12
Yesus iaunau sio wasoni openeso tanui tau mamruni matuhetena
1 Yesus iaunauso tau mamruni matuhetena. Iaunau sio onata arihoni sio wasoni osaka okenu makapanau osi Anahatana, sio onata, runa sio matuhete Musa ne maunauna. Iahata, “Ia isa irahu nisi. Irahu nisi rei, tau atuhu anggur. Inana tone erehori nisi rei, oyo ikani nonu na oheta tau anggur nene huaya rotu-tu nene sanaute erehokai poe nonu anoe rei. Oyo inana numa wani hatu naue isa na osaka nisi rei roe nene hahae, samatoro inina sio umau na osaka ne nisi rei runa osama nene huaya osiki. Osaka samatoro ieui arihoni otoe rei.
2 Tau musum tinou nene nania nea, iaisosi ne manorine isa na ieu ria sio mamsaka nisi rei, nanie inana ne huaya umau. 3 Oyo suru ria ieui. Ieui rotu-tu ihokai ria, oyo sio mamsaka nisi rei osotai. Ohitai, oyo oaisosiki inuni nakui.
4 Ita iaisosi ne manorine isa honu. Ita suru ria ieui. Ieui rotu-tu ihokai ria. Sio oamuirai tewa, reiso sio ohitai rotu-tu ne apate roe unui.
5 Ita iaisosi ne manori tamene isa honu. Ita suru ria ieui. Ieui rotu-tu ihokai ria, oyo ohunui. Ita iaisosi sio panesi, ia isa pusu ia isa. Ne sio umau mo, ohitaso, sio umau, ohunuso. 6 Iaisosi rotu-tu pusiso. Kani iaisosi ia seia honu? Nesi ia osa mani mai ne numa. Ia rei, ia ruai anai hanaie. Anoi runai. Iasau pani anoi iahata, ‘Sani anaku ruai iau areimo, mka oamuirai.’ Reiso iaisosi ruai anai. 7 Ieu honu, oyo onooi samatoro oasau mai umau. Oahata, ‘Ia reimo, anai ruai. Mka imatai, anai rei isupu ne tuamane rei. Mai, na ihunui na ruari isupu tuamane reini.’ 8 Reiso osotai na ohunui, oyo opesi hatai rei pani manahane arihoni nisi rei.
9 Ia waini ne tuamane rei, mka iuna sae? Ihokai mai nisi rei, ihunu sio mamsaka rei, oyo inana sio tamena osaka ne nisi honu. 10 Onoo tau Anahatana ne anamanaya tewa sou wani ereasau sanrei?
‘Hatu wani sio mamnana numa openeso tanui
ereuna hatu tinipae nea.
Ereuna numa makae nea.
11 Upuri iuna sanrei mo,
inooi iake.’”
12 Reiso sio onata oatinu mamrunie rei nanie oaresi Yesus. Oahata Yesus ianamana tanuso. Sio sani sio mamsaka nisi runa sio mamnana numa. Tea mo, openeso tau Yesus. Ne okaitau sio panesi, reiso oeuso oarihoni Yesus.
Sio onata oamanaru Yesus ata ianamana kahatene rerihoni natu Roma
13 Sio onata oaisosi sio onata arihoni akama Yahudi umau runa Herodes ne mansiau umau mai Yesus, nanie oasei tanui na osotai ianamana kahatene rerihoni natu Roma. 14 Ohokaso mai Yesus, oahata, “Upuku Matuhetene. Ami anei ata ano mo, ano manisate. Anomu reuponu tewa rerihoni mansia inooa sapani. Anooma pusima osa, ia isa mo, ia mainae tewa. Ano atuhetema pannuhu tau Anahatana ne maunauna. Anahatana itapita isenu pea osi Kaisar te tewa? Kahurae isenui te tewa?” (Kaisar mo, ia natu tau sio Roma no tuamane pusire. Oaoi sio no natu tau Kaisar.)
15 Ne Yesus ianei ata oasei reai, reiso iasau iahata, “Omi nanie osotaku, nanie tahae? Masi orori kepeni inate isa mai na unooi.”
16 Reiso orui kepeni inate isa osiki, oyo iasei, “Ia seia siaini reini? Okanu ia seia nanai tanui?”
Oahata, “Kaisar.”
17 Iahata, “Reiso osenu osi natu Kaisar pusu sae wani ia ne kawasa iainisiki. Orui osi Anahatana pusu sae wani ne kawasa iainisiki.”
Osira oatinu tau rei.
Sio Sadukiu oasei rea tau Yesus
18 Sio Sadukiu umau ohokaso mai Yesus. Sio rei oahata sio matana mo, oamahai tewa honu. Reiso oasei sanrei, 19 “Upuku Matuhetene. Masuae Musa ikanu sanrei, ‘Munata ia hanaie isa imatai, sahai isusu tewa, kahurae wanini inana ia pina uhanu rei na isusu, oyo onoo sio ikina sani kakai waini imatai rei ne hehuka.’ 20 Reiso sani ia hanaie isa nea waniu sio nome. Ia rei, ia manaonete, iausahai, oyo imatai iarihoni sahai. Sahai rei isusu tewasi. 21 Ita wanini inana kakai sahai rei honu. Ita wanini rei imatai iarihoni ia pina rei honu. Ia pina rei isusu tewasi. Ita wanini ia isa honu inanai ita sanrei sirinia, 22 rotu-tu ituso sanrei. Oyo tau muie ia pina imatai honu. 23 Tau ranie hatae rei sio matana oamahaiso honu, ia pina rei, sahai tau ia seia? Ituso onana ia pina rei nea!”
