake tewa. 18 Ainisi na pene sanrei tau ihate. 19 Pani muie reimo, sinsaraso mainae sani sio sinsaraso tewasi on tuniai reini remrae asi. Oyo pani muie honu sinsaraso tewa nea. 20 Ne mka Anahatana anoi erepeka runa sio wasoni ininiso na oparisaa tanui. Reiso itapiso sinsaraso rotu-tu potuina tewa. Sinana sinsaraso rotu-tu potuina, mka ia isa iamahaiki tewa nea.
21 Tau napisi reimo, mka ia isa iasau osimo iahata, ‘Masi onoo. Ia waini Anahatana Iratiki Iapuheu Manisa waini ihokai nea’ te ia isa honu iahata, ‘Mai, ia wai pani rei.’ Pene oparisaa tau sio rei. 22 Tau sae? Sio umau mka ohokaso oasau oakarota ata sio rei wasoni Ia waini Anahatana Iratiki Iapuheu Mansia te sio wasoni ia mamsima runa Anahatana ne anamanaya umau. Mka ouna kakinata sani sio no kawasa on roe Anahatana runa sima-simana na sio wasoni onoore osira. Oakarota rea sio wasoni Anahatana ininiso na oparisaa tau ia. 23 Reiso osaka-saka. Uatuhetemo nea, tuniai reini mo erepena sapani on erepena tewasi.
24 Tau napisi reimo, sinsaraso, oyo ranie erepumonoi, hunane reriohui. 25 Oneu ramnahuso on roe nante runa sae wani roe nante rakoka pusire. 26 Oyo sio pusiso onoo Au, Tumata Reini, Anahatana Ihitiku uhokaku pani yahu tihue runa we kawasa. Onoo au uita-itaku. 27 Mka uaisosi we maisosia on roe noiyaha na oamanou sio wasoni Anahatana ininiso na oparisaa tau ia. Oamanouso on nau, on ria, on poe, on pani, oyo on pani tuniai nene rurue rotu-tu roe nante nene rurue.
28 Sani inoo roe ai isa na inooi marae nea, inoo nene kataunua manna nea, oyo mato resineui honu, inoo sanrei ianei ata ihate erehokai nea. 29 Sani rei oi tau tuniai reini erepena. Onoo sanrei mo, oanei ata mata huni tewa oyo, tuniai reini erepena. 30 Uasau osimo. Sio pusiso wasoni oamahaiso muie reini mo, omataso tewasi samatoro sinsaraso sani wani uasau reini. 31 Nante runa tuniai reini mka ranikuso, ne au we anamanaya mka ranikuso tewa.
32 Ia seia mani iae ianei tewa inasa mka sio sinsaraso sanrei. Sio maisosia roe noiyaha iae, oanei tewa oi. Au Anahatana Anai iae uanei tewa. Hasae amaku ruai mani sahoro ianei. 33 Reiso oainati. Osaka-saka. Oanei tewa inasa uhokaku honu. 34 Areimo sani ia isa ieu iarihoni ne numa, oyo ieui hainau. Ia rei iaisosi ne manorina. Irui kawasa osiso na osaka ne numa rei. Sio pusiso osupu no taneiu. Iaisosi ia mamsaka mitanunue isakai ia-ia. 35 Reiso osaka-saka. Oanei tewasi inasa numa upue inuniki. Kani tau ranie manne te? Tau saa monon tihu te? Tau manua ratunkeko te? Tau ranie eresaa te? Oanei tewa. 36 Pene rotu-tu uhokaku omi osaka tewa, oyo usupu pusimo onekemo. 37 Sae wani uasaui osimo reini mo, uasau osi sio pusiso, osaka-saka.”