24 Iahata, “Omi osana rerihoni sio matana oamahaiso honu, sio sapani. Oanei tewa Anahatana ne anamanaya raasau sapani. Oanei tewa Anahatana ne kawasa sapani. 25 Mka sio matana oamahaiso honu, oausahaso tewa nea. Sio sani Anahatana ne maisosia on roe noiyaha. 26 Rerihoni sio matana oamahaiso honu, onoo tau Musa ne anamanaya tewa? Ikanu ata tau Anahatana ianamana osiki on pani ai pukune rei, wani usa ereai tanui iahata, ‘Au reini mo, au Anahatana wani Abraham iainaa runaku. Ishak iainaa runaku. Yakub iainaa runaku.’ 27 Masike tonuso omataso nea, Anahatana inooso sani oamahaiso. Reiso ia mo, ia waini Anahatana tau sio matana tewa. Ia Anahatana tau sio wasoni oamahaiso. Omi osana oasau ata sio matana oamahaiso tewa honu.”
Ia matuhete Musa ne maunauna isa nanie ianei maunau sae wani mtinte
28 Nene poua sanrei, oyo ia matuhete Musa ne maunauna isa iatinu sio otuntana. Iatinu ata Yesus isana tau sio Sadukiu arihoni akama Yahudi iake. Reiso iasei tanui iahata, “Upu. Maunau sae wani mtinte erenesi maunauna pusire?”
29 Iahata, “Maunau mtinte wani sanrei, ‘Atinu omi Israel! Upuri Anahatana, ia osa mani. 30 Anomu runa Upumu Anahatana runa anomu pusiki, runa me inaha pusiki, anomu erepeka runai sui osa, anana tanei osiki sui osa.’ 31 Maunau mtinte isa honu, areimo sanrei, ‘Anomu runa sio pusiso sani anomu runa ruamu.’ Maunauna ua rai sahoro mtinta ranesi maunauna pusire.”
32 Iahata, “Titue, matuhetene! Ano asau manisate ata Upuri Anahatana ia osa mani runa anahatana tamene isa waimo tewa nea. 33 Kahurae anori runa Anahatana runa anori pusiki, iariniiki sui osa, ianori runai sui osa, anori runa sio pusiso sani anori runa ruari. Iuna sanrei iake erenesi iakanupu makapana sae mani te irui sae mani osi Anahatana.”
34 Yesus iatinu ata isana iake nai osa, reiso iahata, “Ano haineke nea na mka apusu tau Anahatana irime tuniai reini.”
Oyo sio pusiso okaitau oasei tau Yesus nea.
Yesus iasei tau sio onata honu
35 Yesus waini iatuhete pani Anahatana ne numa mainisie nene nusue, oyo iasei sanrei iahata, “Sapani na rotu-tu sio matuhete Musa ne maunauna oasau ata Ia waini Anahatana Iratiki Iapuheuta rei mo, ia Daud upui? 36 Aikee Anahatana Ne Inaha iuna Daud ruai iasau iahata,
‘Anahatana iasau osi Upuku:
Rue hae hanaku wanane
rotu-tu ano aheta tau me nisau.’
37 Reiso munata Daud ruai ioi Ia waini Anahatana Iratiki tau Upui sani ia sahoro ia manaonete, sapani na ia hasae Daud upui muie mani?”
Sio hutue oatinui iake.
38 Iasau honu iahata, “Ainati runa sio matuhete Musa ne maunauna. Onina na mansia pusiso onooso sani sio mainaya, reiso oeu oausahu papi naua runa onina na sio pusiso oauhaaso sani sio mainaya sui pasar. 39 Nanie orue tau sio mainaya no katerau pani numa mananoune osi sio Yahudiu. Tau karisaa, nanie orue tau katerau waroni oaunuture osi sio wasoni oamuiraso. 40 Aikee oakarota sio pina uhanu na onana no numau pusire. Oainisi roe hohao mani rotu-tu potuina ne oainisi pani anoo tewa. Mka Anahatana iapasanaso mtinte.”
Ia pina uhanu irui kepeni panesi osi Anahatana
41 Yesus waini iru-ruei pani Anahatana ne numa mainisie. Iruei iamanane peti wani oaiinu kepeni na oruire osi Anahatana. Iasumata sio onusu no kepen tanui. Sio kaya panesi onusu kepen panesi. 42 Oyo ia pina uhanu isa ihokai. Ia pina rei mo, imosokiniki. Inusu kepen ikina, ina ua mani. Areimo kepen panesi tewa, mkana mani. 43 Oyo Yesus ioi ne mampusua, iahata, “Masi onoo. Ia pina uhanu waini imosokiniki rei, inusu kepeni panesi erenesi sio kaya pusiso. 44 Sio kaya rei orui no kepen nesia mani. Ne ia pina waini iauhanui rei irui ne kepen pusire. Kani iai sae honu?”